АҒБАНДАҒЫ ЗООПАРК ӦҢНЕНЧЕ
05.04.2017
Хабарлар
Хакасияның пазы Виктор Зимин тоғыс чорығынаң республикадағы «Тіріг чир-чайаан кінінде» пол килген. Аннаң хада республиканың чир-чайаан ис-пайы паза экология министрі Алексей Сиорпас паза кін директоры Геннадий Лагутко аң-хустарны тутчатхан наа орыннарны кӧргеннер паза зоопаркты иптирінҷе кӧрілчеткен тоғыстардаңар искірігнең танысханнар.
- Зоопаркта республика чуртағҷылары, аалҷылар, улам на олғаннар, аң-хустар чуртазынаңар кӧп хынығ ниме піліп алчалар, - чарытхан зоопаркты кӧрген соонаң республика пазы. - Аңнарны тутчатхан орыннар чахсыландырылча , «Тіріг чир-чайаан кінінің» тиліс чолы пар. Аны пістің улуғларыбыс тӧстееннер, пістің алныбыста, тізең, пӧгін - оларның киректерін узарадарға, зоопаркты тилідерге. Пос киреен пілчеткен специалисттер тоғынчатханы махтағлығ.
Пӱӱнгі кӱнде зоопаркта ікі арсыл аңа алғым орын пӱдірілче, анаң теес чидер абаларға. Наа орынға кирілгеннер албығалар паза сурикаттар. Суғ хустарының орны сӱлейкенең чабылған, черепахаларға, крокодилге наа аквариумнар турғызылған. Тиксі зоопарк чирінде чоллар хатап асфальтнаң тӧзелгеннер. Ибіркі чирнің кӧрімін алыстырарынҷа хоосчыларнаң тоғыс узарадылар.
Хорғыс чох полар ӱчӱн, хуруғ от чыы тартылған. Кӧп тоғыс аалҷыларның тынанарын истіг идеріне кӧстелген: суғ ісчең фонтаннар, олғаннарға ойнаҷаң орын турғызылған. Ідӧк зоопаркта чайғы библиотекаа хырлалған орын тимнелген. Олғаннарға паза пір ӱтертістіг орын тимнелче.
Пӱӱнгі кӱнде зоопаркта 170 аймах аң саналча, хустар паза чылан-килескілер - 600 аймах кӧрім, кӧбізі Хызыл киндее кирілген. Аң-хустар саны тӧреміл хозылча.
Алексей Сиорпастың искіриинең, пӱӱл «Тіріг чир-чайаан кініне» 45 чыл толча. Ағаа удур улуғ тимнегліг тоғыс парча.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде