ААЛ ХОНИИНАҢ САЛТАРЛАР САҒЫПЧАБЫС
07.02.2017
Хабарлар
Республикада читкіҷе тимнелген азых аал хониина хысхыны тӱзімніг хыстап парыбызарға паза чайғы тоғыстарына тимненерге полысча. Аннаңар искірген республиканың аал хонии паза ас-тамах министрі Игорь Гердт Хакасияның пазы Виктор Зиминнең тоғазығда. Ідӧк пӱӱл аал хониин тилідеріне теелчеткен сурығлар ӱзӱрілген.
- Хыстағ чахсы иртче, уламох пӱӱл малларны чазаа сығарарға килістіре кӱннер турчатханда. Ағбан пилтірі, Шира паза Боград аймахтарында, хайда иң кӧп азых тимнелген, азых чыындызы тӧстелген, - таныхтаан Игорь Гердт. - Пӱӱнгі кӱнде 37 муң ат саналча, 185 муң пас мал. Піс Хакасияда иң арығ ит сығарылчатханына поғдархапчабыс, олох туста республикада пір килограмм мал паза хой иттеріне Сибирьдегі федеральнай округта иң ниик паа таныхталча.
Министр таарығ тузына тимненіс парчатханнаңар чоохтаан. Тӧрт чыл аразына тамах хурутчаң комплекстер нааҷылалған сылтаанда 16 муң тонна ӱрен тимнелген. Халғанҷы чыллар аразына Хакасияда пастағызын на элитнай ӱреннер сығарарынҷа тоғыс пасталча. Гердттің сӧстерінең, ӧӧні - Хакасияның фермерлері паза килкім хоныхтары, тамахты чахсы алып алар, ідӧк чирні ӧсчеткен тӧлге хайраллир ӱчӱн, чирнең паза удобрениелернең орта тоғынарға ӱгренчелер.
Ідӧк Игорь Гердт Ширадағы элеваторның орнында, хайзы ирткен чылда банкрот пол парған, комбикорм заводы пӱдірілері кӧрілчеткеннеңер регион устағҷызына искірген. Аны 2018 чылдох тузаланысха сығарарға паза чылда 15 тонна азых тимнирге пӧгін турча.
- Элеватор орнындох тоңастығларны ӧскірчеткеннернің ассоциациязы тӧстелген, хайдар Хакасияның килкім аал хонии предприятиелері кірчелер. Ассоциацияның тилекей рыногында садығ апарҷаң оңдай пар. Пістің тоңастығларыбыс кирексініснең тузаланча, аннаңар пу чағында Хыдат паза Моол хазналарынзар экспортха сыхчаң оңдай пар, - искірген министр.
Хакасияның пазы Виктор Зимин пу тоғыс республикаа пӧзік туза ағыларын таныхтаан.
- Ӱр ниместе ле піс ӱреннің 90 процентін алҷаңмыс, амды, тізең, пістің позыбыстың ӱрені пар, ағаа хоза артых тамахты позыбыс сат поларбыс. Ол уғаа танығлығ паза аал хонии тиліпчеткеннеңер чоохтапча. Піс аал хониина, аалға кӧп кӱс паза ахча пир салғабыс, амды салтарларны кӧрер тус читті, - таныхтаан Виктор Зимин.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде