ЧИР УЧАСТОКТАРЫН ТИККЕ ПИРЕРДЕҢЕР НАА ЗАКОН ПОЛАР
07.04.2017
Хабарлар
Хакасияның Ӧӧркі Чӧп кнезі Владимир Штыгашев 5 апрельде парламент президиумының чыылиин иртірген. Депутаттар чыылығда 18 сурығ кӧрібіскеннер.
Ӧӧн сурығлар аразында чир участоктарын тикке пирердеңер закон проекті полған. Ідӧк Ӧӧркі Чӧп президиумы ветеринариядаңар республика законынзар алызығлар кирерін кӧрібіскен. Ол алызығлар Хакасиядағы ӧлген маллар сӧӧгін чығҷаң ээзі чох орыннарға теелче.
Ӧӧркі чӧптегілер пастағы сурығлар санында «Ветеринариядаңар» республика законынзар алызығлар кирердеңер закон проектін кӧрібіскеннер. Хайди чарытхан Хакасияның хазна ветеринария инспекциязының устағҷызы Гульнара Керимова, законзар алызығлар кирері ӧлген маллар сӧӧгін чығҷаң орыннарнаң палғалыстығ. Чоох парча консервация оңдайынаң чабылған паза ээзі чох орыннардаңар. Республикада андағ 58 «сыырат» пары санға алылтыр. Оларны чох идер ӱчӱн, республика правительствозына килістіре полномочиелер пир салары киректелче. Алызығлар ӧӧнінде анзына теелчелер тіп искірген Керимова.
- Хорғыстығ чуғынҷах ағырығларнаң ағырыбызып ӧлген малларны чыған орын полза чи? Мьінда хорғыс чоғыл ба? - сурығ пирген Ӧӧркі Чӧп кнезі Владимир Штыгашев.
Хазна ветеринария инспекциязының устағҷызы ол орыннар хайди даа пастап сыныхталар, анаң на, хорғыс чох полза, чох иділер тіп ізендірген.
Пазағы сурығ Хакасияның хайди даа итчең имнег страхованиезі территориальнай фондының бюджеді 2016 чылда хайди толдырылғанына чарыдылған. Фонд директоры Любовь Бурнакованың сан пирістіг чооғын истіп алған соонаң, Ӧӧркі Чӧп кнезі Владимир Штыгашев имнег киреенің ағырсымнығ сурығларына хайығ айландырған: имҷілер чидіспинчеткеніне, льготалығ имнернең сидіксіністер полғанына. Аның кӧрізінең, ФОМС-ха пу кӧстеглерҷе ахча ла позытпасха, ідӧк олар хайди толдырылчатханын сыныхтағда тударға кирек. Любовь Бурнакова сыныхтағ оларның полномочиелеріне кірбинчеткенін таныхтаан, че сизіндірігні санға аларға молҷаан.
«Хакас Республиканың чирінде чуртағҷыларның алынҷа категорияларына чир участоктарын тикке пирердеңер» республиканың наа закон проектінең Ӧӧркі Чӧптің аграрнай политикаҷа, ас-тамахча паза чирнең тузаланарынҷа комитедінің кнезі Пётр Воронин таныстырған. Ол амды тоғынчатхан 25 № республика законын кӱзін чідіргеніне санирға тіп чӧп кирген.
- Чир законодательствозында пол парған прай алызығларны піс наа закон проектінзер кир салғабыс. Аны тимнирдеңер чарадығ амғы законзар илееде кӧп алызығлар кирерге киректелчеткені хоостыра алылған. Тӱзімніг полған наа редакциялығ закон тимнебізері, - таныхтаан Пётр Воронин.
Наа законда чир участоктарын пір хати тикке алып алар праволығ чуртағҷыларның прай категориялары хайраллалтыр. Наа нимелер аразында законда чир участоктарының сині кӧзіділ парғаны.
- Пос чуртын пӱдіреріне пирілчеткен чир участоктарының иң кічіг сині 1 муң квадрат метр тіп турғызылған, иң улуғ сині - 2 муң квадрат метр, - искірген комитет кнезі.
Ідӧк депутаттар чыылығда федеральнай закон проекттеріне ӱндезер паза пасха регионнарның закон сығарҷаң пастағларына, айланыстарына хабазар сурығларны кӧрібіскеннер. Кӧзідімге, Астрахань облазының Думазы Россия правительствозынзар сидік чуртас оңдайларына кір парған палаларны чайғы олған лагерьлерінзер ызарына федеральнай бюджеттең субсидия пирерге сурыныснаң айланча. Ирткен чылда регионнарға пу кӧстегҷе ахча позыдылған тіп чарытхан Ӧӧркі Чӧп кнезінің орынҷызы, бюджетче комитеттің кнезі Сергей Комаров. Хакасияа андада 50 миллион салковай пирілтір. 20І7 чылға федеральнай бюджетте андағ тӧлеглер кӧрілбиндір. Аннаңар Астраханьдағы депутаттар регионнарға пу кӧстегҷе ахча позыдарын узарадарға сурынчалар.
- Астрахань облазы Думазының депутаттары айланызына хабазарға кирек, федеральнай кіннің полызии чох піске дее сидік килізер, - таныхтаан Владимир Штыгашев.
Халғанҷызын президиум Ӧӧркі Чӧптің сессиязын 27 апрельде иртірердеңер чарадығ алыбысхан. Иртер сессияның кӱн суриинзар ідӧк Хакасия пазының сан пирізі кирілген. Регион устағҷызы депутаттарға республика правительствозының 2016 чылдағы тоғыс салтарларынаңар искірер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде