ПАЗА ПИЛТІРІ ААЛ ПӰӰНГІ КӰНДЕ
05.04.2017
Хабарлар
ТИКСІ ХАЗНАДА 90 ЧЫЛЛАРДА ПОЛҒАН АЛЫЗЫҒЛАР СЫЛТААНДА ХАКАСИЯДА ТАСТАЛ ТАА ПАРИҒАН, ИЗЕЛЧЕТКЕН ААЛЫҶАХТАРНЫҢ ЧУРТАЗЫ ХАЛҒАНҶЫ ТУСТА ЧАХСЫ САРИНЗАР АЛЫЗЫП ОДЫРЧА. АНЗЫ РЕСПУБЛИКАНЫҢ КІЧІГ ПАЗА ЫРАХХЫ ААЛЛАРЫН ХАЙРАЛЛИРЫНҶА ПАЗА ТИЛІДЕРІНҶЕ ХАЗНА ПРОГРАММАЗЫ ЧУРТАСХА КИРІЛГЕНІНЕҢ ПАЛҒАЛЫСТЫҒ. ХАЗНА ПОЛЫЗИИ ПИРІЛЧЕТКЕНДЕ, АНДАҒЫ ЧОН АЛНЫНЗАР ІЗЕНІСНЕҢ КӦРЧЕ.
АСХЫС АЙМААНДАҒЫ ПАЗА ПИЛТІРІ ААЛ ПУ ПРОГРАММАА 2014 ЧЫЛДА КИРІЛГЕН. ПУ ААЛНЫҢ КУРАТОРЫ ХАКАСИЯНЫҢ СПОРТ МИНИСТЕРСТВОЗЫ ПОЛЧА. АНЫҢ ТОҒЫНҶЫЛАРЫ ААЛ ЧУРТАҒҶЫЛАРЫНАҢАР УНДУТПИНЧАЛАР, ӰЛӰКӰННЕРГЕ ОЛҒАННАРҒА СЫЙЫХТАР, ТИМНЕП, АҒЫЛ ПИРЧЕЛЕР.
ХАЗНА ПРОГРАММАЗЫНА КИРІЛГЕННЕҢ ААЛДА КӦП ТОҒЫС ИДІЛГЕН. КӦЗІДІМГЕ, ЧУРТАҒҶЫЛАРНЫҢ ПРАЙЗЫНА ДАА СУҒ СЫҒАРҶАҢ СКВАЖИНА ХАС ПИРГЕННЕР, ААЛ МАЛЛАРЫН КИРҶЕҢ ЧАЙҒЫ ХАЗАА ИДІЛГЕН, СЫЫРАТ ИБІРЕ СИДЕН ТУРҒЫЗЫЛҒАН. ІДӦК ІКІ СӦБІРЕ ТУРА ХЫРЫН АЛЫСТЫРЫП АЛҒАН. МЫНДАҒ ХАЙЫҒ САЛЫЛЧАТХАНДА, ААЛ ІСТІ ДЕЕ ИПТЕЛЧЕ. ТӰРЧЕДЕҢ МЫНДА ТАСХАРХЫ ЧАРЫТХЫ ТОҒЫН СЫҒАР. КИРЕК ОБОРУДОВАНИЕ, СТОЛБАЛАР ПРАЙ ТУРҒЫЗЫЛ ПАРҒАН, АМДЫ ПІЧІКТЕРНІ ТИМНИР ТОҒЫС АПАРЫЛЧА. АПРЕЛЬ ОРТЫЗЫНЗАР ПРАЙ НИМЕ ТИМДЕ ПОЛАРҒА КИРЕК ТІП ЧООХТАПЧАЛАР ААЛ ЧӦБІНДЕ. ТАНЫХТИРҒА КИРЕК, ПАЗА ПИЛТІРІНДЕ НАА ФАП ПӰДІРІЛГЕН, ЧЕ МЫНДА ТОҒЫНҶАҢ СПЕЦИАЛИСТ ЧОҒЫЛ. АННАҢАР ЧУРТАҒҶЫЛАР АСХЫС ААЛЗАР АЛАЙ ПОСЕЛОКСАР ЧӦРЧЕЛЕР.
Хакасияның кічіг паза ыраххы аалларын хайраллир паза тилідер хазна программазы тоғын сыхханнаң, оларда чуртапчатхан, малнаң айғазарға сағынчатхан чииттерге тиліҷең чахсы оңдайлар пирілчелер. Аннаңар даа амғы туста кічіг аалларзар чон айланча. Паза пилтірінде дее чиит сӧбірелер пӱдірчеткен туралар кӧрінчелер. Олар пӱдірігні пос кӱзінең апарчалар.
Хазна полызиинаң тузаланар оңдай, тізең, кӧп палалығларға паза тынағдағыларға пирілче. Оларның санына юрген Анисья Бытотова. Ол Паза пилтірі аалда 15 частығдаң сығара чуртап парир. Ол кічігдең малда, хойда тоғынған. Совет ӱлгӱзі тузында пу орында Калининнің адынаң совхоз полған. Мында істенген чабаннар паза трактористтер, план толдырып, пастағы орыннар алҷаңнар, тиксі Хакас чиріне сабланҷаңнар. Оларға, чахсы тоғынчатхан ӱчӱн, машина аларға талоннар пирҷеңнер тіп чоохтапча Анисья Алексеевна. Позы даа ол совхозта тӱзімніг тоғынған, ағаа «Істеніс ветераны» ат пирілген. Программаҷа тура хырлары алыстырчатханын піл салып, ол, туразын сомға суурып, кирек пічіктерні чыған. Оларны пирібіскен соонаң, Анисья Бытотова 70 муң салковай алған. Пирілген ахчаа ол пӱдіріг материалларын алған, хырны, тізең, оолғы нанҷызынаң хада алыстыр пирген. Ідӧк тынағдағы кізее суғ сығарҷаң скважина хас пиргеннер. Анисья Алексеевна кӧп нимес мал, хойлар тутча. Оларның ӱчӱн ахча алча. Аны чылда ікі хати - часхызын паза кӱскӱзін - тӧлепчеттірлер. «Мындағ полызығ пирілчеткен ӱчӱн Хакасияның пазы Виктор Зиминге паза аал чӧбіне улуғ алғызым читірчем. Мал ӱчӱн алған ахчаа хазааларны тыхтап алғабыс, сызыр садызып алчабыс», - чоохтапча Анисья Бытотова.
Паза тура хырын алыстырарынҷа полызығны кӧп палалығ Дикобаевтер сӧбірезі алған. 5 паланың іҷезі Екатерина Кочелорова Асхыста автозаправкада тоғынча. Че чиит сӧбіре мал тутча, оларны тоғыс чох одырчалар тібессің.
Сағынчам, пу программа мыннаң мындар тӱзімніг тоғынза, аал чуртағҷыларының чуртазы нииктеліп одырар. Ахча тоғынар оңдай пирілзе, чииттер дее тӧреен аалларынаң пасха чирзер кӧспестер. Чиит чон чуртапчатхан ааллар, тізең, чітпестер.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде