АСХЫСТА НАА ЧЫЛНЫ УДУРЛАДЫЛАР
29.03.2017
Хабарлар
Пістің чонның кип-чоохтары паза пурунғы киртінізі хоостыра кӧрік айының 22-ҷі кӱнінде, тағ-суғларның ізіктері азылып, оларның ээлері пу чирге сыхча одырлар. Аннаңар пістің чон чыл пасталчатханын таныхтапча.
Асхыста кӧрік айының 26-ҷы кӱнінде Чыл пазын таныхтадылар. Орай даа полза, ӱлӱкӱн тутханнар. М.Е.Кильчичаковтың адынаң библиотека алнында сцена турғызылых, андар сығып, пістің артисттерібіс ойыннарын кӧзідіп пастааннар.
Чыылысхан чонны Асхыс аймааның пазы Абрек Васильевич Челтыгмашев Наа чылнаң алғыстаан. Анаң кибірли, от тамызып, От инезін азырап, хазыңа чаламалар палғааннар. Ол арада чыылысхан чонның хай піреезі садыға сығарылған нимелерні садыс турған. Кӧбізі ізіг чейге, сістеен итке теесте турған. Аннаң пасха даа ас-тамах садылған. Мындох кічіг палаларға аттракционнар полған: батуттар, карусельлер, кічіг поездтер, машиналар. Амғы аппаратуранаң артисттернің ыр-сарыннары, чоохтары ырах чайылча. Кӧрбезең дее, истіп алзаң - хандыра!
Аал чӧптерінің Культура тураларының тоғынҷылары постарының ойыннарын, сарыннарын кӧзідіп толдырғаннар. Оларның соонаң петук ойыннары ирткен. Таңах чылына чарыдып, ааллардаң килген артисттер постарының ойыннарын кӧзіткеннер. Ӧмелер аймах-пасха ойыннар, марығлар иртіргеннер.
Минің кӧңніме кірген Кызлас аал чӧбінің Культура туразының артисттері турғысхан ойын-марығлар. Ӱс ӧӧре Алёна Катаева, Оксана Кайдаракова паза Индира Саражакова, таңахтарға хубулып, уғаа хынығ теелбектер салғаннар, музыказы даа таңах хархлааны хоостыра полған. Анаң оолларны чон алнынзар хығырғаннар. Олар кистілеріне ніске паға палғалған нымырханы кічіг сӱлейке ідіссер кире суғыбызарға киректер. Салбахтапчатхан нымырханы ідіссер орта киріп алар ӱчӱн, кӧӧлҷе одырарға кирек. Ооллар нымырхаларны, кӧстеп, ідіссер сухчатхан арада, таңах-хыстар ээн-аас чоохтар позыдып одырғаннар. Піске, кӧрігҷілерге, ол ла кирек. Піс ноо нимее килгебіс - ойын кӧрерге, хатхырарға, кӧңнібіс
кӧдірерге!
Аннаң андар пасхазы ойыннарын кӧзіткен. Пилтірдегілер меспекті 5 кг чарбалығ хапчыхха орта тоғыландырыбызарынҷа ойын иртіргеннер. Ойын тың даа кӱлкістіг нимес, че аны Наталья Сагалакова апарған нооза. Наталья чонны чоохтарынаң ээреткен. Іди ойын хатхы-кӱлкее айлан парған.
Ойыннар соонаң марығ араласчыларына сыйыхтар читіргеннер. Пастап гиря хапханнарға, тас хаап тастааннарға паза хол пазысханнарға, иң артыхтарына аймахтың спорт паза культура управлениезі Аарластығ пічіктер читірген. Пирікчул аалның физкультура ӱгретчізі Александр Остапович Пахтаев кӱстіг ооллар ағылтыр. Аның олғаннары прай даа марығларда пастағы орыннарға турысханнар.
Сцена устарының иң чахсыларына саналып, пилтірдегілер алнына сыхханнар. Петук ойыннарында оларох алнына сых чӧрібіскеннер, кызластағылар ікінҷізі полыбысханнар. Ӱзінҷі орынға истегілер турысханнар.
Марығлар тоозыл парғаннар, че олғаннар ам даа аттракционнарда ойнааннар. Пулуттығ тигір айастап парыбысхан. Кӱн чылыдып пастаан. Улуғлар даа, ізіг чей ізіп, хаҷаннаң тоғаспаан нанҷыларынаң чоохтас халғаннар, ӱлӱкӱннең таразарға маңзырабааннар.
Автор :
Михаил ИДИМЕШЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде