ХАКАСИЯДА РОБОТОТЕХНИКА ТИЛІПЧЕ
08.02.2017
Хабарлар
Ағбандағы лицейнің робототехника кабинедінзер кір киліп, ӱгренҷілернең изеннесчебіс. Олғаннар, конструкторлар чыып, ӧткін айғасчалар, таласчалар, чӧптесчелер. Пу кабинетте столлар пасха оңдайли турғызылых, оларның ӱстӱнде конструкторлар, кічиҷек детальлар, кубиктер, тегілегестер, хайзын піс ниме полчатханын пілбинчебіс, че олғаннар оларны чахсы таныпчатханға тӧӧй. Олар пу детальлардаң роботтар итчелер. Олғаннарға информатика ӱгретчізі Татьяна Лопатина полысча. Хайди ол піске чоохтапча, пу кӱннерде Ағбандағы школалар ӱгренҷілері аразында марығ иртче. Аннаңар лицейнің ӱгренҷілері, «Роботизированный агротехнический комплекс» тоғысты толдырып, маң чохтанчалар.
2013 чылда лицей робототехника клазын азарына грант ахчазын утып алған. Ол ахчаа конструкторлар, лабораториялар паза пасха даа нимелер алылған. Пӱӱнгі кӱнде оларның 20 азыра аймах робот пар, че ӱгренҷілер паза ӱгретчі роботтарның санын аннаң андар ӧскірерге пӧгінчелер.
- Амды, наа технологиялар чуртасха ӧткін кірчеткенде, олғаннар оларнаң хынып айғасчалар. Роботтар идіп, олғаннар табырах сағын сыхчалар, аннаңар ӱгретчілер дее, іҷе-пабалар даа палалар роботнаң айғасчатханнарына ӧрінчелер. Роботтарны чайапчатхан олған соонаң инженер полыбызарға айабас. Пу профессия, тізең, хаҷан даа кирексіністе, - чоохтапча Татьяна Александровна.
Олған, конструкторларнаң айғазып, инженер профессиязын удаа таллап алча. Татьяна Лопатина позының чуртазынаң кӧзідім ағылған. Аның улуғ оолғы амды Новосибирсктегі хазна университедінде авиаконструкторға халғанҷы курста ӱгренче.
- Оолғыма 2 час полғанда, ол аймах конструкторлар чыып пастаан. Ӱс-тӧрт часча самолёттарны чығҷаң. Школаа чӧр сыхханда, станкостроение, радиоэлектроника, авиамоделирование кружоктарға чӧрген, амды ол, ӱгредиин тоосса, инженер-авиаконструктор полар, - чоохтапча ӱгретчі.
Лицейде робототехника клазы азылғанда, ӱгренҷілер аймах марығларда аралазып пастааннар. Ирткен чылларда олар, Москвазар, Челябинсксер паза Новосибирсксер марыға чӧріп, сыйыхтығ орынға турысханнар.
- Ідӧк піс ӱгренҷілернең хада чайғы академия лагерьінзер чӧрчебіс. Анда Хакасияның паза Хызылчарның олғаннарынаң хада тынанчабыс паза физикаҷа, математикаҷа, биологияҷа, робототехникаҷа паза пасха даа предметтерҷе пілістерібіс тыытчабыс, наа проекттер тӧстепчебіс, - чоохтапча Татьяна Александровна.
Амды Татьяна Лопатина Ағбандағы школалар директорларынаң, информатика ӱгретчілерінең хада полған на школада робототехника клазын тӧстирдеңер чӧптесчелер. Че класстар азылар алнында, лицей пасха ӱгредіг учреждениелерінің олғаннарын роботтарнаң таныстырча, мастер-класстар, семинарлар, марығлар иртірче.
Пу кӱннерде Ағбанда робототехникаҷа марығ иртче. Лицейнің ӱгренҷілері Николай Казаков паза Александр Попов «Роботизированный агропромышленный комплекс» тоғысты толдырчалар, пастағы орын алып аларларына ізенчелер. Хайди искірчелер Хакасияның ӱгредіг паза наука министерствозында, пӱӱнгі кӱнде робототехника Ағбан істінде чахсы тиліпче. Ідӧк ӱр ниместе Таштыптағы школа робототехника клазын азарына грант утып алған.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде