"ХЫСХЫЛЫХ" СЫЙЫХ КЕМГЕ ЫРЫС АҒЫЛДЫ?
01.02.2017
Хабарлар
Ағбанда С.П.Кадышевтің адынаң культура кінінде 29 январьда «Хысхылых-2016» музыка сыйииның концерт-презентациязы ирткен. Аны Хакасияның композиторлар пірігізі республиканың культура министерствозы полызиинаң тимнеен.
«Хысхылых» сыйых республиканың музыка культуразына улуғ хозым иткен ӱчӱн читірілче. Артыхтарның артыхтарын Хакасияның композиторлар пірігізінің правлениезі таллапча. 2015 чылда композиторларны ла чеестеен ползалар, пӱӱл сыйыхнаң ідӧк ырҷылар, поэттер, аранжировщиктер таныхталғаннар. Номинациялар саны даа ӧс парған. Пастап аарлығ сыйых 7 чайаачы усха читірілҷең, амды, тізең, 10 кізее.
Концертті Андрей Штарк устапчатхан Ағбанның ӱбӱрҷең оркестрі асхан. Музыканттар композитор Оксана Алахтаеваның «Тірілген пічіктер» композициязын толдыр пиргеннер. Кӧрігҷілер чалахай музыкаа паза музыканттарның устарына аптатханнар. Анаң сценаа Хакасияның чон артизі Герман Танбаев сыххан. Ол «Хам» сарынны толдырған, кӧгні оркестр ойнаан. Таныхтирға кирек, Ағбанның ӱбӱрҷең оркестрі чуртағҷыларның иң хынчатхан чайаачы ӧмелерінің санына кірче. Музыканттар кӧрігҷілерні хынығ ойыннарынаң сыбыра хайхатчалар. Ағбанның 85 чылына олар «Тилекейнің иң чахсы городы» концерт программазын тимнебіскеннер.
Пу программа оркестрге «Иң артых музыка проекті» номинацияда утып аларға полысхан. «Хысхылых» сыйыхты чайаачы ӧмее республиканың культура министрінің орынҷызы Лариса Киштеева читірген.
Хакасияның чон артизі Клара СУНЧУГАШЕВА Александр КОБЕЖИКОВХА сыйых читірче
Анаң кӧрігҷілерні чайаачызынаң Ӱс чул аалдағы «Солбан» ӧмезі ӧріндірген. Ансамбльның араласчылары «Хыныс сілии» паза «Тӧӧ чирім» сарыннарны толдыр пиргеннер. Ырларның авторы ансамбльның устағҷызы Альфред Бурнаков полча. Хакас кӧрігҷілері аның чайаачызынаң чахсы таныс. Пӱӱл Альфред Леонидович Хакасияның композиторлар пірігізінзер алылған. Концерт тузында ағаа билет пирілген. А.Л.Бурнаковнаң хада пірігістің кізілері Ирина Тугужекова, Татьяна Маслова паза Снежана Мицукова полыбысханнар.
«Хор музыказы» номинацияда лауреат атха Оксана Алахтаева турысхан. Ол ученай Н.Ф.Катанов чыған кип-чоохтар хоостыра «Хамның сӧзі» чайаачы тоғыс пас салған. Аны «Лира» олған хоры тӧреміл толдырча. Композиторны таныхтирға сценазар РТС телекомпанияның ӧӧн директоры Сергей Сипкин сыххан.
«Чылның ыры» номинацияның чиңісчізін, композитор Юрий Киштеевті, культура министерствозының амғы искусство пӧлиинің пастығы Валентина Лебедева адаан. Юрий Егоровичтің «Худай чирі» сарыны Хакасияны саблапча. Аны музыка узы Альбина Курбижекованың кибелізі хоостыра чайаптыр. Сарынны Александр Кобежиков, Герман Танбаев, Алексей Казыгашев паза Юрий Киштеев толдырған.
«Чылның поэді» номинацияда лауреат атха саблығ писатель паза поэт Валентина Татарова турысхан. Хомзынысха, Валентина Кирилловна, тоғыста маң чохтанып, концертке кил полбиндыр.
«Фольклор музыказы» номинацияның чиңісчізі «Ӱлгер» ансамбльның устағҷызы Вячеслав Кученов полыбысхан. «Алтын Кӧӧк» хай-балетке ол хайхастығ музыка пас салған.
«Хысхылых» сыйыхты хайҷыға Хакасияның чон артизі, саблығ ырҷы Клара Сунчугашева читірген. «Улгер» ӧме кӧрігҷілерге хызылларның паза хой-балларның ырларын сарнап пирген.
«Чылның ырҷызы» номинацияның лауреадын ӧӧн сыйыхнаң ідӧк Клара Ефимовна таныхтаан. Пу номинацияда «Хайҷы» студияның солизі Александр Кобежиков чиңіс тутхан. Концертке килген кізілер, хынчатхан ырҷының ӱчӱн ӧрініп, матап айа сапханнар. Александр Кобежиков «Сарығ тууп маймаам» тахпахты толдырыбысханда, пір кӧрігҷі ағаа «Син прайзынаң артыхсың!» хысхырған.
«Инструментальнай музыка» номинацияда лауреатты адирға сценаа «Хабар» газетаның ӧӧн редакторы Радион Сунчугашев сыххан. Ол «Хысхылых» сыйыхты композитор Анатолий Стояновха читірерге кирек полған. Че Анатолий Константинович ағырыбысхан сылтаанда, аның орнына сыйыхты Хакасияның композиторлар пірігізінің кнезі Герман Танбаев алған.
«Чыл аранжировщигі» пӧзік лауреат атха Дмитрий Ковалев турысхан. Таныхтирға кирек, композиторлар паза музыканттар аранжировщиктерні пӧзік паалапчалар. Кӱстіг специалист пасхан музыканы чахсыландырыбызарға оңдайлығ.
«Вокал музыказы» номинацияда сыйых Анатолий Токмашовха читірілерге кирек полған. Че пӱӱл 23 январьда композитор паза музыкант ах чарыхтаң парыбысхан. Анатолий Иннокентьевич 300 аймах чайаачы тоғыс пас салған, оларның санында «Аал кӧглері» музыка драмазы, «Харындастар-аңҷылар» опера-водевиль. Чарыхха А.И.Токмашов 7 чыынды сығарыбысхан. Хакас чонның саблығ оолғын сағысха киріп, чайаачы устар паза кӧрігҷілер пір минута сым турғаннар. Хакасияның композиторлар пірігізінің чарадии хоостыра «Вокал музыказы» номинация Анатолий Токмашовтың адын ал чӧрер.
Халғанҷызын «Чыл тании» номинацияның чиңісчілерін чеестееннер. Чоохтирға кирек, 2016 чылда ырҷылар, композиторлар паза музыканттар кӧрігҷілерні аймах концерттернең, ойыннарнаң паза проекттернең ӧріндірерге кӱстенгеннер. Че иң улуғ сыйых чуртағҷыларға В.Г.Чаптыковтың адынаң Хакас филармониязы ит пирген. Аның ӧмезі композитор А.А.Кенельнің «Чанар Хус» операзын хатап турғызыбысхан. Премьера 2016 чылда 15 декабрьда ирткен. Ӧӧн сыйых Хакас филармониязының директоры Вячеслав Инкижековха читірілген.
«Хысхылых» музыка сыйииның концерт-презентациязы уғаа чахсы ирткен, кізілер чалахай кӧңніліг ибзер нанғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде