ТУРАЛАР ИБІРКІЗІН ЧАХСЫЛАНДЫРАРЫ - ЭЭЛЕРІНІҢ КӦҢНІНЕҢ
03.02.2017
Хабарлар
1 февральда «Хакасия» газетаның пресс-центрінде «Городта истіг оңдайлар тӧстирі» наа программаның чуртасха кирілҷең оңдайлары чарыдылған. Аннаңар чоохтааннар паза хабарҷыларның сурығларына нандырғаннар Хакасияның пӱдіріг паза ЖКХ министрі Сергей Можаров, проекттің координаторы, Хакасияның Ӧӧркі Чӧбінің депутады Виктор Лебедев, Халых чон фронтының региондағы штабының кізізі Александр Минин паза «Единая Россия» партияның региондағы исполком устағҷызы Игорь Мамонтов.
Устағҷыларның чооғынаң, программа пӱӱл ле чуртасха киріліп пастапча. Аның ӧӧн сағызы - кӧп квартиралығ тураларның дворларын иптирі: асфальт тӧзирі, олған площадкаларын, одырчыхтар паза сӧп-сап тастаҷаң орыннар турғызары, чарытхы тартары. Прай ол тоғысха ахча кӧріл парған. Пу программаны 2017 чылда чуртасха кирерге федеральнай бюджетте 20 миллиард салковай кӧрілче, ол санда пістің республикаа - 110 миллион салковай, республика, ол ахчаны алар ӱчӱн, позының бюджедінде 17 миллионға чағын салковай кӧр салған.
Программада хайди даа араласчалар регионның ӧӧн городы паза моногородтар. Андағ оңдайнаң Хакасияда программаа прай городтар кирілче: Ағбан, Абаза, Сорығ, Саяногорск, Харатас, ідӧк Тӧӧ пазы паза Тойым. Пасха муниципалитеттерге мындағ кирексіністер турғызылған: иң пастағызын, анда 1000 азыра чуртағҷы саналарға кирек, ікінҷізін, анда кӧп квартиралығ туралар поларға кирек. Ӧӧн кирексініс - читкіҷе бюджет ахчазы.
- Таныхтирға кирек, программа чуртағҷыларның «Единая Россия» партиязар айланыстарынаң тимнелген, - чарытхан проекттің координаторы Виктор Лебедев.
- Пӱӱнгі кӱнде кӧп квартиралығ тураларның прай ла ээлері дворны иптиріне сыданминча, аннаңар оларның илеедезін нааҷылирына улуғ тоғыс киректелче. Алында партияның пасха проекттері чуртасха кирілгеннер: «Олған площадказы», «Кічіг киректер» паза даа пасхазы. Оларның піреезінҷе дворларда хайдағ-да тоғыстар иділгенӧк.
Піс пу проектсер чуртағҷыларның хайиин тартарға сағынчабыс. Программада улуғ хайығ чуртағҷыларның кӧңнілеріне айландырылча. Иң пастағызын, дворны иптирінеңер чуртағҷылар сағыссырирға кирек. Город устағ-пастаа нимес, устапчатхан компания нимес, чуртағҷы пӧкче - ниме кирек турғызарға, тыхтирға, кирек пе одырчыхтар, хайдағ ол поларға кирек паза даа пасха сурығларны.
Хакасияның пӱдіріг паза ЖКХ министрі Сергей Можаровтың таниинаң, программада аралазарға сағынчатхан муниципалитетке, республика программазына тӧстеніп, позының программазын тимнебізерге кирек. Пӱӱнгі кӱнге программаның ӧӧн кирексіністері кӧріл парған, ол санда хайдағ оңдайнаң ахча ӱлестірілері. Че хайдағ город хай син ахча пу программаҷа алары пілдістіг полар, хаҷан муниципалитеттер программалары алыл парар. Ол ідӧк муниципалитет бюджедінең палғалыстығ нооза.
Хайди программа чуртасха кирілер? Февральда республика Россияның пӱдіріг министерствозынзар пу программада аралазар сурыныснаң айланар, мартта чӧптезіглер иділер. Майда, тізең, пастағы проекттерҷе садығлар пасталар.
Программа пис чылға, 2022 чылға теере, алыл парған, аннаңар ағаа пӱӱл кірерге маңнанмааннарға хомзынарға кирек чоғыл, пазағы чылда кӱстенерге кирек. Хайди ӱстӱнде таныхталған, киректі чуртағҷылар кӧңнінең пастирлар, аннаңар ӧткін нимес чуртағҷыларның дворлары нааҷылалбин тур халарға айабас. Сағынчам, полған на кӧп квартиралығ турада ӧткін чуртағҷы пар, хайзы тураның ӱлӱзінеңер тӧреміл сағыссырапча, піреезінде, тізең, старосталар пар, хайзылары устапчатхан компанияларнаң палғалыс тутчалар. Ол кізілерге чуртағҷыларны чыырға, двордағы тоғыстарны, аны иптирін хада-пірге ӱзӱріп, чарадығ аларға, анаң муниципалитет устағ-пастаанзар алған чарадығны читірерге кирек.
Программаның чуртасха кирілчеткені хатығ сыныхтағда тудылар. Полған на муниципалитетте паза регионда ӧнетін комиссиялар тӧстелер, хайдар чуртағҷылар, халых пірігістерінің, партияның паза ӱлгӱлернің кізілері кирілер. «Единая Россия» партия, проекттің пастағҷызы полып, ідӧк аның чуртасха кирілчеткенін тӧреміл хайығда тудар.
Программадаңар толдыра искіріг Россияның пӱдіріг министерствозының сайтында (www.minstroyrf.ru) «Ӧӧн проекттер» пӧліктің «ЖКХ паза город оңдайлары» чардығында пирілче. Пу программа хоостыра ідӧк 250 муңа теере чуртағҷылығ городтарда парктарны паза скверлерні иптирі кӧрілче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде