ЧАЙААЧЫ УСТАРНЫҢ ӰЛӰКӰНІ
28.03.2017
Хабарлар
Россияда 25 мартта Культура тоғынҷызының кӱні таныхталча. Ирткен неделяда Хакасияның правительство туразында культура сферазында істенчеткен улустың иң артыхтарын чеестееннер.
Чыылған чонны профессиональнай ӱлӱкӱннең Хакасияның пазы Виктор Зимин алғыстаан. Ол таныхтаан: «Культура тоғынҷылары Хакасияа улуғ хозым итчелер. Сірер кізілернің кӧңнін кӧдірчезер, таланттығ оол-хыстарға чол асчазар, чозах-кибірлерні хайраллапчазар. Аның ӱчӱн сірерге улуғ алғызым читірчем». Чооғында Виктор Михайлович «Сибер Ил» чоннар аразындағы форумға хайығ айландырған. Пӱӱл форум читінҷі хати иртірілер. Аны, Россияда ла нимес, хырығ озаринда пӧзік паалапчалар. Тиктең нимес Хакасияның культура министерствозы пу форум ӱчӱн Россия правительствозының сыйиинаң таныхталған. Ӧріністіг хабар прайзының кӧңніне кірген.
Алғыстас сӧстері соонаң культура тоғынҷыларын аарлығ сыйыхтарнаң таныхтааннар. «Хакасияның саблығ хоосчызы» аарластығ ат пирілген, чайаачы ус, таланттығ чир-суғҷыбыс, Россияның Хоосчылар пірігізінің кізізі Виталий Николаевич Кызласовха.
«Хакасия культуразының саблығ тоғынҷызы» аарластығ атха Асхыстағы олған искусство школазының ӱгретчізі Татьяна Николаевна Каменщикова, «Казановка» музейнің директоры Виктория Кимовна Кулимеева, Олған филармониязының хоос устағҷызы Марина Геннадиевна Штарк турысханнар.
13 кізее Хакасия правительствозының Аарластығ пічиин читіргеннер, оларның санында полғаннар Алтай аймааның культура паза кино устанызының пастығы Людмила Ивановна Аршанова, Асхыстағы олған искусство школазының ӱгретчізі Леонид Николаевич Канзычаков, С.П.Кадышевтің адынаң культура кінінің методизі Клара Васильевна Карамашева, Асхыс аймааның культура кінінің хормейстері Анастасия Даниловна Торокова паза Аршандағы олған музыка школазының ӱгретчізі Валентина Ильинична Тюкпиекова.
Пайрам тузында ідӧк аалдағы иң артых культура учреждениелері паза тоғынҷылары марииның чиңісчілерін чеестееннер. Ол марығны Хакасияның культура министерствозы иртірче. Чиңісчі полыбысхан культура учреждениелеріне 100 муң салковайға сертификат пирілче. Аарлығ сыйыхты алғаннар Аршаннар, Мадыр паза Ағбан пилтірі ааллардағы библиотекалар, Бондаревтегі паза Улуғ Чорбадағы культура туралары.
Аалдағы культура тоғынҷылары аразында алынҷа марығ иртірілген. Олар, пічіктер тимнеп, ӱс чылның салтарларын кӧзідерге кирек полғаннар. иң артыхха пис тоғынҷы саналған, оларға сыйыхха 50-ер муң салковай читірілген. «Хакасияның аалдағы культура учреждениелерінің иң артых тоғынҷызы» атха турысханнар:
Таштып аймааның ӧӧн библиотеказының директор орынҷызы Антонина Николаевна Маслова,
Кӧк хайа аалдағы «Синегорье» теелбек ӧмезінің балетмейстері Джамиля Нифтулла кызы Ведерникова,
Наа аалдағы библиотеканың устағҷызы Ирина Анатольевна Полежаева,
Пӱӱр пилтірі аалдағы Культура туразының директоры Ирина Владимировна Шпагина паза Ағбан пилтіріндегі библиотека устағҷызы Светлана Николаевна Петрова.
Халғанҷызын чоох тутхан культура министрі Светлана Анатольевна Окольникова. Ол Хакасияның пазын полызығ ӱчӱн алғыстаан.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде