ХАЗИИҢАР ХАЙРАЛЛАҢАР
06.12.2016
Хабарлар
Тиксі тилекейде 1 декабрьда СПИД ағырығдаң тоғыр кӱресчең кӱн таныхталча. Ағаа чарыдылған пресс-конференцияда хабарӌыларнаң Хакасияның «СПИД-таң тоғыр кӱрезіг паза профилактика апарчатхан республика кінінің» ӧӧн имҷізі Н.С.Конгаров паза Роспотребнадзорның Хакасияӌа управлениезінің эпидемиология пӧлии пастығы Е.Ю.Шалгинова тоғасханнар. ВИЧ-чуғынҷах ағырығнаң нинҷе кізі ағырчатханынаңар паза санға алылғанынаңар, имнег, профилактика тоғызынаңар чоохтап пиргеннер.
Сибирьдегі федеральнай округта СПИД-наң ағырчатханнарның санынҷа Хакасия 8-ӌі орында турча. Пістің республикадаң пасха андар Хызылчар крайы, Новосибирск, Кемеров областьтары кірчелер. 2016 чылның он айына Хакасияда ВИЧ-чуғынӌах ағырығнаң ағырыбысхан 392 кізі сығысхан.
- 392 кізі санға алылғаны ирткен чылдағызынаң 28 %-ке кӧп, - чоохтапча Елена Шалгинова. - Мындағ саннар имҷілерні паза эпидемиологтарны ӱрӱктірче. ВИЧ-чуғынҷах ағырығны чухтырғаннарның 52 %-і наркотиктернең тузаланған, 46 %-і ирен паза ипчі аразында полчатхан палғалыстар ӱчӱн. Пӱӱнгі кӱнде синтетика наркотиктері кӧптелче.
Елена Юрьевнаның искіриинең, хонӌых регионнарда ағырығ кізілер саны мының алнындох ӧс сыххан. Хакасияда профилактика тоғызын республиканың хазых хайраллаӌаң министерствозы, «СПИД-таң тоғыр кӱресчеткен паза профилактика апарчатхан кіннің» специалисттері паза имӌілер апарчалар. Пу ағырығдаңар чонға сыбыра искірерге киректелче. 2013 - 2014 чылларда иртірілген сурастырығ хоостыра, Россияда чииттернің аразында Ағбандағы студенттернің СПИД-таңар иң тӧбін пілістер ілезіне сыххан. Пылтыр тоғысчы предприятиелерде профилактика апарылған. Пу ағырсымнығ сурығ чииттерге ле теелбинче нооза.
- Чуғынҷах хан пастыра паза ікі кізі узыбысса чух парча, ағырығ іҷедең ідӧк ағырығ пала тӧріпче, - чоохтапча Николай Конгаров. - Иң пастағызын, инфекцияны ал чӧрчеткен кізіні имнеп, чуғынӌахты чох идерге киректелче. Ағырчатхан кізее килістіре имнер таллап имнезе, пасхазына ол хорғыс паза ағылбас. Че, имнир ӱчӱн, пастап ол вирусты ал чӧрчеткен кізіні ілезіне сығарарға кирек.
Пір ле кізінің ағыриин істезіп имнеені - ахча ла тикке хоратханы, тіпче ӧӧн имҷі. Іскее кір парған, пір орында чуртабинчатхан, наркотиктернең тузаланчатхан кізілерні, таап, сыныхтирға киректелче. Мындағ чоннаң тоғынчатхан халых пірігістерінең, полызығ фондтарынаң хада-пірге тоғыс апарарға пӧгінчелер имӌілер. 28 ноябрьдаң тиксі Россияда «Стоп ВИЧ-СПИД» акция пасталған. Чонға чурты хоостыра имнег поликлиникаларында вирусха сыныхтағ иртібізер оңдай пар. Ағырығ тузында имнелзе, олар чонға хорғыс ағылбастар, сӧбіре тӧстеп, хазых палалар тӧрідер оңдайлығлар. Хакасияда ағырығ іҷедең тӧреен 300 паладаң 16-зы ла вирустығ полған.
Пӱӱнгі кӱнде Шира, Ағбан пилтірі аймахтарда, Абаза, Ағбан, Саяногорск паза Харатас городтарда пу ағырығ удаа табылча. Имӌілер араға іспеске, наркотиктернең тузаланмасха, профилактикаа тудынарға чӧп пирчелер. Ағырығны чухтырып албас ӱчӱн, посха хайралланарға киректелче.
Автор :
Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде