АДЫ-СОЛАҢНЫ ААРЛАП ЧӦР
04.04.2017
Хабарлар
Ооллар паза хыстар, мин, улуғ частығ ууҷа, сірерзер мындағ чахығнаң айланчам. Чиит тузыңарны хайраллаңар. Ол тус часхыда чарылчатхан хазың пӱрі осхас. Кӧгерчеткен пӱрлер, кӱннің сузына улам чарып, ах хазыңны чазапчалар. Сірер ідӧк, ӧзіп, пістің чоныбысты, чирібісті чазапчазар.
Сағынған сағыстарыңны толдырарға кӱстеніңер. Кізі ит полбас ниме чоғыл. Хайдағ даа сидіктерні тобырыңар. Кізее чахсы ла киректер идіңер, чахсыдаң артых ниме чоғыл. Улуғларны улуғлаңар, кічіглерні айаңар, хызылчатханнарға полызыңар. Ӱгреністе дее, істеністе дее пӧзік чидіглерге чидерге кӱстеніңер.
Тӧреен-ӧскен чиріңерге хыныңар, аны хайраллаңар. Тілібісті ундутпаңар. Пістің чирібіс хайдағ сіліг, андағох иптіг пістің тілібіс. Хайдағ кееркестіг истерге чоныбыстың сарын-тахпахтарын.
Минің олған тузым Илбек Ада чаа тузына киліс парған. Чааға парғалах чииттер, ӧзӧгістіг паза аар чыллар даа полза, кӧглезерге тус тапчаңнар. Піреезі балалайканаң ойнап сыхса, кӱл пырлада теелбек салҷаңнар...
Палаларым, книга кӧп хығырыңар, кӧп ниме пілерзер. Часка хаҷан даа сірерге тоғазар.
Чуртазыңның чолы -
Ол синің не холыңда.
Саба ниме итчем ме тіп,
Син соонзар кӧрчет.
Саба чолҷа парчам ма тіп,
Алҷаастарыңны тӱзет.
Учухчатхан хустар -
Ол синің частарың.
Парчатхан чоллар -
Ол синің чылларың.
Чуртаста ӧрчіліг пол тур,
Ады-солаңны аарлап тур!
Автор :
Полина АРТОНОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде