ИЛБЕК ЧИРІБІСТІ ХАЙРАЛЛААЛАР
25.04.2017
Хабарлар
Пӱӱл Экология чылы чарлал парған, аннаңар мин пос кӧрізімнең ӱлезерге сағынчам. Ирткен 1950 - 1960 чылларда амғы осхас целлофан, пластик, сӱлейке, капрон ниме-ноолар чох полған. Чир ӱстӱнде пӱӱнгі тустағы чіли сӧп-сап чайылбаҷаң. Олох туста ол чылларда кізі артысчатхан похсахты хазна чыы тартчаң.
Мин кічіг полғанда, хаңаалығ аттығ кізі аал аразынҷа, полған на тура хыринда тохтап, кізілернің кирек чох, иргі кип-азаан чығҷаң. Ідӧк піс сӧӧктерні, таап, чығҷаңмыс. Аны олох кізее пирҷеңміс, ахчазы ойнаҷахтар аларға читчең. Соонаң чаҷын, сӧӧк, тимір ал сыхханнар. Чахсы полған: кізі ахчалығ, сӧп-сап чоғыл.
Амғы туста экология программазынаң позыдылчатхан ахчаа чон тастаан целлофан, пластик, сӱлейке бутылкаларны паза даа пасха ниме-нооларны турыстығ арах паалап чығзалар, тузазы даа улуғ поларҷых. Ол оңдайнаң суғ хазы, чазы-арығ аразы табырах паза чахсы даа арығлал парарҷых. Кізілер амғы оой нимес туста ахча тоғынып аларға кӱстенерҷіктер. Маңат сағын кӧрзе, ол прай саринаң тузалығ кирек полар. Целлофанны, капронны чығҷаң пірее идінҷек табылған полза, тротуар плитказын даа, пасха нимелерні дее идерге чарир.
Чирібіс илбек, че хайдар даа кӧрзең, сӧп-сап чайылча. Хайраллаалар чирібісті! Сӱӱмектер тігіп алза, аннаң садығ туразынзар кӧп хати чӧрерге чарир. Ноо кирек полған на сай целлофан пакедін ал турарға? Санап кӧрзе, кізі ағаа кӧместең илееде ахча хоратча. Полған на кізі сиберли сағынып алза, ахчазы даа ӱзӱрлелерҷік, чир ӱстӱ дее похсахталбасчых. Одырчатхан салааны узурбаалар!
Піске ноо ниме читпинче? - Сағынарға, идерге, пазох хати идерге! Тілге пызарға мин дее оңнапчам - кӧрчезер. Че мин чуртазымда сӧп-сапты хаҷан даа орта чыы тартарға кӱстенчем.
СУУҶАХ
Тағ тӧзінде, ӧзенде,
Халын ағас аразынҷа,
Сиденнер кистінҷе
Хайхастығ сууҷах,
Хорлап, суулап,
Тудығ чох ахча.
Тіріг.
Хайдағ ниме ол полҷаң?
Тохтабинча.
Аххлача.
Мин кічігдӧк ол ахчаң.
Киріп пардым ам...
Аххлача... тоозылбинча.
Ӱзілбинче...
Прайзын ол суғарча...
Аңнар, хустар, маллар,
Хурт-хоостар,
Ағастар, оттар,
Кізілер...
Кӱннең ойнап, пулут полып,
Прай чирлерҷе чӧр килче,
Наңмыр полып,
Чулыҷахча
Пазох, хатап хорлапча.
Кірлебеңер сууҷахты,
Хайраллаңар хаҷан даа!
Сӧп-саптарың тастабаңар,
Чоон ма, кічіг бе тазыҷахтар
Кӧрін турзыннар тӱбінде.
Автор :
Зинаида ТОЛМАЧЁВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде