ХАКАСИЯНЫҢ НАНҶЫЛАРЫН ХУМАРТХЫЛААННАР
08.02.2017
Хабарлар
Наталья МАНУЛИК Валерий Халиловтың романстарын толдырча
Ирткен декабрьның 25-ҷі кӱні пістің хазнаа улуғ чобағ ағылған. Ол кӱн, Арачыланыс министерствозының ТУ-154 самоледы Хара талайда саайланып, 92 кізінің чуртазы ӱзілген.
Ӱрееннернің санында полғаннар Россия чааҷыларының ӧӧн дирижеры, Россияның чон артизі, генерал-лейтенант Валерий Халилов, Россияның арачыланыс министерствозындағы культура устанызының директоры Антон Губанков, аның полысчызы Оксана Бадрутдинова, «Сын полызығ» фондтың устағҷызы Елизавета Глинка, В.А.Александровтың адынаң сарыннар паза теелбектер ансамбльының артисттері паза Россияның ӧӧн телевидениезінің хабарҷылары.
2 февральда В.Г.Чаптыковтың адынаң хакас филармониязында ах чарыхтаң парыбысхан кізілернің хумартхызына чарыдылған концерт ирткен. Ол «Нанҷыларыбысты паза хада тоғынған арғыстарыбысты сағысха киріп» адалған. Концертте Хакасияның пазы Виктор Зимин, культура министрі Светлана Окольникова, муниципальнай пӱдістернің пастары полғаннар.
Мероприятиені Хакас филармониязының симфоническай оркестрі асхан. Музыканттар дирижер Вячеслав Инкижековтың устаанынаң Людвиг Бетховеннің «Чобағлығ марш» чайаачы тоғызын толдырғаннар. Олох туста улуғ экранда ӱреен кізілернің сомнары кӧзіділген. Оларны кӧріп, концертке килген улустың харах чазы ахчатхан.
В.А.Александровтың адынаң сарыннар паза теелбектер ансамбльы 1928 чылда тӧстелген. Аның артисттерінің пӧзік узына тилекейдегі прай хазналарның чуртағҷылары аптаттырғаннар. 2016 чылда 25 декабрьда саблығ ансамбль пір саңай 63 артистті чідір салған. Самолётта ансамбльнаң хада хоос устағҷызы Валерий Халилов учуххан. Валерий Михайлович Хакасияның чуртағҷыларына чахсы таныс. Ол, республиказар ӱс хати киліп, концерттер кӧзіткен. Антон Губанков 2016 чылда «Сибер ил» чоннар аразындағы форумда араласхан. Антон Николаевич Михаил Пореченковнаң хада «Кирек Хакасияда полча» марығ жюризінің тоғызынаң устаан. А.Н.Губанковтың полысчызы Оксана Бадрутдинова тоғыс хоостыра Хакасиязар удаа килҷең. Аның кӱстенізінең республикада чааҷы хоосчылар студиязының пленэрі иртірілген паза Россия армиязының ӧӧн академическай театрының ойыннары кӧзіділгеннер.
Симфоническай оркестр «Чобағлығ маршты» ойнабысханда, кӧрігҷілер, хорғыстығ саайда чуртастарын чідірген кізілерні хумартхылап, пір минута сым турғаннар. Анаң сӧс алған Светлана Окольникова. Ол чоохтаан: «Пӱӱн піс ах чарыхтаң парыбысхан нанҷыларыбысты паза хада тоғынған арғыстарыбысты сағысха кирчебіс. Олар ӱрееннең сығара 40 кӱн ирт парды. Хакасия 25 декабрьда сын нанҷыларын чідір салған. Оларның полызиинаң республикада кӧп проект чуртасха кирілген. Піс ол тоғысты мыннаң мындар узарадарбыс. Пӱӱл «Ах чарых Анна» паза «Чир чайаан» фестивальлар иртірілер. Олар Валерий Халиловтың, Антон Губанковтың паза Оксана Бадрутдинованың хумартхызына чарыдыларлар».
Чооғының халғанҷызында Светлана Анатольевна Хакасия пазы Виктор Зиминге позының, музыканттарның паза ӱреен кізілернің туғаннарының адынаң улуғ алғызын читірген. Виктор Михайлович ах чарыхтаң парыбысхан чайаачыларны тӱгенҷі чолға ӱдезерге полысхан.
Концерттің программазы аннаң андар узарадылған. Россияның арачыланыс министерствозының ӧӧн чааҷы оркестрінің солизі, Хакасияның саблығ артизі Наталья Манулик «Аvе Магіа» ырны толдыр пирген.
Сценаның узы ідӧк Валерий Халиловтың «Лепестки жасмина», «Не уходи», «Багряный листопад» романстарын сарнаан. Наталья Манулик саблығ дирижернаң чахсы таныс полған, аннаңар аны сағысха киріп, ырҷы сценада сала ла ылғабыспаан.
Хумартхы мероприятиенің ікінҷі чардығында Хакас филармониязының музыканттары паза артисттері Валерий Михайлович 2015 чылда тимнеен концерт программазын толдырғаннар. Симфоническай оркестр Г.В.Свиридовтың «Тройка», «Романс», «Вальс» тоғыстарын, М.И.Глинканың «Иван Сусанин» операның ӱзігін, П.И.Чайковскийнің «Скоморохтарның теелбегі» произведениезін ойнаан. Ырҷылар Артур Марлужоков, Даниил Тарасов, Олег Гриценко, Мария Агеева, Алексей Петриченко паза Наталья Титова совет тузындағы сарыннарны толдырғаннар. Кӧрігҷілер «Халғанҷы чаалазығ», «Мин хынчам сағаа, Чуртас», «Ада чир-суума служба апарчам», «Кип-чоохтар чоохтап пирерлер» паза аннаң даа пасха ырларны хынып истіп алғаннар.
Концерттің халғанҷызында артисттер Валерий Халиловтың «Хаҷан даа илбек хазна» сарынны толдырғаннар, кӧрігҷілер аны турып искеннер.
Орта чоохтидырлар, пу чирдең парыбысхан саблығ кізілернің аттары паза иткен тоғыстары чонда хаҷан даа халар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде