ХАКАСИЯДА КИНО СУУРЫЛЧА
11.01.2017
Хабарлар
Пылтыр, Кино чылында, Хакасияда «#PROKино.Регион 19» проект чуртасха кирілген. Аның ӧӧн пӧгіні чуртағӌыларны фильмнер суурчатхан чир-суғӌыларынаң паза оларның чайаачыларынаң таныстырары полча.
Чоохтирға кирек, наа проектті республиканың культура министерствозы «KИHOcafe» ООО-наң хада тимнеен.
Пастағызын на мероприятие августта тиксі Россиядағы «Кино хараазы» акция тузында иртірілген. Кізілер Максим Усовтың, Антон Литвиненконың, Карим Тугужековтың фильмнерін кӧріп алғаннар. Ікінӌізін киноға хынчатхан улус 28 декабрьда чыылысхан. Кӧрігӌілер «Кирек Хакасияда полча» республика марииның чиңісчілерінің тоғыстарынаң танысханнар.
Пастап сӧс алған культура министрi Светлана Окольникова. Ол таныхтаан: «Кирек Хакасияда полча» марығ 2016 чылда 1 июльда «Сибер Ил» чоннар аразындағы форум тузында ирткен. Жюри тоғызынаң устааннар Россияның саблығ артизі Михаил Пореченков паза Россияның арачыланыс министерствозындағы культура устанызының пастығы Антон Губанков. Антон Николаевич Хакасияның улуғ нанӌызы полған, 25 декабрьда Арачыланыс министерствозының ТУ-154 самолёды Хара талайда саайланғанда, аның чуртазы ӱзілген». Пу сӧстер соонаң кӧрігӌілер, хорғыстығ саайда чуртазын чідірген артисттерні, хабарҷыларны паза чааӌыларны хумартхылап, пір минута сым турғаннар.
«2017 чылда піс А.Н.Губанковнаң хада «Сибер ил» форумда «Ах чарых Анна» фестиваль иртірерге пӧгінгебіс, - узаратхан чооғын Светлана Анатольевна. - пу сағысты чуртасха хайди даа кирерге кирек, фестиваль Хакасиядағы киноискусствоны тилідерге полызар. Ізенчем, «Кирек Хакасияда полча» марығның лауреаттарының тоғыстары фестивальның афишазына кірер».
Кӧзідіг «Хакасфильм» киностудия суурған фильмнең пасталған. Грант ахчазына авторлар Юрий Курочка паза Марина Канадакова Хакасияның чир-чайаанына чарыдылған тоғыс тимнебіскеннер. Олар республиканың чапсых орыннарын, аң-хустарын кӧзіт пирерге кӱстенгеннер. Сценарист Марина Канадакованың таниинаң, ӧнетін аппаратура чох тоғынарға сидік, іди дее полза, Юрий Курочка олаңай цифровой камераа абаны, пӱӱрлерні, сыынны, силейні, сас ӧртекті, турнаны паза пасха даа аң-хусты суурып аларға оңдай тапхан. Итсе, ах киикті Юрий Викторович най ырахтын сууртыр, аннаңар авторлар чоохтабаан ползалар, пу туйғахтығ аңны кӧрігӌілер пір дее танып полбасчыхтар.
Чиит устар Михаил Мерзликин паза Дмитрий Паршин «РТС» телерадиокомпанияда істенчелер. Олар тимнеен тоғыс «Хакасия - Худай чирі» адалча.
Мында чоох ызых чирлердеңер парча. Фильмні суурып, авторлар Оңно тағларында, Республиканың тигір алтындағы азых музейлерінде пол килгеннер. Таныхтирға кирек, Хакасияның ызых чирлеріне чарыдылған тоғыстар телевидениеде удаа сыхчалар. Чиит чайаачыларның фильмнері нименең пасхалалча? Михаил Мерзликиннең Дмитрий Паршин кӧрігӌілерге пу чирлерде орта тудынарға, оларны хайраллирға кирек тіп сағысты читір пирерге кӱстенгеннер.
Узінӌі фильмнің авторлары Карим Тугужеков паза Алексей Бойченко полчалар, че оларның тоғыстарын чыылған чон кӧр полбаан. Чиит режиссерлар кинонаң ӱр ниместең айғасчалар, аннаңар оларға «Ибзер чол» фильмні читіре тимнебізерге тус читпин партыр. Фильмнің ӱзігін не кӧзіт пиргеннер. тоғыстарынзар чайаачылар мультипликацияны кирібіскеннер. Ол саринаң «Ибзер чол» фильм Роберт Земекистің «Кто подставил кролика Роджера» кинозына тӧӧй полтыр.
«Читіген» театр уғаа чапсых фильм суурыбысхан. «Акиннің кӱмӱс кірезі» драмада кирек чӱс чыл мының алнында парча. Ікі хакас чааӌы, Тилекей чаадаң айланчадып, тайғада кічіг паланы таап алча. Фильмнің режиссёрлары Антон Литвиненко паза Артас Канзычаков полчалар, сценарийні Алексей Сагатаев пасхан. Ӧӧн рольларны Максим Султрековнаң Алексей Сагатаев толдырғаннар. Прай тоғыстарнаң Виталий Канзычаков устаан. «Акиннің кӱмӱс кірезі» драма хакас тілінең турғызылған, че титрлер орыс тілінең пазылған. «Читіген» театрның ойыннарын «Айланыс» ӧменің кӧглері сыбыра чазапча, пу фильмні, тізең, чайаачы устар музыка чох суурыбыстырлар. Анзы кӧрігӌілерні тың чапсытхан. «Акиннің кӱмӱс кірезі» улуғ нимес фильм, че 40 минута аразына авторлар кӧп ағырсымнығ сурығлар кӧдірерге маңнанчалар.
Прай суурылған фильмнер киноға хынчатхан улустың кӧңніне кірген. Культура министрі Светлана Окольникованың чооғынаң, авторларның аймах сурығларға хайығ айландырчатханы ӧріндірче. Хакасияның чайаачылары тӱзімніг тоғыныбысханнар, аннаңар «Кирек Хакасияда полча» Республика марии хайди даа иртірілер, «#PROKино.Регион 19» проект тее мыннаң мындар тоғынар. Пістіңнер суурған фильмнерні Хакасияның чуртағӌыларына 2017 чылның пастағы айларында кӧзідерге пӧгінчелер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде