РОССИЯ ТИЛЕКЕЙДЕ АМЫР ХОНЫХ ӰЧӰН ТУРЫСЧА
22.02.2017
Хабарлар
КИҶЕЕ АҒБАНДА 5-ҷі АЛЫНҶА ТИМІР ЧОЛ БРИГАДАЗЫНЫҢ ЧИРІНДЕГІ ЧААҶЫЛАР ГОРОДОГЫНДА ОРНЫХЧАТХАН КУЛЬТУРА-ТЫНАҒ КІНІНДЕ (КДЦ) ЧИР-СУУБЫСТЫҢ АРАЧЫЛАҒҶЫЗЫ КӰНІНЕ ЧАРЫДЫЛҒАН ПАЙРАМНЫҒ УЛУҒ ЧЫЫЛЫҒ ИРТКЕН. АНДА ХАКАСИЯНЫҢ ПАЗЫ ВИКТОР ЗИМИН, ӦӦРКІ ЧӦП КНЕЗІ ВЛАДИМИР ШТЫГАШЕВ, ПРАВИТЕЛЬСТВО КІЗІЛЕРІ, РЕСПУБЛИКА ПАРЛАМЕНТІНІҢ ДЕПУТАТТАРЫ, АҒБАН, ХАРАТАС ГОРОДТАР ПАСТАРЫ, ПАСХА ДАА КӦП УСТАҒҶЫЛАР АРАЛАСХАННАР. УЛУҒ ЗАЛҒА ТОЛДЫРА ОФИЦЕРЛЕР, ЧААҶЫЛАР, ЦСКА ШКОЛАЗЫНЫҢ ӰГРЕНҶІЛЕРІ, ЮНАРМЕЕЦТЕР ЧЫЫЛЫСХАННАР.
ЧААҶЫЛАР ГОРОДОГЫНДА ПАСТАҒЫЗЫН НА ПОЛҒАНДА, АНДА АПАРЫЛЧАТХАН ПӰДІРІГЛЕР КІЗІНІ ХАЙХАТЧА. ГОРОДОК УҒАА УЛУҒ ЧИРДЕ ОРНЫХЧА. АМҒЫ ТУСХА ЧАБЫХ ПУС АРЕНАЗЫ, БАССЕЙН, КУЛЬТУРА-ТЫНАҒ КІНІ ТУЗАЛАНЫСХА КИРІЛ ПАРҒАННАР. ПУ СОЦИАЛЬНАЙ ОБЪЕКТТЕРЗЕР ГОРОД ЧУРТАҒҶЫЛАРЫ ДАА ПОЗЫДЫЛЧАЛАР. ІДӦК ЧААҶЫЛАРҒА ПИС ХАДЫЛЛЫҒ НАА КАЗАРМАЛАР ПӰДІРІЛ ПАРҒАННАР. AM ДАА КӦП ОБЪЕКТ ПӰДІРІЛЧЕ, ОЛАРНЫҢ ХЫРИНДА БАШЕННАЙ КРАННАР ТУРНАЛАР ЧІЛИ ТУРЧАЛАР.
Мындағ улуғ пӱдіріглерні кӧрзе, кізее поғдархирға, морсынарға ла халча. Чааҷыларға анда службаны турыстыра апарарға, пос туста тынанарға прай оңдайлар пар.
КДЦ-ның концерт залы, сценазы даа уғаа улуғ. Зал пip муң орыннығ тіпчелер, Ағбанда, Хакасияда даа ол иң улуғ зал полар. Чааҷы-офицерлер, кӱс структураларының офицерлері, ветераннар парадха кисчең кип-азахтығ одырчалар, кӧксілерінде орден-медальлары толдыра. Сценада - Хакас филармониязының симфоническай оркестрі, аннаң дирижёр Вячеслав Инкижеков устапча.
Залзар чааҷы-офицерлер Россияның хазна флагын, Кии-хан тигір кӱстерінің 24-ҷі алынҷа зенитно-ракетнай бригадазының паза 5-ҷі алынҷа Познанскай тимір чол бригадазының флагтарын кирчелер. Россияның паза Хакасияның гимннері толдырылча. Трибуназар чоох тударға, ӱлӱкуннең прайзын алғыстирға Хакасияның пазы Виктор Зимин сыхча.
- Аарлығ нанҷылар! Офицерлер, чааҷылар, республикадағы кӱс структураларының кізілері паза ветераннар! - айланған чыылған чонзар Виктор Михайлович. - Прайзын чағдапчатхан улуғ ӱлӱкӱннең алғыстапчам! Пу ӱлукун чааҷыларның сабланызын таныхтапча, хазнаның сын патриоттарын піріктірче. Ол - чааҷы службазын иртібіскеннернің, амды служба апарчатханнарның, службаа парарға тимненчеткеннернің ӱлӱкӱні. Кизек чаалазығларда Чир-суубыс ӱчӱн турысхан ветераннарны сыбыра аарлапчабыс. Хазнаа хатығ чылларда аны арачылирға ипчілер дее, олғаннар даа турыбысчаңнар. Оларға прайзына улуғ алғыс паза сабланыс! Піс оларны хаҷан даа ундутпаспыс.
Пістің амғы Тирігліг кӱстерібіс тилекейде иң кӱстіг, анзында ам пірдеезі ікінҷілебинче. Пістің республикада 5-ҷі тимір чол бригадазында чааҷылар городогы пӱдірілче, чабых пус ареназы, культура-тынағ кіні, бассейн тимге сығарылғаннар, андар пістің чуртағҷыларыбыс таа чӧрерлер. Республикада ЦСКА школазы азылған, аның спортсменнері пу объекттернең ідӧк тузаланарлар. Аннаңар улуғ алғыс читірерге сағынчам Оӧркі ӧӧн командующей Владимир Владимирович Путинге, Хакасияның аарластығ кізізі, Россияның арачыланыс министрi, пістің чир-суғҷыбыс Сергей Кужугетович Шойгуға. Оларның хабазиинаң мындағ городок пӱдірілче. Пістің чирібісте зенитно-ракетнай бригада турыбысхан, ол республиканы ла нимес, ідӧк хости регионнарны киидең арачылапча. Мин ол частьта ӱр ниместе полғам, оларның тимненізін кӧргем.
Ідӧк республикада чахсы кирек пол парған - Сибирьдегі федеральнай университеттің Хакасиядағы техническай институдында чаа кафедразы азылған. Амды аның студенттері, ӱгредіглерін тастабин, мындох чааҷы специальностьтарын ал поларлар. Ідӧк алғыс Сергей Кужугетовичке, ол, студенттерге ӱгредіглерін тоосса ла, армияа парар оңдай пирген. Полған на регионда чаа кафедралығ вузтар чоғыл, че пістің улуғ нимес регионда андағ кафедра азылған.
Прайзын ӱлӱкӱннең алғыстапчам, амыр тигір, часка, пик хазых алғапчам!
Чооғын тоозып, Виктор Зимин чааҷы службазын чахсы апарчатханнарға сыйыхтар читірген. Іди Хакасия пазының холынаң сыйыхтар алғаннар зенитно-ракетнай бригаданың командирі, полковник Иван Сибиряков, тимір чол бригадазының командирі, полковник Сергей Буланов, ХТИ-дағы чаа кафедразының пастығы, подполковник Максим Ананьин, ЦСКА школазының устағҷызы Михаил Сазонов паза даа пасхазы.
Аның соонда сӧс Ӧӧркі Чӧп кнезі Владимир Штыгашевке пирілген. Ол ідӧк прайзын айдас ӱлӱкӱннең алғыстаан. Хайди Владимир Николаевич таныхтаан, Чир-суубыстың арачылағҷызы кӱні хазнада иң улуғ ӱлӱкӱннернің пірсі полча. Россия хаҷан даа пу чир ӱстӱнде кӱс чохтарны, пастырчатханнарны арачылапча, позына хайдағ-да тузазын тілеп чӧрбинче. Илбек Ада чаада пістің хазна 26 миллион кізізін чідірген, оларның чарымы - олаңай чуртағҷылар. 1945 чылда Ағбанда тӧстелген 309-ҷы Пирятин дивизиязы Польшаны позыдар чаалазығларда араласхан. Анда СССР-ның 640 муң чааҷызы чат халған. Олох чылда Венгрияда пістің чідіріглерібіс 270 муң кізее тиңнелген. Ол чаада пістің чоныбыс позының махачы хылиин кӧзіткен.
Киҷее чобағлығ хабар читкен: Россияның ООН-дағы кізізі Виталий Чуркин чуртастаң парыбысхан. Ол студент тузында Асхыс аймаанда туралар пӱдірген. Пасха ханнар министрі Сергей Лавров ідӧк студент тузында Хакасияда туралар пӱдірген. Сергей Шойгу, пістің чир-суғҷыбыс, мында пастағы лейтенант ат алған. Хакасиядағы парламенттің Ӧӧркі Чӧп адын піс хайраллап алғабыс. Ол Россияда чалғыс ла андағ аттығ, аның ӱчӱн мині ат саларға даа хыҷанғаннар. Че ол чол пасчатханын таныхтапча, аннаңар аны піс артысхабыс... «Служба ӱчӱн прайзын алғыстапчам, пик хазых, амыр чуртас алғапчам прайзына!» - тоосхан ол чооғын.
Чыылығда ідӧк алғыстаснаң трибуназар Ағбанның паза Хакасияның архиепискобы Ионафан, Сергей Буланов паза Иван Сибиряков сыхханнар. Пайрамны улуғ концерт узаратхан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы