«АҒБАНДАҒЫ ПУҒАЛАР» ПРАЙЗЫН АСХАННАР
21.02.2017
Хабарлар
Ағбанда 18 февральда С.П.Кадышевтің адынаң культура кінінің улуғ залында хакас чииттернің иң хынған «Алыптар» марии ирткен. Хыйғаларынаң паза чiтіг сағыстарынаң «Ағбандағы пуғалар», «Читігенҷіктер», «Тайға пӱӱрлері»,«Асхыстағылар» паза «Тӧӧ кӱлӱктері» ӧмелер сынасханнар.
Чоохтирға кирек, пӱӱл «Алыптар» марығны иртірерінде алызығлар пол парған. С.П.Кадышевтің адынаң культура кінінің орнына мероприятиенi «Альянс-Азия» продюсерлер ӧмезі тимнеен. Андар Виктор Сагалаков, Алексей Торбастаев паза Тимур Боргояков кірчелер. Чиит ооллар «Алыптар» марығны наа оңдайнаң иртіргеннер. Пис чардыхтаң тӧрт ле чардых артызылған, чітіг сағыстарынаң пасха араласчыларға кӱстерін кӧзіт пирерге кирек полған.
Жюри тоғызынаң Ағбандағы стенд-ап кӧстегнің тӧстегҷізі Тимур Боргояков устаан, аннаң хада ӧмелернің устарын писатель Илья Топоев, режиссер Марас Чебодаев, юрист Дмитрий Кидиеков, КВН паза «Алыптар» марығларында ӧткін араласхан Юрий Челтыгмашев паалааннар.
Пастап «Визитка» марығ ирткен. «Читігенҷіктер» ӧме киноға паза театрға чарыдылған кӱлкістіг номер тимнебіскен. Чиит артисттернің кӧрізінең, «Троя» фильм Хакасияда суурылған полза, Гекторнаң Ахиллес хакас фермернің хойларын хадарчатхан гастарбайтерлер поларҷыхтар, «Титаник» фильмдегі хыстың омазын Каскар Чаптыков таа чахсы чайап саларҷых. Хыл плат тартын салған паза хысхаҷах кӧгенек кис салған Каскарны кӧріп, кізілер ээреп хатхырчатханнар.
«Ағбандағы пуғалар» ӧмезер А.М.Топановтың адынаң Хакас драма театрының чиит артисттері кіргеннер. Олар номерлерінде пылтыр декабрьда Саяногорск хыриндағы тайғазар тӱскен метеориттеңер чоохтааннар. Телевидение репортажы оңдайынаң тимнелген визитканы кӧрерге чапсых полған.
Хызыл хара суғ аалның «Тайға пӱӱрлері» ӧмезінде саңай ла студенттер полтырлар. Сценазар Хорсах, Хуба, Сӧлчік паза Талтах «пӱӱрлер» велосипеднең ойлат килгеннер. Хакас тілін ӧтіре пілчеткен ооллар кӧрігҷілерні аптааннар. Ӱс чулдағы «Тӧӧ кӱлӱктері» ӧмезі визиткаа тахпах-сарыннар тимнеп салғаннар. «Асхыстағылар» ідӧк сарыннар толдырғаннар.
Марығның ікінҷі чардығы «Импровизация» адалған. Экрандағы хоостарны кӧріп, ӧмелер марығны апарған Виктор Сагалаковтың сурығларына табырах паза хынығ нандырығ пирерге кирек полғаннар. Марығның пу чардығында араласчылар ипотеканы, кічіг кредиттер пирчеткен организацияларны, «Боярышник» настойканы, стипендияны сағысха киргеннер. Сах андох пілдістіг полыбысхан, хайдағ сурығлар пістің чииттерібісті сағыссыратча. Мында постарын «Асхыстағылар» уғаа чахсы кӧзіткеннер, че табырах сағынчатхан «Тайға пӱӱрлеріне» олар утыр салғаннар.
«Альянс-Азия» концерт-продюсер ӧмезінің таниинаң, сын алыптар хыйға ла нимес, че ідӧк кӱстіг поларға киректер, аннаңар ӱзінҷі марығда араласчылар арғамҷынаң тартысханнар. Кізілернің хайиин «Читігенҷіктер» ӧмезі тартхан. Арғамҷы тартызарына ооллар америка комикстерінің матырларына хубулып алғаннар. Ағаа хоза, марығлазар алнында артисттер, кӱс алынарға пӧгініп, «Мельдоний допингнең» тузаланчатханын хормачыланып кӧзіткеннер. Азах меетке ікі театрның ӧмелері сыххан. «Читігенҷіктер» матап чазанған даа ползалар, че «Ағбандағы пуғаларға» олар утыр салғаннар.
Халғанҷызын марығның араласчылары «Ибдегі тоғысты» кӧзіткеннер. Минің кӧрізімнең, иң хынығ чайаачы ңомерні «Тайға пӱӱрлері» тимнебіскеннер. Ӧменің капитаны Алексей Тохтобин, Хызыл Пӧрігеске хубулып алып, ӱс «пӱӱрні» матап алаахтыр парчатхан. «Асхыстағылар» селфи идіп порастанғаннар. «Читігенҷіктернің» таниинаң, прай тӱрк чоннар хакастардаң сыхтырлар. «Ағбандағы пуғаларның» номері 23 февральдағы сыйыхтарға чарыдылған. Ноға-да сағынғам, ипчілер ле норка теерізінең тігілген тоннарны паза бриллианттығ пурбаларны сыйлаттыр полбин ирееленчелер тіп. Ир кізілер дее пірее чапсых сыйыхты ӱлӱкӱнге сахтапчаттырлар.
Марығ тоозылғанда, сағыстарынаң жюринің кізілері ӱлескеннер. Театрлардағы чииттернің пӧзік устарын таныхтап, олар прайзы даа «Тайға пӱӱрлері» ӧмее морсынғаннар. Прай араласчыларға Чон узы Пётр Топоев иткен хобырахтар паза тимір хомыстар читірілгеннер.
Алынҷа сыйыхтарнаң Хызыл хара суғ аалның ӧмезі таныхталған. «Тайға пӱӱрлеріне» Хакас телевидениезіндегі «Кӧгле, чир-суум!» кӧзідігнің редакторы Елизавета Тахтобина хомыс сыйлаан. Ідӧк оларға сыйых Хакасияның ӱгредіг паза наука министрінің орынҷызы Юрий Сагалаков читірген. Чооғында ол «Алыптар» марығ пӧзік синде ирткенін паза мындағ мероприятиелерні школаларда тӧреміл иртірерге кирек тіп таныхтаан.
Марығның араласчылары даа, кӧрігҷілер дее чиңісчілерні адирын чидікпин сахтааннар. Саннар хоостыра ӱзінҷі орынға «Тӧӧ кӱлӱктері» сыхханнар, ікінҷі орын «Читігенҷіктер» паза «Тайға пӱӱрлері» аразында ӱлестірілген, чиңісті «Ағбандағы пуғалар» тутханнар. Хакас драма театрының артисттеріне Аарластығ пічік паза 25 муң салковай читірілген, «Читігеннің» чайаачылары паза Хызыл хара суғдағы ооллар 5-зер муң салковай алғаннар.
«Алыптар» марығ уғаа хынығ ирткен, прай араласчылар хакас тілінең не, орыс сӧстерін аралабин, чоохтанарға кӱстенгеннер. Пу мероприятиені апарған Виктор Сагалаковты алынҷа таныхтабызарға кирек. Марығның чардыхтары аразында ол, реклама паузаларын иртіріп, кӧрігҷілерні матап хатхыртхан. Виктор талғаннаңар, кӧлей чейіненеңер, Хакасияның тайғаларынаңар реклама иткен. Олох туста Вячеслав Кученовтың концертіне паза «Читіген» театрның премьеразына хығырарға ундубинчатхан. Санапчам, мындағ мероприятиелер сыбыра иртірілзе, тӧреен тілібіс тилир, чииттер аннаң чоохтазарға кӱстенерлер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде