ХАДА ТОҒЫНЧАТХАН АРҒЫСТАРЫБЫС ӰЧӰН ӦРІНЧЕБІС
17.01.2017
Хабарлар
РОССИЯНЫҢ ПЕЧАТЬ КӰНІНДЕ, 13 ЯНВАРЬДА, РОССИЯНЫҢ ХАБАРӋЫЛАР ПІРІГІЗІНІҢ ХАКАС РЕСПУБЛИКАДАҒЫ ПӦЛИИНІҢ КНЕЗІ ОЛЬГА ШИРКОВЕЦ 2016 ЧЫЛНЫҢ ИҢ АРТЫХ ГАЗЕТА ТОҒЫНӋЫЛАРЫН ЧЕЕСТЕЕН. АЛҒЫСТАС ПІЧИИНЕ «ХАБАР» ГАЗЕТАНЫҢ ӰР ТОҒЫН САЛҒАН ИҢ ТУРЫСТЫҒ ІКІ ТОҒЫНӋЫЗЫ ТУРЫСХАН: ХАКАСИЯ КУЛЬТУРАЗЫНЫҢ САБЛЫҒ ТОҒЫНӋЫЗЫ, ПИСАТЕЛЬ, ХАБАРӋЫ АНАТОЛИЙ СУЛТРЕКОВ ПАЗА КОМПЬЮТЕР ПӦЛИИНІҢ ТОҒЫНӋЫЗЫ НАДЕЖДА СУБРАКОВА. «ХАКАСИЯ» ГАЗЕТА РЕДАКЦИЯЗЫНАҢ АЛҒЫСТАС ПІЧИИНЕ ӦӦН РЕДАКТОРНЫҢ ОРЫНӋЫЗЫ АЛЕКСАНДР ДУБРОВИН ТУРЫСХАН. ОЛ ГАЗЕТАДА СПОРТ ТЕМАЗЫН АЛҒЫМ ЧАРЫТЧА.
Надежда Субракова редакцияда 30 азыра чыл істен парир. Пу тусха редакцияның, Хакасия правительствозының сыйыхтарына nip ле хати турыспаан. Писатель Анатолий Султреков студент тузындох хакас редакциязында тоғынарын пілген. Хайди ол чоохтапча, «Ленин чолы» газетазар ол 2-ӌі курстаң сығара улуғ нимес статьялар пазып пастаан. Пастап олар студенттер чуртазынаңар полғаннар, соонаң, тізең, литература страницазынзар чоохтар даа пазыбысчаң.
- Институт тоозып, диплом алғанда, редакциязар тоғысха кірібіскем. Мында мин прайзынаң даа таныс полғам, аннаңар ибде ле чіли истіг тудынӌаңмын, - сағысха кирче Анатолий Егорович.
Ол туста редакцияда улуғ опыттығ хабарӌылар тоғынғаннар. Чиит хабарӌаа оларның холларында узын таптирға чахсы оңдай полған. Амды Анатолий Султреков олардаңар чылығ сӧстер ле чоохтирға тимде.
- Иң пастап мин Алексей Егорович Толмашовтың холына кіргем. Ідӧк мағаа Фадей Яковлевич Иптышев, Пётр Иванович Тодышев, Илья Николаевич Бурнаков, Моисей Романович Баинов, Михаил Николаевич Чебодаев, Каркей Трофимович Нербышев паза даа пасха хабарӌыларнаң паза писательлернең хада тоғынарға ӱлӱс тӱскен. Ол тустаң сығара газетада орыс сӧстері хызырылып пастаан, имнег, ӱгредіг, право хайраллир сӧстерні прай хакас тіліне тілбестеӌеңміс, телевидение программазы даа хакас тілінең сыхчаң, - сағысха кирче Хакасия культуразының саблығ тоғынӌызы.
Редакциязар наа ла тоғынарға килген хабарҷылар, устарын таптап алар ӱчӱн, редакцияның полған на пӧлиинде тоғынарға кирек полғаннар: экономика, ӱгредіг, право хайраллир, аал хонии паза даа пасхазы. Че, хайди чоохтапча Анатолий Егорович, иң пастап олар пічіктер пӧлиинде тоғынарға турғызылӌаңнар. Ол туста пу пӧлік иң сидік пӧлікке саналӌаң. Анда сыдас парыбысхан чиит хабарӌы редакцияда тоғын полар тіп саналӌаң.
Анатолий Султреков редакцияда 1977 чылдаң тоғынча. Аның тиксі стажы 40 чылға чағын. Ол, 1982 чылда редакцияның 12 № кабинедін ээленіп, андағы стол кистінде ам даа одыр парир. Іди редакцияның пу кабинедінде ле ол 35 чыл істен парир. 1980 чыллардаң ала Анатолий Султреков Хакасия чииттерінің чуртазын чарыдып пастаан. Ол туста чииттернің аразында спорт марығлары кӧп иртчең. Іди хабарӌы тоғыс хоостыра спорт сурығларын чарыт сыххан. Спорт хабарларын писатель «Хабар» газетада ам даа чарытча. Пу тема ағаа иң чағын.
Россияның Писательлер пірігізінің кізізі Анатолий Султреков 22 книга чарыхха сығар салған. Тиктең нимес, неке, книгаларының 7-зі спортха чарыдылған паза 9-зы Хакас чирінің саблығ кізілерінеңер пазылған. Паарсах чӱректіг, ачых-чарых кӧңніліг, ӱгредігліг чоохтығ писатель чонда улуғ аарласта.
«Хабар» газетаның ӧмезі арғыстарыбысты алғыстас пічиине турысханынаң алғыстапча.
СӦС СОО: Піске, «Хабар» газетаның чиит тоғынҷыларына, саблығ писатель, улуғ опыттығ хабарҷыларнаң хада тоғынчатханы поғдархастығ. Редакцияда минің паза Анатолий Султрековтың кабинеттерібіс хости, аннаңар, хонҷых полып, кӧп ниме сизінерге килісче. Іди иртеннең Анатолий Султрековтың кабинедінде кізілер пірдее ӱзілбинче. Редакциязар килген кiзi, андар кірбин, нанминча полар. Полған на аалҷыны улуғлап, аарлап, Анатолий Егорович чоох алысча паза ӱр чоохтасча. Анатолий Султреков тоғыс хоостыра пірее чирзер парыбысса, мин, хости кабинетте одырчатхан кізі, аның «хачызы» полчам тиирге чарир. Анатолий Егоровичнең тоғазарға килген кізее мағаа хонҷығым тоғыс хоостыра парыбысхан, тӱрчедең килер тіп чоохтирға килісче. 4 чыл хости кабинетте тоғынып, таңнапчам, Анатолий Султреков материалларын паза книгаларын хаӌан пазарға маңнанча полҷаң!
Ідӧк кӧп чылығ сӧстер чоохтирға чарир Надежда Николаевна Субраковадаңар. Тоғызына саңай тӱгеде пирін салған ӧӧребіс аарластығ сыйыхха турыстығ кізі.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы