ЧИИТ ЧАЙААЧЫЛАРҒА
10.02.2017
Хабарлар
Нaa чыл пасталғаннаң кибірли иртірілчеткен паза наа марығлар чарлалча. Ойын-марығларға хынчатханнар оларда ӧткін аралазадырлар. Хакасияның культура министерствозы, Чайаачылар туразы паза «Абакан» журналның редакциязы 2017 чылға «Таланттарның тигір хуры» марығ чарлабысхан. Чайаачылар марии чиит авторларның наа литература тоғыстарын хығырығҷыларға читірер ӱчӱн иртірілче.
Литература тоғыстары хакас алай орыс тілінең пазылған ползын. Марығда 18 - 35 частығлар араласчалар. «Таланттарның тигір хуры» марығда ӱс номинация чарлалча: поэзия, проза, драматургия. Сыйыхтығ орыннар пирілер: иң чахсы кибеліс, олғаннарның паза саарбахтарның пӱӱнгі чуртазынаңар, оларның улуғларнаң теелістерінеңер, амғы чииттернің чуртазынаңар, тархын паза тӧреен чиріне хыныс темаа произведение, фантастика паза фэнтези, иң чахсы детектив ӱчӱн.
Иң чахсы литература тоғыстары «Абакан» журналда, «Хакасияның чиит авторлар антологиязында» чарыхха сығар. Марығ чиңісчілеріне дипломнар паза сыйыхтар читірілер.
Марыға пір автор ӱс чоохтаң, пір повестьтең, романнаң, пьесадаң кӧп пирбеске кирек. Кибелістер чыындызы чаҷындағы 30 страницадаң артых полбазын. Марыға А4 форматтығ чаҷында, 14 № шрифттіг печать тоғыстары пір экземплярлығ паза электроннай кӧрімнең алылча.
Автор позынаңар хысхаҷахти пас пирерге кирек: ады-солазы, тӧреен чылы, чуртапчатхан чирі, телефон, почта адрезі; паспортха осхас ах-хара сом; произведениенің ады, хаҷан пазылған; повестьте паза романда нимедеңер чоохталчатханын хысхаҷахти пас пирерге; «Таланттарның тигір хуры» марығда аралазардаңар сурыныс пічии.
Материалларны папкаларда пирерге. Анда ады-солаңар, номинация кӧзіділ парарға кирек.
Марыға чайаачы тоғыстар 2017 чылның 1 февральынаң 1 июньға теере алылча. Литература тоғыстарын пу адресче ағыларға: 655017, Хакас Республика, Ағбан г., Ленин проспекті, 63, Хакасияның чайаачылар туразы.
Автор :
Тимнеен Елена САГАТАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде