УЛУҒ ЧАСТЫҒЛАРҒА НАА ПӦЛІК АЗЫЛАР
03.02.2017
Хабарлар
Пансионат устағҷызы В.ЗЛАКАЗОВ Н.МАКСИМОВАНЫ наа пӧлікнең таныстырча.
Пу кӱннерде Хазна Думазының депутады Надежда Максимова паза Хакасия пазының социальнай сурығларҷа орынҷызы Ирина Смолина Ағбандағы ветераннар пансионадында пол килгеннер. Олар улуғ частығларға кӧрілген ікінҷі пӧлік азыларына тимненіс хайди парчатханын кӧргеннер. Мында тӧреміл хайығ кирексіпчеткен пенсионерлерге чуртаҷаң оңдай пирілер.
Пансионаттың наа пӧлиинде ікі паза ӱс кізі чуртир комнаталар пар. Улуғ частығ кізілернің хазиин тӧреміл хайығда тудар пӧгіннең мында имнег посты, процедуралар иртірҷең кабинет, санитарнай комната тоғынар. Ідӧк мында буфет паза столовай полары кӧріл парған.
- Пу пӧлік уғаа кирек. Пастағы пӧлік азылғаннаң ікі чыл ирт парды. Анда пӱӱнгі кӱнде кізілер чуртапчалар. Наа пӧлік 30 орынға кӧріл парған. Ідӧк ӱзінҷі пӧлікте тыхтағ тоғызы парча. Аны азарын сӧӧ тартпасха кирекпіс, - теен Хакасияның социальнай арачыланыс министрі Наталья Карамашева.
Ветераннар пансионадының ікінҷі пӧлииндегі тыхтағ тоғыстарына ахча республика бюджедінең, Хакасияҷа ПФР пӧлиинең позыдылған. Ідӧк 5 миллионҷа салковай бюджеттегі нимес ахчанаң хорадылған.
- Хакасияның улуғ частығларға полызығ пирҷең программалары тоғынчалар. Оларға ахча позыдылча. Мында бюджет ахчазы орта хорадылчатханын таныхтирға кирек. Ол тоғысты хайди піліп апарарының чахсы кӧзідии полча, - теен Надежда Максимова. Ідӧк ол учреждение тоғынҷылары улуғ кізілерзер паарсаснаң хайчатханын таныхтаан.
Автор :
Кристина КУЧМЕНКО
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде