ХАЙДИ ТОҒЫНДЫ МИНИСТЕРСТВО?
14.02.2017
Хабарлар
Ағбандағы «Чиңіс» культура кінінде Хакасияның национальнай паза территориальнай политика министрі Дмитрий Тодышев министерство 2016 чылда хайди тоғынғанынаңар сан пиріс иткен. Форумда ідӧк араласханнар Хакасия пазының орынҷызы Владимир Крафт, ӱлгӱ паза орындағы пос устаныс органнарының, халых пірігістерінің, Халыхтар палатазының кізілері паза СМИ тоғынҷылары.
Министерство тоғызының ӧӧн салтары - республикада аймах нациялығ чон ынағ, пілізіп, амыр чуртапчатханы. Социология істезіглері таниинаң, чуртағҷылар регионда чоннар аразындағы хайызығларны чахсы тіп паалааннар. Сурастырығның 10 % араласчызы «талазығлар сығыс килче» тіп нандырған.
- Улуғ сӧбіре удур-тӧдір піліссе, часкалығ чуртапча, - теен Хакасия пазының орынҷызы Владимир Крафт. - Республикада аймах нациялығ чон ынағ-амыр чуртапчатханы - ӧӧнінде ӱлгӱ органнарының, пос устаныстарның, министерство-ведомстволарның паза халых пірігістерінің хада-пірге толдырчатхан улуғ тоғызы.
2016 чылда регионда мындағ танығлығ мероприятиелер ирткен: хакас чонның XIII съезді, «Этнографияның улуғ диктанты» тиксі Россиядағы акция, республиканың коммерческай нимес форумы. Ідӧк кибірге кір парған мероприятиелер иртірілгеннер: «Хакасияның иң артых муниципальнай пӱдізі» республика марии, «Ынархас чоллары» фестиваль, «Ине тілі» фестиваль-марығ паза Хакасияның ас саннығ чоннарына (шорларға) чарыдылған мероприятиелер.
Чонға иртірілген сан пирісте прай даа араласчыларға чоох тударға оңдай полған. Кӧбізі национальнай паза территориальнай политика министерствозының тоғызын пӧзік паалаан. Владимир Крафт «Алтынай» хакас ипчілер лигазының устағҷызы Татьяна Майнагашеваа, «Іҷенің чирі» хоос фильмні суурған ӱчӱн, Хакасия пазының адынаң алғыстас пічиин читірген. Республика правительствозының алғыстастығ пічиин «Этнографияның улуғ диктанты» акцияның ӧткін араласчылары алғаннар.
Ідӧк чон алнындағы сан пирісте «Шаги навстречу-2016» республика мариинда, аралазып, чиңіске читкен СМИ тоғынҷыларын сыйыхтааннар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде