ЧАЛАХАЙ КӰННІҢ СУСТАРЫ ЧЫЛ ПАЗЫН ӦҢНЕНДІРДІ
28.03.2017
Хабарлар
ЧЫЛ ПАЗЫ ХАКАСИЯ ЧУРТАҒҶЫЛАРЫНЫҢ ИҢ ХЫНЧАТХАН ӰЛӰКӰНІ ПОЛЧА. АНЫ КІЧІГ ААЛЛАРДА ДАА, АЙМАХТАР КІННЕРІНДЕ ДЕЕ ХЫНЫП ПАЙРАМНАПЧАЛАР. ЧЕ РЕСПУБЛИКА СИНІНДЕ ЧЫЛ ПАЗЫ АҒБАНДА ИППОДРОМДА ИРТЧЕ. 25 МАРТТА ХАКАС ЧОННЫҢ НАА ЧЫЛЫН ТАНЫХТИРҒА КІЗІЛЕР ХАКАСИЯНЫҢ АЙМАХ ПУЛУҢНАРЫНАҢ ЧЫЫЛЫСХАННАР.
ПАЙРАМҒА ЧОН-ЧАХСЫЗЫ МАТАП ТИМНЕНТІР. ААЛ ХОНИИ ЯРМАРКАЗЫНДА ИРТЕННЕҢ СЫҒАРА САДЫҒ ПАРЧАТХАН, «СПОРТХА ЧАРЫДЫЛҒАН ОРЫН» АЧЫХТА ЧИИТ ООЛЛАР КӰСТЕРІНЕҢ СЫНАСЧАТХАННАР, СЦЕНАНЫҢ УСТАРЫ ЧАЙААЧЫЛАРЫНАҢ КӦРІГҶІЛЕРНІ ӦРІНДІРЧЕГКЕННЕР. АЙАС КӰН УЛАМОХ ПАЙРАМҒА КИЛГЕН УЛУСТЫҢ КӦҢНІН КӦДІРГЕН. АЛҒЫСТАСТАР ЧИТІРГЕННЕР, АРТЫХТАРЫН ТАНЫХТААННАР.
ПӰӰЛ ПАЙРАМ «ЧЫЛ АЙЛАРЫ» ТЕАТР КӦЗІДИИНЕҢ ПАСТАПҒАН. ОЙЫН ПАСТЫРА АРТИСТТЕР ЧЫЛ ПАЗЫНА КИЛГЕН КІЗІЛЕРГЕ ПОЛҒАН НА АЙ НИМЕ ТАНЫХТАПЧА, НОҒА ІДИ АДАЛЧАТХАНЫН ЧООХТАП ПИРГЕННЕР.
«ЧЫЛ АЙЛАРЫ» КӦЗІДІГ СООНДА АЛҒАС СӦСТЕРІНЕҢ ЧЫЫЛҒАН ЧОНЗАР ХАКАСИЯНЫҢ ПАЗЫ ВИКТОР ЗИМИН АЙЛАНҒАН. ОЛ ЧИР-СУҒҶЫЛАРЫН НАА ЧЫЛНАҢ АЛҒЫСТААН, ПРАЙЗЫ ЧАСКАЛЫҒ, ЫРЫСТЫҒ ПОЛЗЫН ТІП АЛҒААН.
Алынҷа чылығ сӧстер Виктор Михайлович культура тоғынҷыларына читірген. Олар 25 мартта профессиональнай ӱлӱкӱннерін таныхтааннар.
Анаң Хакасияның пазы Виктор Зимин II степеньніг «За заслуги перед Отечеством» орденні «Восточно-Бейский разрез» паза «СУЭК-Хакасия» ООО-лар тоғынҷыларының кӧксілеріне хазаан. Аарлығ сыйыхнаң таныхтаттырғаннар Юрий Андреев, Андрей Гончаров, Владимир Панков паза Андрей Лукин. Хакас книга издательствозының редакторы Ольга Субракова, тӱзімніг тоғызы ӱчӱн, «Хакасия культуразының саблығ тоғынҷызы» аарластығ атха турысхан.
Хакасия пазының алғыстас сӧстеріне республикадағы Улуғлар чӧбі кнезінің пастағы орынҷызы Пётр Воронин хозылған. Ол Хакасиядағы аймах тілліг чонға Наа чыл чахсы ла ниме ағылзын тіп алғаан.
Чыл сай мындағ пайрамда Улуғлар чӧбі, чоныбыстың иң артыхтарын таныхтап, оларға аарластығ аттар пирче. «Чыл кізізі» пӧзік атха турысханнар:
- Светлана Антоновна КОЧЕЛАКОВА, Хызыл хара суғ аалдағы школаның орыс паза хакас тіллері ӱгретчізі. Ол хакас тілі ӱгретчізі мариинда пастағы орын алған паза тиксі Россияда ирткен ӱгретчілернің тӧреен тіллер марииның «Аалдағы ӱгретчі» номинациязында чиңісчі полыбысхан;
- Евгений Николаевич АРАШТАЕВ, Асхыстағы лицей-интернаттың директоры. Аның устаанынаң лицей-интернат 2016 чылда таланттығ олғаннарнаң тоғыс апарчатхан Хакасияның иң артых 20 школазының санына кірген;
- Евдокия Архиповна ЧАПТЫКОВА, Саяногорсктағы олған поликлиниказының имҷі-фтизиатры. Ол республика марииның «Пастағы полызығ пирчеткен имҷілер» номинациязының чиңісчізі;
- Людмила Павловна БОЛКУНОВА, Саяногорсктағы олған поликлиниказының имҷі-психиатры. Ол республика марииның «Пастағы полызығ пирчеткен имҷілер» номинациязында чиңісчі полыбысхан;
- Владимир Гаврилович ЧУЧУНОВ, олаңай кӱресче СССР-ның спорт узы, Хакасия спортының паза физическай культураның саблығ тоғынҷызы. Аның устаанынаң кӱресчі хыстар Наталья Малышева, Надежда Саражакова паза Мария Тюмерекова аймах спорт марығларында чиңіс тутчалар;
- Алёна Аркадьевна АСОЧАКОВА, олаңай кӱресче Россияның спорт узына кандидат;
- Миля Михайловна БОРГОЯКОВА, Ағбандағы библиотеканың тоғынҷызы, ӧкіс палалар ӧскірче;
- Лариса Васильевна СТАРОДУБОВА, Ағбан чуртағҷызы, ӧкіс палалар ӧскірче;
- Татьяна Ивановна ЧЕРТЫКОВА, Піҷі пилтірі аалдаң, ӧкіс палалар ӧскірче;
- Анна Фёдоровна ТАЧЕЕВА,
Хара кӧл аалның чуртағҷызы. Пылтыр июльда ағаа 100 час толған. Ол -5 паланың іҷезі, 8 парханың паза 10 кӧргенектің ууҷазы.
Республикадағы Улуғлар чӧбінің чарадии хоостыра «Чахсы киректер ӱчӱн» орденге «Айас» теелбек студияның хоос устағҷызы, Хакасия культуразының саблығ тоғынҷызы Фаина Ивановна КИШТЕЕВА турысхан.
Ідӧк ӱс кізі «Род поғдархазы» орденнең таныхталған:
- Надежда Николаевна ТЮМЕРЕКОВА, Чоғархы Таштыптағы «Чирім тынызы» культура кінінің директоры;
- Надежда Алексеевна АЛБУТОВА, Истегі Культура туразының директоры;
- Елена Николаевна ТОЛМАЧЕВА, Пии аймааның культура кінінің устағҷызы. Олар Хакасия культуразының тилізіне улуғ хозым итчелер, хакас чонның кибірлерін хайраллирында ӧткін тоғыс апарчалар.
Сыйыхтар читірілген соонда, Хакас филармониязы «Чалахай часхы» концерт кӧзіткен. Кӧрігҷілерні чайаачыларынаң ӧріндіргеннер Евгений Улугбашев, Людмила Арыштаева, Мария Янгулова паза «Ӱлгер» ансамбльның теелбек ӧмезі. Саблығ ырҷыларның кӧглері чонның кӧңнін кӧдірген.
Концерт тоозылғанда, аймахтарның паза городтарның аразында «Чайааннар чоллары» марығ пасталыбысхан. Полған на муниципалитетке пірее чайаанға чарыдылған ойын кӧзіт пирерге кирек полған. Араласчылар марыға ӧнетін сценарий пасханнар, кип-азах тіккеннер, реквизит тимнееннер. Уғаа чахсы Шира аймааның ӧмезі кӧрінген. Олар ойынны толдыразынаң хакас тілінең турғысханнар. Че жюринің чарадии хоостыра чиңісчі полыбысхан Орджоникидзе аймаа, ікінҷі орынға абазадағылар сыхханнар, ӱзінҷі орында - Таштып аймаа.
Анаң сценаа «От ыры», «Голос-Ӱн», «Хысхы саңнары» республика марығларының чиңісчілері сыхханнар. Артисттернің устарына морсынып, кізілер матап айа сапханнар. Чыл пазы 16.00 час соонда ла тоозылған, че чуртағҷылар таразарға маңзырабинчатханнар. Олар пайрам чахсы ирткеннеңер чоохтасчатханнар.
Автор :
Майя КИЛЬЧИЧАКОВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде