ӰЛГӰДЕ ТОҒЫНҶЫЛАР САНЫ ХЫЗЫРЫЛАР
28.03.2017
Хабарлар
Республиканың правительство аппарадын паза Хакасия пазының администрациязын 40-таң асхынах нимес тоғынҷаа хызырарға. Андағ чахығ пирген Хакасияның пазы Виктор Зимин пастағы орынҷызы Олег Намға, правительство аппарадының устағҷызы Лариса Карамчаковаа паза администрация устағҷызы Валерий Денщиковха, чыылығ иртіріп.
- Прайзы пілче, бюджетнең кирек пістің уғаа сидік. Пол парған киректің салтарларынаңар мин кӧп хати чоохтаам. Пӱӱн хорадығларны хызырардаңар чоох апарарға кирек, - пастаан чыылығны Виктор Зимин.
Хакасияның пазы, регионның ахчалығ тоғызының статистика саннарын кӧзідімге ағылып, ирткен чылның салтарларынҷа хомай нимес саннар полғанын таныхтаан. Налогтығ паза налогтығ нимес парыстар, ВРП сині ӧс парған. Тоғыс чох чуртағҷылар синінҷе Хакасия СФО-да ікінҷі орыңда пол парған -1,8 %, пістің инфляция кӧзідіглері хазнада иң тӧбіннернің пірсі, чуртағҷыларның парыстары пір синде тудылча. Олох туста республика социальнай объекттер пӱдіреріне, хазых хайраллир системаа миллиардтар салковай хоратхан.
- Прайзы пілерге кирек, республика пӱӱн 2009 чылдағызының хыринда ікі чарым хати кӧп ахча хоратча. Піс ол ахчаны тоғынып аларына кӧп кӱс хоратчабыс. Кӧп ниме иділген, че амды ӱзӱрлирінең паза экономиканаң айғазарға кирек, хорадығларны хызырарға.
Россияның финанстар министерствозы алнында хорадығларны ӧскірбестеңер обязательстволарыбыс пар, анзы иң пастап устағ аппарадын тударына кӧрілген ахчаа теелче. Олох туста пірее муниципальнай пӱдістер ирткен чылда законҷа кӧрілген синнең хай-хай кӧп ахча хорат салғаннар, бюджет кодексін паза минфиннең чӧптезіглерні сайбап! 114 миллион салковайға кӧп хорадығлар иділген! Иң кӧп хорадығлар Харатасти паза Шира аймаани, ағаа хоза, ол муниципальнай пӱдістер амды пӱдіріл парған олған садтары ӱчӱн санас полбинчалар. Олох туста, постарына иртіре хоратхан ахчаның синін алза, ол ахча олған садтарынҷа сурығны пӧгібізерге чидерҷік. Ноға іди пол парча?
Хакасия пазының чооғынаң, 2016 чылның салтарларынҷа Абаза, Сорығ, Харатас городтар, Орджоникидзе, Таштып, Ағбан пилтірі паза Шира аймахтарының муниципальнай пӱдістері, депутаттарның, табылчатхан должностьтығ кізілернің паза муниципальнай служащайларның чал ахчазына хорадығларҷа чарадыға алылған нормативтерні сайбап, кӧп ахча хорат салғаннар. Таныхтирға кирек, мында чоох олаңай тоғынҷылардаңар парбинча.
Хакасияның минфині пір ле хати нимес киректі тӱзедерге киректелчеткеннеңер сизіндіріглер ыстыр. Аннаңар регион устағҷызы республиканың финанстар министерствозына 2016 чылның салтарларынҷа бюджет кодексін сайбаан муниципальнай пӱдістерге республика бюджедінең трансферттер пирерін тохтадардаңар чахығда хол салыбысхан. Ахча оларға кӧзіділген сайбағларны тӱзеткенҷе пирілбес.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде