ПІСТІҢ «ЧЫЛТЫЗАХТАРЫБЫС»
04.04.2017
Хабарлар
ІКІ ЧЫЛ АРАЗЫНА ПІР ХАТИ ИРТІРІЛЧЕГКЕН «ЧЫЛТЫЗАХТАР» ОЛҒАННАР ФЕСТИВАЛЬЫ ИРТКЕН НЕДЕЛЯДА АҒБАНДАҒЫ ОЛҒАН САДТАРЫНЫҢ ПАЛАҶАХТАРЫН ХАТАП ЧЫҒДЫ. 100 АЗЫРА КІЧІГ ПАЛАҶАХ САРЫН САРНИРЫНДА, ТАХПАХ САЛАРЫНДА, ТЕЕЛБЕК ТОЛДЫРАРЫНДА ЧАЙААЧЫ УСТАРЫНАҢ СЫНАСХАН.
«РОСИНКА» ОЛҒАН САДЫНЫҢ ПАЛАҶАХТАРЫ 3 НОМИНАЦИЯДА АРАЛАСХАННАР: «ТЕЕЛБЕК», «ТАХПАХ» ПАЗА «КИБЕЛІС». ПАЙ ПАЗА СІЛІГ КИП-АЗАХТЫҒ ОЛҒАННАР СЦЕНАДА ПІР ДЕЕ ТУРТУХПИН ТУДЫНҒАНЫНАҢ, ТАХПАХТЫ АЙДАС ТОЛДЫРҒАНЫНАҢ КӦРІГҶІЛЕРНІ АПТААННАР ПАЗА СЫЙЫХТЫҒ ОРЫННАРҒА ТУРЫСХАННАР.
Пӱӱл марыға ікі номинация хозылды: ол «Тахпах» паза «Минің сӧбірем». Тахпахха пістің чон хаҷаннаң хынадыр. Аны пістің улуғларыбыс пурунғыдаң толдырҷаңнар. «Минің сӧбірем» номинацияда іҷе-пабалар палаларынаң хада теелбек салғаннар паза сарын толдырғаннар. Сағынчам, пу чапсых номинациялар аннаң андар чуртирлар паза тилирлер.
«Минің сӧбірем» номинацияда пӱӱл ікі сӧбіре араласты: Сарлиннер («Кристаллик» олған сады) паза Кичеевтер («Чайка» олған сады). Марығда олғаннар іҷелерінең хада сарын толдырғаннар. Минің кӧрізімнең, тӧстегҷілер мындағ номинацияны чуртасха кирчеткені уғаа чахсы. Кічіг палалар іҷе-пабаларынаң хада сценада сарын толдырчатханын кӧрерге чапсых полған. Мыннаң мындар пу номинацияда араласчатхан палалар паза оларның іҷе-пабалары хозыларына ізеніс пар.
Ідӧк кічіг иркеҷектер тахпах толдырчатханын кӧрерге морсымнығ полған. Пӱӱл пу номинацияда ідӧк асхынах олған араласты: ікі пала. 6 частығ Айдар Субраков («Росинка» олған сады) пастағызын на сце-наа сыхханнаңар сала чідірінібіспеен. Че кӧрігҷілер, айа саап, аның кӧңнін кӧдіргеннер. Тахпағын хатап толдырып, оолағас айдас тахпахтабысхан! Аның кӱстенгені тикке парбаан, жюридегілер Айдарға ікінҷілебин пастағы орын пиргеннер.
Чылдаң иң кӧп араласчы «Сарын», «Теелбек» паза «Кибеліс» номинацияларда полча. Пӱӱл ідӧк пу номинацияларда иң кӧп араласчы полған. «Кибеліс» номинацияда марығҷыларның аразында иң кічіг араласчы Нелля Бытотова («Калинка» олған сады), «Часхы килді» кибелісті тадырада хығырып, жюридегілернің чӱреен хайылдырған. 3 частығ хызыҷах пу номинацияда иң артых полыбысхан.
Ағбандағы «Василек» олған садының олғаннарынаң теелбек саларында артыхтар табылбаан. Оолғыҷахтар паза хызыҷахтар «Тайғадағы теелбек» теелбекті толдырғаннар. Таныхтирға кирек, 2015 чылда ирткен «Чылтызахтар» фестивальда пу олған садының олғаннары «Дефиле» номинацияда иң артых полыбысханнар. Амды, тізең, теелбек саларында 1-ғы орын алдылар!
«Сарын» номинацияда «Калинка» олған садының оолғыҷах-хызыҷахтары иң артых полыбысханнар. Фестивальда хакас таа, орыс таа палалар кӧп араласхан. Хакас тілін уйан пілчеткен олғаннар кибелістерін туртухпин хығырарға паза чахсы сарнирға сіренгеннер. Хакас кип-азааның аймаа ідӧк илееде полған. «Чылтызахтар» фестивальның ӧӧн пӧгіні - палаҷахтарның чайаачы оңдайларын тилідері паза хакас чонның культуразынаң тирең таныстырары. Сынап таа, мындағ фестивальлар Ағбанда иртірілчеткені уғаа чахсы паза кирек. Мында пір ле ниме таныхтирға сағынчам. Хакасияда кічіг палаҷахтарға пазылған хакас наа сарыннар асхынах. «Чылтызахтар» фестивальда кічіг палаҷахтар хакастарның мының алнындағыох сарыннарын толдырғаннар, хайзын хаҷан-да пістің іҷе-пабаларыбыс алай ба піс толдырғабыс.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде