МЕЧЕТЬ ПӰДІРИИ ӰЗӰРІЛГЕН
07.02.2017
Хабарлар
Пӱӱл январьда Хакасияның правительствозынзар «Махалля» ислам религия пірігізінің имамы Дилмурад Хушваков айланыс ысхан. Ол, Ағбанда мечетьті пӱдірер сурығны ӱзӱрер ӱчӱн, Хакасия пазы Виктор Зиминнең тоғазарға сурынған. Че ол тоғазығ Д.Хушваков Россиядаң хырығ озаринзар парыбысхан сылтаанда полбаан. Аннаңар 30 январьда Хакасия пазының орынҷызы Владимир Крафт чыылығ иртірген.
Анда «Махалля» религия организациязының кізізі Икром Умаров, Хакасияның национальнай паза территориальнай политика министрі Дмитрий Тодышев, Ағбан администрациязының город пӱдірии, архитектура паза чирнең тузаланҷаң департаментінің ӧӧн архитекторы Светлана Крылова, Ағбанның «Городская правовая служба «Кодекс» МКУ-ның директоры Ольга Гасан араласханнар.
2011 чылда Ағбанның администрациязы паза «Махалля» религия организациязы чӧптезіг ит салғаннар. Аны хоостыра Торосов орамазында мечеть пӱдіреріне чир участогы тузаланысха тикке пирілген. 2012 чылның декабрь айында Ағбан городтың администрациязы мечетьті пӱдірерге чарадығ пирген. «Махалля» религия организациязы, проект тимнеп, подрядчик таап, пӱдіріг тоғызын пастаан (котлован хазылған, фундамент салылған).
2014 чылның март айында город администрациязы чарадиинаң мечеть пӱдірии тохтадылған. Хакасияның региондағы тиліс министерствозы сыныхтағлар иртіргенде, анда пӱдіріг тоғыстарынаңар законодательство сайбалчатханы ілезіне сығарылған, ол сайбағларны тӱзедердеңер чарадығ алылған.
Аның соонаң «Махалля» религия пірігізі Ағбанның администрациязынзар мечетьті пӱдірерге чарадығ пирердеңер сурыныснаң айланған. Че чир участогынаң тикке тузаланар тус ирт парған сылтаанда, ідӧк анда пӱдіріл парып санға алылған объект чохта, город администрациязы чарадығ пирбинче. Аннаңар город администрациязы паза религия пірігізі чарғылазып пастааннар. Чарғыда ӱзӱріглер ам даа узарадылча.
Владимир Крафт, мечеть пӱдіриинде сидіксіністер сығыс килгеніне сағыссыразын кӧзідіп, религия организациязына паза город администрациязына талазығлығ сурығларны, законны сайбабин, чарғы пастыра ла пӧгерге чарир тіп таныхтаан. Пу сурығны пӧгері орындағы пос устаныс органының полномочиезіне кірче, пасхаларына чарғы органнарының чарадығларына теелерге чарадылбинча.
Чир участогында читіре пӱдірілбеен объект парына (чоғылына) сыныхтағлар иртірілче. Экспертиза чарадии 2017 чылның 31 мартына теере чарғыда кӧзіділерге кирек.
Автор :
Светлана АСТАНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде