ЧОРЫХТАРҒА ЧӦРЧЕБІС, ПАЙРАМНАР ИРТІРЧЕБІС
31.03.2017
Хабарлар
Пилтір аалдағы библиотеканаң 2-ҷі школаның ӱгренҷілері чахсы палғалыс тутчалар. Чыл сай Тӧреен тілім ӱлӱкӱнге аймах-пасха марығлар, тоғазығлар иртірчебіс.
Пӱӱл пайрамға 1 № школаның ӱгренҷілерін хығырып алғабыс. Олғаннар ӧткін араласханнар: тілнің тархынынаңар сурығларға нандырғаннар, таптырғастар тапханнар, орыс-хакас тіліне тілбестеглер иткеннер, сарнааннар, хакас чонның ойыннарын ойнап, марығласханнар. Полған на ӱгренҷі Аарластығ пічікнең сыйыхтатхан.
Пу чыл піс наа ниме хосхабыс, аалдағы аға-ууҷаларны чыып аларға хаҷанох сағыста ал чӧрчеткем. Библиотека тоғынҷылары Татьяна Торбостаеванаң Ольга Тодинова мағаа удур парғаннар.
Хығырығҷыларны, таныстарны, хонҷыхтарны хығырғабыс. Чоныбыстың сарыннарын, сағысха киріп, ырлазарбыс тіп сағынғам, че он азыра кізі, чыылызып, чоох-чаахнаң 2 часча одырғабыс. От чейін ізіп, удур-тӧдір чоох пылазып, тус ирткенін дее сизінмин халғабыс. Орыс чоны аразында чуртас тооза чуртап салған хакастар тӧреен тілін ундутпиндырлар, пос тілінең чоохтазарға «ӧзӧк партырлар» тиирге чарир. Сағынчам, мыннаң мындар улуғларыбысты кӧптең кӧп чыып ал турарбыс.
Пірее нимені пастап алза, наа сағыстар постары тӧріпче. Сағын салғам: ӱгренҷілерімні, туғаннарымны, чорыхтарға чыып, Хакасия музейлерінҷе ал чӧрерге. Аға-ууҷаларны даа чирібістің хайхастығ пулуңнарынҷа ал чӧрерге чарир. Іди Пии аймаандағы Сос пилтірі музейзер пастағы чорығыбыс полған. Музей тоғынҷылары Татьяна Тюкпеева паза Мария Ачитаеванаң палғалыс хаҷанох тутчам. Ааллап килзебіс, хаҷан даа мастер-класстар иртірчелер.
Чылығ тоғазығ соонда чылығ ибіҷекте мастер-класс ирткен, чей ізіп, пазағы чорыхха хайдар парарынаңар чӧптескебіс. «Чӱрекке толдыра тынанып алғабыс, сағыстар даа чахсы саринзар айланыбысханға тӧӧй полған. Таңдағы кӱнде чахсы ла нимелер поларына ізеніс халған», - алғыстарын читіргеннер чорыхчыларым.
Автор :
Лариса ЧЕБОДАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде