ДЕПУТАТТАР ХАКАС ТІЛІН ӰГРЕНЧЕЛЕР
29.03.2017
Хабарлар
Хакасияның Ӧӧркі Чӧбінің, депутады, аграрнай политикаҷа, ас-тамахча паза чирнең тузаланарынҷа комитеттің кнезі Пётр Ворониннің пастаанаң республика парламентінде хакас тілі кружогы иртче. Хакас тілін депутаттар паза парламент аппарадының специалисттері ӱгренчелер.
- Пӱӱнгі кӱнде хакас тілінең чоохтазары модаа кірче тіпчелер, - чооғын пастапча Пётр Иванович. - Піс хакас тілін ӱзінҷі айы ӱгрен парирбыс, аны апарча ХакНИИЯЛИ-ның улуғ наука тоғынҷызы Вия Субракова. Неделяда пір хати пір час чарымға тоғасчабыс. Тілні ӱгренчелер парламент кнезінің пастағы орынҷьвы Юрий Шпигальских, ӱс комитет кнезі, нинҷе-де депутат паза специалист.
Хайдағ хандыра кӧзідім! Сағынчам, ӱгредіг салтарлары пірее чарым чыл пазынаң таныхталар. Республика ӱлгӱзінде хакас тілліг кізілер чидіспинчеткеннеңер сурығ пірее-пірее турыбыслача. Че мында орыс тілліг устағҷылар пос кӧңнінең хакас тілін ӱгренчеткеннері ӧріндірче. Мындағ кӧзідімнер парда, хакасха пос тілін ӱгренмеске, анзына харығ полчатхан сылтағны тілирге дее уйадыстығ поларға кирек. Кізі позы тілні ӱгренерін, аннаң чоохтазарын ӧӧн пӧгіннер санында турғыспаза, кирек орнынаң тибіребес. Арғыс нинҷе дее кӧӧктірзе, пастых хайди даа кӱстезе, кізінің кӧңні чох полар. Аннаңар посха ла чарадығ аларға халча: мағаа тӧреен тілім кирек, мин пос тілінең чоохтазарбын, мин аны ӱгренербін!
Хакас тілін ӱгренҷең кружокты тӧстеп аларға ӱр нимес, минің кӧрізімнең, тіл ӱгретчілері читче. Тиктең нимес Пётр Воронин хакас тілінең чоохтазары модаа кірче теен. Асхыс аймаанда даа, хайда хакастарның ӧӧн чардығы чуртапча, хакас тілі кружоктары тоғынча. Кирексініс пары чахсы нооза. Мындағ кӧзідімнер соонаң тілні хайраллирынаңар сағыссырапчатханнарның чӱреенде дее истіг полар...
Автор :
Наталья СУБРАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде