"ЕДИНАЯ РОССИЯ" НАА ПРОЕКТТЕРӀН ЧУРТАСХА КИРЕР
07.02.2017
Хабарлар
Ирткен неделяда «Единая Россия» партияның Хакасиядағы пӧлиинің хачызы Сергей Комаров, хабарҷыларнаң тоғазып, партияның 21-22 январьда Москвада ирткен XVI съездінің салтарларынаңар чоохтап пирген. Пресс-конференцияда ідӧк партияның Хакасиядағы пӧлии хачызының пастағы орынҷызы Светлана Могилина паза региондағы толдырығ комитедінің устағҷызы Игорь Мамонтов араласханнар.
«Единая Россияның» XVI съездіне Хакасиядаң алты кізі чӧртір: Сергей Комаров - партияның региондағы пӧлиинің хачызы, Ӧӧркі Чӧп кнезінің орынҷызы; Юрий Шпигальских - региондағы пӧлии хачызының халых пірігістерінең паза чиит улуснаң тоғынарынҷа орынҷызы, Ӧӧркі Чӧп кнезінің пастағы орынҷызы; Игорь Мамонтов - региондағы толдырығ комитедінің устағҷызы; Евгений Мамаев - Ағбан городтың депутаттар чӧбінің депутады, идінҷек; Наталья Кокорева - Таштып аймааның чон театрының режиссеры; Алиса Боргоякова -Ӱс чулдағы школаның директор орынҷызы.
Сергей Комаровтың искіриинең, съездтің пастағы кӱнінде читі ӱзӱріг площадказы тоғынған. Хакасия делегациязының кізілері оларның тоғызында ӧткін араласханнар.
- Ол площадкаларда хазна тилізінің стратегиязы тимнелген, прай кӧстеглерҷе паза пастағларҷа хайдағ тоғыс апарылары ӱзӱрілген, - таныхтаан Сергей Комаров. - Партияның хайдағ проекттерін узарадардаңар паза хайдағларын наа ла чуртасха кирердеңер чарадығлар алылған.
Наа проекттернің санында «Городта истіг оңдайлар тӧстирі» (аны чуртасха киреріне федеральнай бюджеттең тиксі 20 миллиард салковай позыдылар), «Кічіг городтарның парктары» (250 муңа теере чуртағҷылығ городтарда парктарны иптирі), «Орындағы культура туразы» (аалдағы культура тураларын паза 50 муңа теере чуртағҷылығ городтарда культура тураларын тыхтиры) паза «Кічіг городтарның театрлары» (тӧреміл тоғынчатхан провинция театрларына хабазары) адалғаннар.
Съездтің делегаттары ідӧк партия уставы хоостыра «Единая Россия» партияның кнезін, устапчатхан паза ӧӧн органнарын тапханнар. Партияның кнезіне хати Дмитрий Медведев табылған. Партияның Ӧӧркі Чӧбінің кнезіне Борис Грызловты таап салғаннар. Ӧӧркі Чӧптің бюрозынзар 19 кізі кірче, оларның аразында Федерация Чӧбінің кнезі Валентина Матвиенко, Хазна Думазының кнезі Вячеслав Володин, «Единая Россия» фракцияның устағҷызы Владимир
Васильев, нинҷе-де губернатор паза нинҷе-де министр.
Партияның Ӧӧркі Чӧбінзер 170 кізі табылған. Оларның санында Хакасия делегациязының кізізі, Ӱс чулдағы ортымах школа директорының орынҷызы Алиса Боргоякова. Ол ідӧк «Единая Россияның» Илимор аалдағы пӧлиинің хачызы полча, сентябрьда ирткен табығларның салтарларынҷа аның пӧлии иң чахсы кӧзідіглерге читтір.
Светлана Могилина хабарҷылардаң партияның тоғызын ӧткін арах чарыт турарға сурынған. Чонның кӧбізі чуртасха кирілчеткен программаларның, ол санда Хакасияда, пастағҷызы «Единая Россия» полчатханын пілбинче тіп хомзынған ол. Республикадағы СМИ-ларнаң палғалысты тыыдар кӧстегнең «Единая Россияның» Хакасиядағы пӧлии чорыхтығ чыылығлар иртір турарға, город-аймахтардағы чоннаң тоғас турарға пӧгінче. Ол оңдайнаң хабарҷыларның даа партияның тоғызына хайии тартылар тіп ізенізін читірген партияның региондағы пӧлиинің устағ-пастаа.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде