ЧИИТ КОМПОЗИТОРНЫҢ КӦГЛЕРІНДЕ - ХАКАСИЯА ХЫНЫЗЫ
17.02.2017
Хабарлар
Композитор Оксана АЛАХТАЕВА симфоническай оркестрнең хада
Пу неделяда, 15 февральда, Хакас филармониязында чиит композитор Оксана Алахтаеваның концерті ирткен. Ол «Хакасияа хыныснаң» адалған. Чалахай иирні Хакасия искусствозының саблығ деятельі Татьяна Чаптыкова апарған.
Пастап Татьяна Владимировна кӧрігҷілерні хысхаҷахти Оксана Герасимовнаның чуртас чолынаң таныстырған. Композитор чайаачы кӧңніліг сӧбіреде тӧреен. Аның пабазы Герасим Иванович Капсаргин 1960 чылларда «Ленин чолы» газета да хабарҷы полып істенген. Іҷезі Мария Макаровна «Абакангражданпроектте» инженер полған.
Музыканаң Оксана Алахтаева кічігдең сығара айғасча. Пастап ол скрипканаң ойнирға ӱгрентір, анаң фортепианонаң. 1991 чылда чиит хыс Ағбандағы музыка училищезін тоосча, олох чыл Хазандағы консерваториязар ӱгренерге кірібісче. Ам Оксана Герасимовна музыка колледжінде ӱгретчі полып істенче, 20 чыл аразына ол кӧп оол-хысха чол асхан. Чайаачы ус Россияның паза Хакасияның композиторлар пірігістерінің кізізі полча.
Концертті ырҷы Юлия Тиникованаң ХГУ-ның хакас тиріглерінің оркестрі асханнар. Юлия композиторның «Иртіп парар» сарынын толдырған. Аны Оксана Герасимовна поэт Александр Баиновтың кибелізіне чайаптыр. Хакас чонның музыка кибірлеріне тӧстеніп пазылған сарын кӧрігҷілернің кӧңніне кірген.
Анаң сценаа Андрей Штарк устапчатхан Ағбанның ӱбӱрҷең оркестрі сыххан. Ол толдырған «Тірілген хайа хоостары» композицияда хакастарның кӧглері истілче, олох туста джаз музыказы пілдірче.
Оксана Алахтаева аймах жанрларда тоғынча. Ол кӧп музыка пьесаларын пас салған, хайзыларын олған музыка школаларының ӱгренҷілері аймах марығларда толдырчалар. Композитор Хакас драма театрында турғызылчатхан спектакльларға кӧглер чайапча. Ол У.Шекспирнің «Виндзорские насмешницы» кӱлкістіг ойынына чарых паза ниик музыка пас салған. «Сӱлейке кистінде» чайаачы тоғыс, тізең, саңай пасха кӧңніліг, ол кізіні сағысха тӱзірче. Пу произведение саблығ композитор Альфред Шниткенің авангард музыказына тӧӧй.
Оксана Алахтаеваның чайаачы ииріне кӧп саблығ кізі килген. Хакасияның чон артизі Герман Танбаев «Хам» сарынны толдырған. Россияның саблығ артизі Евгений Улугбашев, чатхан саап, «Тӧреен чирім» ырын сарнаан.
Ідӧк Евгений Александрович «Лира» олған хорынаң хада композиторның «Хамның сӧзі» чайаачы тоғызын толдырған. Таныхтирға кирек, аны Оксана Герасимовна саблығ ученай Н.Ф.Катанов чыған кип-чоохтар хоостыра тимнеен. «Хамның сӧзі» композициянаң «Лира» хор 2016 чылда Сочиде, Хорлар ойыннарында сарнап, чиңіс тутхан. Ідӧк пу тоғыс композиторға пӱӱл «Хысхылых» музыка сыйииның «Хор музыказы» номинациязында чиңісчі поларға оңдай пирген.
Концерттің халғанҷызында чайаачызынаң Россияның саблығ артизі Зинаида Аршанова ӧріндірген. Сопрано ӱнніг ырҷы сценаа Хакас филармониязының симфоническай оркестрінең хада сыххан. Пастап Зинаида Семёновна ідӧк Н.Ф.Катанов чыған «Алғыстастарны» толдырған. Анаң поэт Валерий Майнашевтің кибелістеріне пазылған ырларны сарнаан. Композитор Оксана Алахтаеваның узына, саблығ ырҷыларның чайаачызына морсынып, кӧрігҷілер матап айа сапханнар, «Браво», «Бис!» хысхырғаннар.
Чайаачы иирлер алғыстастар паза сыйыхтар чох иртпинче. Герман Танбаев Хакасияның композиторлар пірігізі Оксана Алахтаеваа «Хакасия искусствозының саблығ деятельі» ат пирердеңер сурыныс пічиин тимнир тіп искірген. Культура министрінің орынҷызы Лариса Киштеева чайаачы усха Аарластығ пічік читірген.
Чиит композиторның «Хакасияа хыныснаң» чайаачы иирі пӧзік синде ирткен, кізілер чалахай кӧңніліг ибзер нанчатханнар.
(Толдыразынаң кӧрерге чарир мында):
Автор :
Майя Кильчичакова.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы