АРЫҒ ХЫНЫСТАҢАР КӦГ
10.01.2017
Хабарлар
Ирткен чылда декабрь премьераларға пай полған. Наа ойыннаң «Читіген» театр ӧріндірген, филармония саблығ «Чанар хус» операны хатап турғызыбысхан, Хакас драма театры, тізең, кӧрігҷілерге «Мин - Маугли» спектакльны сыйлаан.
Чоохтирға кирек, «Мин - Маугли» - саарбахтарға ӧнетін турғызылған ойын, аны Калмыкия искусствозының саблығ деятельі, театрның ӧӧн режиссеры Баатр Колаев чайаан.
Сцена узы Редьярд Киплингтің саблығ нымағының полтазын толдыразынаң артыс салтыр, че аңнарның орнына артисттер кізілерні ойнапчалар. Аннаңар Акела - «Пора пӱӱрлер» ӧменің устағӌызы, Багира - ырӌы,
Шер Хан - прайзына сыданарға сағынчатхан чиит оол, Маугли, тізең, Акеланың азыраан палазы.
Олар «Джунгли» адалчатхан чирде чуртапчалар. Мында ідӧк хыйға нимес «Бандерлог» обезьяналар паза айағ пілбинчеткен «Хызыл адайлар» ӧмелер парлар.
Ӧӧн рольны Николай Бельтереков толдырча. Аның матыры позын кем полчатханын оңарып аларға кӱстенче. Пір саринаң, ол пала нимес, ағаа кӧп ниме пілдістіг, че пірее сурығларны Багираның паза Кааның чӧптері чох ол пӧк полбинча.
13 - 15 частығларның пастағы орында хыныс паза ынархас полча, пу сурығларға ойында улуғ хайығ салылча. Пастағы хыныс ол чарых, сіліг чахайахха тӧӧй, аны хайраллирға кирек.
Маугли хынчатхан Лакшми хыстың омазын Екатерина Макина ойнаан, чиит артист сценада позы даа порчо осхас кӧрінген. Мауглинің ӧӧн ыырӌызын Андрей Тюкпиеков ойнапча. Аның Шер Ханын пасха матырлардаң алӌаастап полбассың: пӧзік, поғда, кӧйік сырайлығ, пір холында тимір тырғах. Ағаа хоза, пірее сценаларда Шер Хан автоматтығ сыхча. Хынығ полған Кааны кӧрерге. Редьярд Киплингтің нымағында ол чоон чылан полча, мында, тізең, йогаа хынчатхан чааӌы. Кааның омазын Анат Быдышев уғаа чахсы ойнаан. Ідӧк Багираны ойнапчатхан Александра Сукалоны таныхтирға кирек. Чайаачы ус хыйға сағыстығ, кӧп сидіксіністерні тобырған матырны кӧзітче.
«Мин - Маугли» теелбектердең паза кӧглердең пӱткен ойын. Спектакльға музыканы Хакасияның чон артизі, композитор Татьяна Шалгинова пасхан. Татьяна Фёдоровнаның кӧглері «Мин - Маугли» ойынны чазапча паза аның сағызын чарыдарға полысча. Уламох спектакльға килген олғаннарның кӧңніне теелбектер кіргеннер. Оларны Туваның паза Бурятияның саблығ артизі, хореограф Менгилен Сат турғысхан. Таныхтирға кирек, Менгилен Биче-оолович хакас артисттернің устарын пӧзік паалаан. Пістің чайаачыларыбыс сынап таа уғаа чахсы теелбектенчеттірлер.
Баатр Колаев спектакльзар кӧп видео кир салған, хайзыларын Екатерина Станкевич тимнеен. Пір сцена тузында экранда улуғ ай кӧзіділче, ікінӌізінде, тізең, наңмырның тамӌыхтары. Анзы кӧрігӌілерге матырларның кӧңнін піліп аларға чахсы полысча.
«Мин - Маугли» ойынны мағаа декабрьда кӧрерге киліскенде, залда пос орын чох полған. Ағбандағы школаларның ӱгренӌілері спектакльны харах албин кӧрчеткеннер. Ойын тоозылғанда, олар хакас артисттерге матап айа сапханнар. Хакас драма театрының ӧмезі саарбахтарға спектакльларны мыннаң мындар турғызарға пӧгінче.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде