ХАДА-ПІРГЕ АЛНЫНЗАР ТАБЫРАХ ПАРАРБЫС
05.04.2017
Хабарлар
Хакасияның пазы Виктор Зимин Тиксі Россияның чон фронтының (ОНФ) республикадағы штаб активінең тоғасхан. Анда араласханнар ОНФ-тың региондағы исполком пазы Анатолий Сунчугашев паза хада кнестері Людмила Растащёнова, Александр Профатилов паза Максим Мареев.
- ОНФ-тың Хакасиядағы пӧлиинің тоғызы мағаа чазыт нимес, - таныхтаан Виктор Зимин. - Республикада халыхтарның, эксперттернің хайии киректелчеткен сфералар кӧп. Хайдағ даа регионның чидии андағы прай чонның чидии полча. Алғыс сірернің тоғызыңар ӱчӱн. Республиканы тилідер киректердеңер сірер уғаа сибер чоохтапчатхан ӱчӱн. Сірер ӱлгӱ органнарынаң хада сидіксіністіг сурығларны пӧгерге харасчазар. Анзы уғаа чахсы, піс сірернең хада тоғынарға тимдебіс. Сірернің институдыңар чонның улуғ киртінізінең тузаланча.
Регионның устағҷызы тоғазығ араласчыларын Хакасия экономиказының ирткен чылдағы салтарларынаң хысхаҷахти таныстырған. Кӧп кӧзідімнерҷе республика СФО-дағы регионнардаң артых кӧрінче.
Анатолий Сунчугашев ОНФ кізілері хайдағ проекттерҷе тоғынчатханнаңар искірген: хомай чолларны сыныхтиры, чон хайди имнег полызиин, льготалығ имнер пирілчеткенін паалапчатханы, чарадылбинчатхан орыннарда сӧп-сап тӧкчеткенін чох идері, аалларда арығ ісчең суғ пирер сурығлар.
Пірее сурығлар тоғазығдох пӧгіл парған. Іди Хакасияның пазы Асхыс станциядаң Паза Пиизі аалға теере чолны иптебізерге транспорт паза чол хонии министерствозына чахығ пирібіскен.
Ідӧк тоғазығда аалдағы культура тоғынҷыларына теелчеткен сурығ ӱзӱрілген. Муниципалитеттерде пу сферада тоғынчатханнарға чал ахчазын удаа тузында тӧлебинчелер. Федеральнай законодательство хоостыра отрасльны республика бюджедіне пирерге чарадылбинча. Пу сурығны пӧгер пір ле оңдай пар -ааллар пастарынаң чӧптезіг идіп, аалдағы культура учреждениелерін аймахтар синіне пир саларға (чал ахчазын тӧлирінҷе). ОНФ кізілерінің кӧрізінең, ол оңдай прайзын тӧӧй ит саларға паза ахчаны сыныхтағда тударға хабазар.
Хакасияның пазы ол сурығны чарадар оңдай табарға молҷаан.
- Пу тоғазығ минің кӧңніме кірген. Пір чылға піс прай сурығларны пӧк полбаспыс, че хада алнынзар табырах парарбыс, - теен Виктор Зимин.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде