КӦГ ТИРІГЛЕРІНІҢ КЕЕРКЕСТІГ ӰНІ ЧАЙЫЛҒАН
29.11.2016
Хабарлар
Ағбанда Н.Ф.Катановтың адынаң Хакас гимназияда хакас кӧг тиріглерінең ойнапчатхан олғаннарның марии полған. Марығда музыка паза олған искусство школаларының ӱгренҷілері араласханнар. Олар чайаачы устарынаң «Инструментальнай ансамбль» паза «Фольклор ӧмезі» номинацияларда сынасханнар.
Марығ республикада пизінҷі хати иртірілді. Аның ӧӧн пӧгіні хакас чонның культуразын, кибірлерін хайраллиры паза тилідері полча. Аны республиканың олған искусство школазы Хакасияның культура министерствозы полызиинаң иртірген.
Ӱгренчілернің устарын Хакасияның чон артизі Екатерина Кыштымова, Н.Ф.Катановтың адынаң Хакас хазна университедіндегі музыка колледжінің ӱгретчілері Людмила Кирбижекованаң Вячеслав Албычаков паалааннар.
Номинациялар частар хоостыра ікі чардыхха чарылғаннар. Сценаа пастап 11 - 13 частығ араласчылар сыхханнар, анаң устарын 14 - 16 частығ ӱгренҷілер кӧзіткеннер.
Марығ пасталыбысханда, чатханның, хомыстың, ыыхтың, хобырахтың паза тӱӱрнің ӱннері улуғ залға толдыра чайылған. Ӱгренҷілер чонның тахпахтарын паза сарыннарын, Анна Курбижекованың, Евгений Улугбашевтің, Спартак Кимнің, Вячеслав Кученовтың, Юрий Киштеевтің кӧглерін толдырғаннар.
Кӧрігҷілерні Ориса Боргоякованаң Саника Троякова аптааннар. Хызыҷахтар хомыстарнаң Спартак Кимнің паза Курмангазының кӧглерін чалтырама толдырыбысханнар. Оларны марыға Хакасия культуразының саблығ тоғынҷызы Мария Сартыкова тимнеен. Мария Сергеевнаныңох холында ідӧк «Чылтыс» ӧменің араласчылары ӱгренчелер. Олғаннар, «Фольклор ӧмезі» номинацияда аралазып, «Сіліг чахайах» паза «Эк, чоным, пай ирен» хакас тахпахтарын сарнааннар. Музыкант Аржан Туденев «Тигір хуры» ӧмені марыға сығарған. Аның ӱгренҷілері «Кӧк тасхыллар» ырны толдыр пиргеннер.
Ідӧк кӧрігҷілернің хайиин Аршаннар аалындағы «Саңыҷах» ӧме тартхан. Олғаннар ыыхнаң, тимір хомыснаң, тӱӱрнең паза хомыснаң пӧзік синде ойнапчалар. «Саңыҷахтың» солизі чи хайдағдыр! Таланттығ Вова Мамышев ӧтіг ӱнінең, ырлар паза тахпахтар сарнап, марығны кӧрерге килген чонның чӱреен хайылдырған.
Хакас кӧг тиріглерінең ойнирынҷа республика марии пӧзік синде ирткен. Прай араласчылар чахсы тимнентірлер, аннаңар жюринің кізілеріне артыхтарның артыхтарын таллирға сидік полған, неке. Пір час пазынаң олар чиңісчілернің аттарын адааннар. I степеньніг лауреат атха турысханнар: «Тигір хуры» ӧме, «Чылтыс» ансамбль паза Ориса Боргоякованаң Саника Троякова. II степеньніг лауреат атха - «Чылтыс» ансамбльның кічіг ӧмезі, III степеньніг лауреат полыбысханнар «Айдас», «Саңыҷах», «Артыс» ӧмелер паза 2 № олған искусство школазының ансамбльы.
Чиңісчілерні Аарластығ пічіктернең таныхтаан соонда Хакасияның культура министрінің орынҷызы Лариса Киштеева сӧс алған: «Пӱӱнгі марығ пӧзік синде ирткен, минің кӧрізімнең, олғаннарның устары чылдаң чылға ӧсче. Аның ӱчӱн прай ӱгретчілерге улуғ алғызым читірчем. Ізенчем, кічіг чайаачылар, улуғ ӧзіп алзалар, музыкант чолын таллап аларлар».
Таныхтирға кирек, республика мариинда чиңіс тутхан таланттығ олғаннар 2017 чылда Дельфийскай ойыннарда паза Бурятияда Россия синінде иртчеткен «Найдал» марығда устарынаң сыназарлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде