ИСКУССТВОНЫҢ ХАЙХАСТЫҒ КӰЗІ
03.02.2017
Хабарлар
Ағбанда С.П.Кадышевтің адынаң культура кінінде Хакасияның чайаачы устарының ікі кӧзідии иртче. Олар Экология чылына чарыдылғаннар.
Пастағы кӧзідіг «Искусствоның хайхастығ кӱзі» адалча. Мында декоративно-прикладной искусствоның устары араласчалар. Иң пурун кӧрігҷілернің хайиин ойнаҷахтарның аймағы тартча. Кӧклӧҷектер, абаҷахтар, питугастар чапсытчалар паза кізі кӧңнін кӧдірчелер.
Екатерина Фирсованың «Худағай» кӧклӧзі поғда кӧрінче. Чиит ипчі ойнаҷахха турыстыра кип-азах тік пиртір. Уғаа сіліг кӧклӧҷектер Валентина Ултургашева чайапча. Аның тоғыстарын кізілер сыйыхха аларға хынадырлар. Валентина Терентьевна фабрикада кӧп чыллар технолог полып істенген. полған на кӧклӧзін ол аймах-пасха кӧгенекнең чазап салча. Ирина Мишарова - кӧзідіглернің иң ӧткін араласчыларының пірсі. полған на кӧзідіге ол, нымзах ойнаҷахтар тимнеп, наа тоғыстар сығарарға кӱстенче. Амды Ирина Владимировна абаҷахтар чайап салтыр. Ідӧк хоосчы Зульфия Тодыкова иткен хойыҷахты таныхтирға кирек. пу ойнаҷах тіріге ле тӧӧй, амох маарабысхадағ.
Ипчілерні кӧзідіге сығарылған поғолар паза чазанҷыхтар ӧріндірерлер, неке. полған на ус оларны пос оңдайнаң чайапча. Людмила Чаптыкова поғоларны хакас чонның кибірлеріне тӧстеніп идерге кӱстенчеттір. Специалисттер аның тоғыстарын пӧзік паалапчалар. Зульфия Топоеваның поғолары пасха, оларнаң харах ал полбассың. Харатаста чуртапчатхан Наталья Опатованың чазанҷыхтары абахайларның кӧңніне кірерге кирек. Нинҷідең паза монҷыхтардаң чайалған тоғыстар хайдағ даа ипчіні чазирлар.
Панноларны кӧзідіглерде удаа кӧрерге килісче. Устар оларны ӧӧнінде киистең алай истең итчелер, че Софья Шалгинова-Асочакова панноларын ағастаң паза тӱлгӱ теерізінең тимнебістір. Софья Анатольевнаның наа тоғыстары кізінің хайиин тартча паза хайхатча.
Ікінҷі кӧзідии Саяногорсктың чуртағҷызы Илья Богомоловтың сомнарынаң пӱткен. Чоохтирға кирек, Илья Карпеевичке амды 75 час, ол 40 чыл сомға суурча. С.П.Кадышевтің адынаң культура кінінің ӧӧн методизі Клара Карамашеваның таниинаң, кӧзідіге И.К.Богомолов 90-ға чағын тоғыс ағыл килген. Че, орын асхынах полып, тоғынҷылар 60 на сом таллап алғаннар. Оларның кӧбізі Хакасия чир-чайаанының сілиин саблапча. Мында Саяногорск хыриндағы чазыларны, Сойан тағларын, Ким суғны, кӱн чахайахтарын кӧрерге чарир.
Пос туста сомҷы фрукт ағастарынаң айғазарға хынадыр, Илья Карпеевичтің садында 28 кӧрім черешня паза 25 кӧрім виноград ӧсче. Оларны чайаачы ус ідӧк сомға суурып алтыр. «Гладенькая» курортта ирткен саналығ чыларынҷа Россияның чемпионадына чарыдылған онҷа тоғыс пар. Спортсменнер марыға тимненчеткенін сомҷы чахсы кӧзіт пирген. Илья Богомоловтың сомнары таңнатчалар, аннаңар оларны пос хараанаң кӧріп аларға кирек.
Экология чылына чарыдылған кӧзідіглер 22 февральға теере тоғынарлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде