ХАЗНАНЫҢ ТАҢДАҒЫЗЫ ПІСНЕҢ ПАЛҒАЛЫСТЫҒ
07.12.2016
Хабарлар
ПІС ПІР ЧОНМЫС, РОССИЯ ПІСТӀҢ ПІР ЛЕ
Владимир Путин чооғын хазна чуртағӌыларын піріктірібіскен нимедең пастаан - патриотизмнең.
- Кізілер пірге тудын сыхханнар - піс анзын кӧрчебіс, аның ӱчӱн пістің чуртағҷыларға алғыс читірерге кирек - патриотизм ибіре. Прай нимее чӧпсінчеткен, прай ниме оларның кӧңніне кірчеткен ӱчӱн нимес. Чох, сидіксіністер ам даа читкіӌе. Че кізілер оларның сылтағларын оңарчалар, паза ӧӧні - хада тудынып, оларны хайди даа тобырып аларына ізенчелер, - теен президент.
Хазна устағҷызы кӧрізінең, пістің чон, Россияның ӱчӱн сағыссырап, аның национальнай кирексіністерін арачылап, пірге полыбысхан. Ідӧк Россия президенті, килер чылда Октябрь революциязына 100 чыл толарын сағысха киріп, ол ирткен тустағы ыырласты пӱӱнгі чуртассар тартпасха хығырған.
- Ундубаалар: піс пір чонмыс, паза Россия пістің пip ле, - таныхтаан Владимир Путин.
ХАЗЫХ ХАЙРАЛЛИРЫ
Россия президенті алынҷа хайығ хазых хайраллирына паза демографияа салған. Хайди ол таныхтаан, Россия политиказының ӧӧн кӧстее - кізілерні хайраллирында, пістің чуртағӌыларның санын ӧскірерінде. Чидіглер пӱӱнгі кӱнде пар. Кӧзідімге палалар тӧрирінӌе Россия Европадағы илееде хазналарны ас парыбысханы адалған. Ідӧк мының алнында чох полған перинатальнай кіннер хазнада кӧптең кӧп полыбысханынаңар чоохталған. 2018 чылда оларның саны Россияда 94 пол парар осхас. Че кӧп сидіксіністер ам даа пар полғаны таныхталған. Олох теестер паза имҷілернің хомай хайии.
Хазых хайраллир сфераны 2017 чылда чахсыландырар ӱчӱн, Владимир Путин пӧзік технологиялығ имнег полызиина ахча позыдар механизмні ізестіг ит саларға, имӌілернің квалификациязын кӧдірерге, имҷілерні кӧп пічіктер пасчаң тоғыстаң позыдарға чахығ пирген. Ідӧк чағынғы ікі чылға хазнаның прай имнег тураларын паза поликлиникаларын чапчаң тоғынчатхан интернеттіг ит саларға пӧгін турғыс салған.
- Анзы ыраххы городтағы алай поселоктағы даа имҷілерге телемедицинанаң тузаланарға, региональнай алай федеральнай клиникалардаң чӧптерні чапчаң ал турарға оңдай пирер, - теен Путин.
Ағаа хоза, хазна устағӌызы санитарнай авиация службазын тилідерге киректелчеткенін таныхтаан.
- Санитарнай авиацияны тилідербіс. Ӧӧнінде Сибирьде, Северде паза Ыраххы Востокта. 2017 чылда ол проектче авиация полызығларын аларына 3,3 миллиард салковай позыдылары кӧріл парған, - искірген Россия президенті.
ӰГРЕДІГ
Владимир Владимирович, теестегі суриинаң ӱгредіге тееліп, прай иргі школаларны нааӌылирға, школалардағы ікінҷі паза ӱзінӌі сменаларнаң палғалыстығ сурығны пӧгерге пӧгін турғысхан.
- Пістің улуғ хазнаның прай чирлерінде палалар истіг, амғы тусха килістіре оңдайлығ школаларда ӱгренерге киректер. Аннаңар піс школаларны нааӌылир программаны узарадарбыс. Пістің иргі, изелчеткен школалар чох поларға кирек, - таныхтаан президент.
Хазна устағӌызының искіриинең, чағынғы чылларда школаларда 187 муң 998 наа орын тӧстелер. Ідӧк Путин ӱгредіг апарҷаң оңдайларға хайығ айландырған.
- Пістің ӱгредіг системазы мындағ нимее тӧстенерге кирек: полған на паланың, полған на саарбахтың чайаачы хылии пар. Аның талантын азып алары - ол пістің сірернең хада пӧгінібіс, анзында - Россияның чидии, - пӧгін турғысхан Владимир Путин.
СОЦИАЛЬНАЙ СФЕРА
Социальнай сфераның ӱзӱриин президент волонтерлар чӧрімін тилідерге паза коммерческай нимес пірігістерге хабазарға киректелчеткенінең пастаан. Владимир Путин волонтерлар чӧрімін тилідеріне харығ полчатхан нимелерні хыйа идерге хығырған. Ідӧк социальнай кӧстегнең тоғынчатхан НКО-ларға прай саринаң хабас турарға пӧгін турғысхан.
Ідӧк Россия президенті городтарны паза аалларны иптир сурығны кӧдірген. Аның кӧрізінең, пу сурығ удаа чуртағҷыларны араластырбин пӧгілче. Владимир Путин чиновниктерні чоннаң чӧптезерге хығырған.
- Килер чылда піс регионнарға аал-городтарны, ол санда моногородтарны, иптиріне 20 миллиард салковай ызарбыс. Ол ахчанаң хайди тузаланарын пӧгерінде хайди даа чуртағҷылар аралазарға кирек, - таныхтаан хазна устағҷызы.
ЭКОЛОГИЯ
Чир-чайаанны хайраллир сурығны Владимир Путин 2017 чыл Экология чылы тіп чарлалчатханынаң искіріп пастаан.
- Правительстваа Россияның Волга, Байкал, Алтайдағы Телецкай кӧл осхас хайхастығ чир-чайааннығ чирлерін хайраллаҷаң программа тимнеп саларға чахығ пирчем, - пӧгін турғысхан президент ол кирек хоостыра.
Россия устағӌызының чооғынаң, иң пастап прай хазнада аал-городтарнаң хости полған сӧп-саптығ орыннарны чох идерге кирек.
Россия экономиказынаңар чооғын пастап, Владимир Путин тилекейдегі рынок оңдайларын, санкцияларны, хайди ол оңдайнаң пістің хазнаны чаба пазарға иткеннерін сағысха кирген. Че олох туста президент экономика тилізі тохтапчатханының ӧӧн сылтағларын хазнаның істіндегі сидіксіністерінде кӧрче.
- Иң пастап ол инвестициялар, наа технологиялар, профессиональнай кадрлар чидіспинчеткені, конкуренция читкіӌе тилібинчеткені, - таныхтаан Владимир Путин.
Президенттің искіриинең, пӱӱнгі кӱнде экономиканың тӧбін тӱскені тохтадылған. Промышленность паза аал хонии саринаң улуғ нимес ӧзіс парын таныхтаан. Пу чылның салтарларынҷа хазна устағҷызы инфляция сині тӱс парарына, 6 проценттең тӧбін поларына ізенче.
- Оңнапча поларзар, 2015 чылда инфляция 12,9 процент полған. Ізенчем, пу чылда ол 6-даң пӧзік полбас, пірее 5,8 процент полар. Иң тӧбін инфляция 2011 чылда полған - 6,1 процент. Пазох чоохтирбын, пӱӱл аннаң даа асхынах полар. Анзы килер чылда піс кӧстегліг 4 процентке чидіп аларына ізеніс пирче, - чарытхан Россия президенті.
ЭКОНОМИКА
Олох туста экономика оңдайланғаны сах андох ізестіг ӧзіс поларын таныхтабинча тіп искірген Владимир Путин. Россияның экономиказы нульлығ танығ хыринда ӱрге турыбыспас ӱчӱн, оңарылыстығ кӧстеглер турғызып, оларға чардыхти чит турарға киректелчеткенін таныхтаан. Президенттің кӧрізінең, пу оңдай хысха тус аразына чахсы салтарлар пирче. Кӧзідімге аал хониин ағылған. Ӱр ниместе ле ол азахха тур полбас тіп саналған. Че, аал хонииндағыларға хабасчаң орта программалар алылғанда, АПК пӱӱнгі кӱнде тӱзімніг отрасльға айлан парған. Ол пістің хазнаны азырапча паза чоннар аразындағы рыноксар ӧткін кірче. Владимир Путин мында пip саринаң Россиядаң тоғыр кирілген санкциялар хабас пиргенін таныхтаан.
- Хайди тіпчелер пістің чонда, хомай ниме чох чахсы ниме полбинча. Пістең тоғыр санкциялар кирібіскеннер, піс - удур. Іди пістің аал хонии ас-тамаан сығарчатханнарға істіндегі рынокта хабас пиргебіс, - искірген Путин. - Аал хонии ас-тамаан экспортха ысханы пӱӱн чааласчаң тиріглер садиинаң даа кӧп парыс пирче. 2015 чылда тиріглер 14,5 миллиард доллар пирген полза, аал хонии ас-тамаа - 16 артиинаң миллиард. Пӱӱл улам кӧп поларын сағыпчабыс, 16,9 миллиард полар, неке. Аның ӱчӱн аал хонии тоғынӌыларына алғызыбыс читірелер.
ТАСТЫНДАҒЫ ПОЛИТИКА
Президент, тастындағы политикадаңар чоох апарып, Россияны хыза пазарға кӱстеністер иділчеткенін сағысха кирген. Кӧзідімге, олох допингтернең палғалыстығ суум-саамны, хайди пістің спортсменнерні, ол санда паралимпиецтерні, хыйыхтааннарын.
- Піс ыырӌыларны тілебинчебіс паза хаӌан даа тілебеебіс. Піске арғыстар кирек. Че пістің кирексіністерні хыза пазарға паза оларны нимее салбасха пирбеспіс, - искірген Путин.
Хазна устағӌызы Россия чоннар аразындағы хайызығлар системазын тӧстирінҷе чоохтазыға тимде полғанын таныхтаан. Владимир Путиннің чооғынаң, Россия США-ның наа администрациязынаң палғалыстарны тилідерге тимде. Ідӧк Хыдатнаң пірге тоғынары уғаа киректелчеткенін таныхтаан.
САЛТАРЛАР
Россия президенті Владимир Путиннің пӱӱлгі Айланызының кӧп чардығы хазнаның істіндегі киректеріне чарыдылған тиирге чарир. Пірге полары, хабазары паза сынға тудынары - мындағ полған Россия устағӌызының ӧӧн сӧстері Айланыснаң чоох тутхан туста.
Хазна устағӌызының Айланызы 69 минута ирткен, 10 азыра хати айа сабызынаң удурлалған.
- Хазнаның таңдағызы піснең, пістің прай чуртағҷыларыбыстың істенізінең паза талантынаң, олар нандырығлығ полчатханынаң паза чидіглерге читкенінең палғалыстығ. Піс хайди даа алныбыста турчатхан кӧстеглерге чидербіс, пӱӱнгі паза таңдағы кӱннің пӧгіннерін пӧгібізербіс, - мындағ сӧстернең Айланызын тоосхан Россияның президентi Владимир Путин.
Автор :
Тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы