ЧАРЫТХЫ ПАЗА ЧЫЛЫҒ ӰЗӰРЛИРІНЕҢЕР
29.03.2017
Хабарлар
Хакасияның правительство туразында «Единая Россия» партияның «Хакасияның чарых орамалары» проекті чуртасха кирілчеткені хоостыра семинар-чыылығ ирткен.
Анда муниципалитеттернің паза бизнестің ЖКХ-да паза тасхархы чарытхы тартарында хада-пірге тоғызының сурығлары ӱзӱрілген.
Чыылығда правительствоның, министерство-ведомстволарның кізілері, муниципальнай пӱдістернің пастары, специалисттері паза Томск, Омск, Новосибирск городтарның чарытхы паза чылығ ӱзӱрлир сурығларнаң айғасчатхан компанияларның кізілері араласханнар. Апарған аны Хакасияның Ӧӧркі Чӧбі кнезінің пастағы орынҷызы Юрий Шпигальских.
- Пу чыылығ идінҷектернің паза тураларзар чарытхы, чылығ пирерінең палғалыстығ сидіксіністерні пӧгерге сағынчатхан кізілернің пастаанынаң иртірілче. Чарытхы ӱзӱрлирінең айғасчатхан компаниялар республикаа постарының полызығларын пирерге сағынчалар. Минің кӧрізімнең, пу уғаа кирек ниме. Мында ӱзӱрілген сурығлар хай пірее сидіксіністерні пӧгерге полызар, - теен ол.
Мында чоох парча концессия чӧптезиинеңер. Концессия - ол хаҷан хазна бизнеске чир-чайаан ис-пайынаң, аймах инфраструктура объекттерінең, предприятиелернең тузаланар оңдай пирче. Кӧзідімге, ЖКХ-да алай чарытхы пирерінде инвесторлар постарының ахчазына оборудование алыстырчалар (алай пасха даа тоғыстар итчелер). Кізілер, чылығ паза чарытхы пирілчеткен ӱчӱн, оларға иргі паанаң тӧлепчелер. Инвесторлар, тізең, наа технологиялар полызиинаң ӱзӱрлеп алған ахчадаң парыс аларлар. Чарытхы паза чылығ ӱзӱрлирінең айғасчатхан компанияларнаң орындағы пос устаныс органнарына паза алынҷа бюджет организацияларына (школаа, имнег туразына) тоғынарға чарир. Хада-пірге тоғынарына прай кирексіністер федеральнай законнарда кӧріл парған. Оларның толдырыларын монополиядаң тоғыр служба хайығда тутча.
Амғы туста Хакасияда мындағ оңдайнаң Пиидегі аал чӧбі ле тоғынча. Аның пазы Иннокентий Стряпков тоғыстарының салтарларынаңар, чахсы сариларынаңар, читпестерінеңер чоохтаан. Ол, пасха аал чӧптерінзер айланып, опыдыбыснаң ӱлезерге тимдебіс теен.
Чарытхы паза чылығ ӱзӱрлир компания Пии аал чӧбінде ирткен чылның майынаң тоғын сыхтыр. Амғы тусха ол иргі светильниктерні нааларға тооза даа алыстыр парир. Тоғыс толдыразынаң иділгелек тее полза, амох чахсы салтарлардаңар чоохтирға чарир. Иннокентий Николаевич мындағ саннар адап пирген: 2015 чылда январьда 39600 кВт/ч чарытхы хорадылтыр, аның ӱчӱн 200 муң салковай тӧлелтір. 2017 чылның январьында - 20145 кВт/ч, ағаа 100 муң салковай позыдылған. Пу саннарны кӧріп, наа технологияларнаң тузаланғаны ахчаны ӱзӱрлирге полысча тиирге чарир.
Ідӧк чыылысханнарның алнында хазнабыстың пасха регионнарынаң килген чарытхы паза чылығ ӱзӱрлеҷең компанияларның кізілері чоох тутханнар. Оларның санында «Энергопрофит»
ООО (Новосибирск г.) «Энергоэффективный регион» НП (Омск г.), «Томск-энергосбыт» ОАО (Томск г.). Пу улуғ компаниялар полтыр. Олар Россияның илееде регионында тоғынчаттырлар. Хакасияда постарының істезіглерін апартырларох, аннаңар мында тоғынарға тимдебіс тееннер олар.
Юрий Шпигальских чыылығ соонаң оларнаң хада-пірге тоғыс апарарына ізеніс парынаңар чоохтаан паза аал чӧптерінің пастарына мындағ оңдайнаң тоғыс апарарына хайығ саларға чахаан.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде