ХАКАСИЯА КӦНІ ТЕЕЛЧЕТКЕН СУРЫҒ
05.05.2017
Хабарлар
Хакасияның Ӧӧркі Чӧп президиумы 3 майда теестегі чыылиин иртірген. Ӱзӱрілген сурығларның кӧбізі федеральнай закон проекттеріне ӱндезердеңер полған. Оларның пірсіне кӧп хайығ салылған - Саха (Якутия) Республика депутаттарының чир ис-пайынаңар федеральнай законзар алызығлар кирер закон проектіне. Кӧдірілчеткен сурығ Хакасияа кӧнізінең теелче тіп таныхтаан Ӧӧркі Чӧп кнезі Владимир Штыгашев.
Якутияның депутаттары чир ис-пайынаң тузаланчатханнар регионнарының чуртас-экономика тилізінде аралассыннар тіп чӧпнең Хазна Думазынзар айланғаннар. Анзына чир ис-пайынаң тузаланарына пирілчеткен лицензияда ол кирексіністер прай пазыл парарға кирек тіп санапчалар якуттар. Хайди чарытхан Владимир Штыгашев, пӱӱнгі кӱнде регионнар чир ис-пайынаң тузаланҷаң сферада хайдағ-да чарадығ аларынаң тастыхти хала парғаннар, прай сурығлар федеральнай ӱлгӱ органнарының холында. Чир ис-пайын аныпчатхан ӱчӱн налог прай федеральнай бюджетсер парыбысча. Регионнар, тізең, хайзыларының чирінде ол чир ис-пайы анылча, ол ахчаны кӧрбиндеечелер. Андағох кирек Хакасиядағы хара тас аныпчатхан разрезтернең.
- Пу сурығ Законодательлер чӧбінің чыылиинда кӧдірілген полған. Анда-да Якутияа федеральнай закон проектін тимнирге чӧп пирілген, -таныхтаан Ӧӧркі Чӧп кнезі Владимир Штыгашев. - Закон проектіне хабазарға кирек. Закон алыл парза, чир ис-пайынаң тузаланчатханнарға регионнарның паза муниципалитеттернің кирексіністерін санға ал турарға киліс турар. Оларға хайзы социальнай сурығларны пӧк турарға килізер - чоллар, школалар, имнег тураларын пӱдірерге.
Ӧӧркі Чӧп президиумы, пу сурығнаң толдыразынаң чаразып, Якутияның де
тимнеен федеральнай закон проектіне хабазарға чаратхан.
Ӧӧркі чӧптегілер ідӧк тиңнестіріг оңдайынаң Кемеров облазының 2017 чылға бюджедінең танысханнар.
- Кемеров облазы дефицит чох бюджетке сыххан. Оларның пір ле тӱзедіг - хара тас аныпчатхан предприятиелердең парыс ӱчӱн алылчатхан налог ахчазы 30 миллиардха теере ӧскірілгені, - искірген Ӧӧркі Чӧп кнезінің орынҷызы Сергей Комаров мониторинг салтарларынаңар.
Хайди ол чарытхан, Кемеров облазында пӱӱл 216 миллион тонна хара тас анылар тіп кӧрілче. Андағ оңдайнаң андағы разрезтердең 30 миллиард салковай парыс ӱчӱн налог ахчазы кірер тіп сахталча. Сергей Комаровтың таниинаң, андағы хара тас аныпчатханнар пір тонна хара тас ӱчӱн налог ахчазын кӧп арах тӧлепчеттірлер.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде