АХЧАЛЫҒ СЫЙЫХХА ТУРЫСХАНЫ - ЧАХСЫ КӦЗІДІМ
22.03.2017
Хабарлар
ИРТКЕН НЕДЕЛЯДА «ХАБАР» ГАЗЕТАНЫҢ ДЕЛЕГАЦИЯЗЫ АСХЫС АЙМААНЗАР НАНДЫРЫҒЛЫҒ ЧОРЫХНАҢ СЫХХАН. ИРТКЕН ЧЫЛДА РЕДАКЦИЯ ПОЧТАЛЬОННАР АРАЗЫНДА «ХАБАР» ГАЗЕТАА ЧУРТАҒҶЫЛАРНЫ 2017 ЧЫЛНЫҢ ПАСТАҒЫ ЧАРЫМ ЧЫЛЫНА ПАЗЫНДЫРАРЫНҶА ТЕЕСТЕГІ МАРИИН ЧАРЛААН. ФЕВРАЛЬДА РОССИЯ ПОЧТАЗЫ ПОЛЫЗИИНАҢ МАРЫҒ САЛТАРЛАРЫ ИДІЛГЕН. ПӰӰЛ ПАСТАҒЫ ОРЫНҒА СЫХХАН АСХЫСТАҒЫ ПОЧТА ПӦЛИИНІҢ ПОЧТАЛЬОНЫ СВЕТЛАНА ТОЛМАЧЕВА.
АНЫҢ ЧИДИИ - 206 КІЗІНІ «ХАБАР» ГАЗЕГАА ЧАРЫМ ЧЫЛҒА ПАЗЫНДЫР САЛҒАНЫ. ІКІНҶІ ОРЫНДА - ӰС ЧУЛДАҒЫ ПОЧТА ПӦЛИИНІҢ ПОЧТАЛЬОНЫ ЕВГЕНИЯ СУБРАКОВА. ОЛ 169 ЧУРТАҒҶЫНЫ ПІСТІҢ ГАЗЕТАА ПАЗЫНДЫР САЛҒАН. ӰЗІНҶІ ОРЫНҒА СЫХХАН ПОЛТАХТАҒЫ ПОЧТА ПӦЛИИНІҢ ПОЧТАЛЬОНЫ ТАИСЬЯ ТОПОЕВА. ОЛ 91 КІЗІНІ ПАЗЫНДЫР САЛҒАН.
Асхыстағы почта пӧлиинде тоғыс хайнапча, чуртағҷылар пос киректерінең «кӧзенектерзер» турғлапчалар. Пісті удурлаан орындағы почта пӧлиинің пастығы Сильвия Топоева. Ол Светлана Павловнаа аалҷылар килгенін искірген. Ӱр сахтатпин, почтальон килген. Газетаның ӧӧн редакторы Радион Сунчугашев Светлана Толмачеваны марығда чиңіс тутханынаң алғыстаан паза мыннаң мындар ідӧк газетаа пазынысты айныдарға сурынған. Светлана Павловна, кӱлінібізіп, «Хабар» газетаа позының алғызын читірген. Ол республика газетазында чуртағҷылардаңар кӧп пазылчатханын таныхтаан, палаларынаңар пазылғаны ӱчӱн алынҷа алғыстаан.
- Газетада кӧп тузалығ искіріг сыхча. Олғаннарға сыххан газетаны олған садынзар апар пирчем, хакас сарыннары кӧӧнең хада сығарылза, музыка школазынзар маңзырапчам. Алғыстапчабыс Чыл пазынаң, сірер пісті ағаа удур ӧріндірібістер, - кӱлінче тоғызына 40 чыл пир салған почтальон.
- Почтальоннар аразында марығ иртірчеткеннерің уғаа маңат паза кирек, - таныхтаан пӧлік пастығы Сильвия Сергеевна. - Піс марығда ӱзінҷізі хати сыйыхха турыстыбыс. Ӧріністіг. Пӱӱнгі кӱнде хабарлардаңар аннаң-мыннаң піліп аларға чарир, аннаңар пістің газетаа ол саринаң сала сидік полар. Чуртағҷыларның піреезіне, кӧзідімге, ағаа пазынғанҷа, садызып аларға чахсы ла. Че почта тоғынҷылары чуртағҷыларнаң тоғысты тӧреміл апарчалар, анзына ідӧк чахсы кӧстег полча - газета чарлапчатхан марығ. Сидіксіністерні хосча чииттернің тілні пілбинчеткені, аннаңар газетаа ӧӧнінде ортын паза улуғ частығ чуртағҷылар пазынчалар.
Светлана Толмачева газетаа пазынчатхан чуртағҷыларны чахсы таныпча, оларның аразында чиит сӧбірелер дее пар, анзы ӧріндірче. Кӧзідімге Бурнаковтар сӧбірезін пирген. Чииттер Норильскте чуртаптырлар, Асхыссар кӧскенде, газетаа пазынып пастаптырлар. Улуғ частығлар аразында Челтыгмашевтер, Чильчигашевтер сӧбірелерін таныхтаан, хайзылары хайди даа чарым чылға азынада пазынарға кӱстенчелер.
- Чуртағҷылар, газетада туған-чағыннары, таныстары сыхса, ӧрінчелер, хынып хығырчалар, - тіпче Светлана Павловна. - Льготалығ пазыныста тузалан халарға кӱстенчелер, андада газетаа ниик паанаң пазын саларға чарир.
Тасхар соох полған, че Асхыстағы почта пӧлиинең піс улуғ кӧңніліг сыххабыс, пайаазында соох саапчатхан тан даа пілдірбинібіскен. Светлана Толмачеваның кӧңні піске іди чахсы теелген. Чарых кізі, аллығ чӱректіг.
Полтах аалдағы почтальон Таисья Топоева тынағ кӱнінде ибде полған. Аалда ікі почтальон тоғынчаттыр. Таисья Николаевна пу тоғыста ӱс чыл істен салтыр. Аның чооғынаң, чииттер асхынах чал ахчалығ тоғысха хынминчалар. «Хабар» газетаа пазынысты алза, Полтахта даа олох ла сидіксініс таныхталча: пазынчалар ӧӧнінде ортын паза улуғ частығ чуртағҷылар. Хомзыныстығ полған истерге аалдағы пірее ӱгретчілер газета албинчатханынаңар. Пістің кӧрізібіснең, ӱгретчі - ол наа тӧлні чир-сууна, чонына хынарға, пос кибірлерін, культуразын, тілін аарлирға ӱгретчеткен ӧӧн кізілернің пірсі. Ол олғаннарға кӧзідім полча нооза. Хайди ол чон культуразына хайча, андағох хайығны сағирға чарир аның ӱгренҷілерінең.
Индіркі Тӧӧзер піс кӱн ортызында читкебіс, ол тусха иртенгі соох тан амырап парған, айас тигірдегі чарых кӱн сустарынаң чирні чылытчатхан. Евгения Субракованы піс ідӧк ибде тудып алғабыс. Евгения Афанасьевна пис чыл Индіркі Тӧӧдегілерге паза Политтегілерге почта полызығларын читірче, ол санда пістің газетаа пазындырча. Ол газетаа пазындырарында пір ле сидіксініс кӧрче - чииттернің тоғыс чоғыл. Парыстығлар, тоғыстығлар - прайзы даа пазынчаттыр газетаа. Анзы ӧріністіг. Чоохтирға кирек, Ӱс чулдағы почта пӧлии ідӧк почтальоннар мариинда тӧреміл сыйыхтығ орыннарға турысча.
Полған на почтальоннаң чоохтазып, ӧӧн редактор Радион Дмитриевич газетаа пазынысты тӧреміл апарарға киректелчеткеніне хайығ салған. Пу сурығ почта пастыра, пос тоғынҷылары пастыра кӧдірілче. Газета хығырығҷыларының саны аның таңдағы чуртазына кӧні теелче нооза. Ізенчебіс, редакцияның ахчалығ сыйыхтарына турысханы почтальоннарға мыннаң мындархы тоғысха чахсы кӧстег полар.
Автор :
Наталья СУБРАКОВА, Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде