ЧИҢІС КӰНӀН ИРТІРЕРГЕ ПРАЙЗЫ ТИМДЕ
05.05.2017
Хабарлар
Хакасияның правительство туразында регионның устағҷызы Виктор Зимин Чиңіс кӱнін таныхтирына тимненіс хайди парчатханына чарыдылған чыылығ иртірген. Анда республиканың министерство-ведомстволарының устағҷылары, прай город-аймахтарның муниципальнай пӱдістерінің пастары араласханнар.
Хайди Виктор Михайлович таныхтаан, Илбек Ада чаадағы Чиңістің 72 чылы чағдап килді. Прайзының пӧгіні - Илбек Ада чаа ветераннары алнында ол кӱнні турыстыра иртірібізері. Ӱлӱкӱн алнында кӧп тоғыс толдырыл парған. Амды алынҷа хайығ саларға кирек полар Чиңіс паркындағы Успас отсар веноктар паза чахайахтар салар мероприятиее. Ағбанда Пастағы май площадьында чааҷылар частьтары, Хакасияның кӱс структуралары, Саяногорсктағы Сергей Медведевтің адынаң 3 № школаның кадеттері, ідӧк пастағызын на юнармеецтер маршнаң парарлар. Россияның арачыланыс министрі Сергей Шойгу тӧстеен «Юнармия» чаа-патриот чӧріміне чииттер кӧп кірчелер. Ол чӧрім чиит тӧлні Чир-сууна хынарға, патриотизмге ӱгредерге тӧстелген.
Анаң чаа техниказы парадта парар. Ӧӧн репетиция иртіріл парған, прай араласчылар пӧзік тимненіс кӧзіткеннер. Ідӧк Ирт тағдағы Сабланыс аллеязында иртірілчеткен мероприятиелерге улуғ хайығ салылар. Кибірге кір парған оңдайнаң анда Чиңіс кӱніне чиит ағастар одыртчалар. Че амға теере ол мемориал комплексіне чарытхы пирер сурығ пӧгілбеен, ідӧк анда комплексті хадарар сурығны чарадарға кирек.
Илбек Ада чаа ветераннарына турыстыра социальнай полызығ пирердеңер ундубасха кирек. Хомзынысха, чылдаң чылға оларның саны хызырылча...
Виктор Зиминнің соонда Хакасия пазының орынҷызы, «Чиңіс» оргкомитеттің устағҷызы Владимир Крафт чоох тутхан. Аның чооғынаң, прай структуралар Чиңіс кӱніне матап тимненгеннер, планнаң кӧрілген прай тоғыстар толдырыл парған. Илбек Чиңіс пістің чонның хада-пірге пик тудынызының тании полча. Ідӧк ол чоныбыстың хайдағ даа сидіксіністерні тобыр полар хылиин кӧзіткен.
Оргкомитет, ікі чыылығ иртіріп, тоғыстар хайди апарылчатханын ӱзӱрген. Пӱӱл автомобильлер чӧрізі акцияны ирткен чыллардағызынаң ирте иртірерге чарадығ алылған. Анзы ӱлӱкӱнге пасха тоғыстарны толдырар пӧгіннең иділген. «Ӧлімі чох полк» акцияның чӧрізін тимнир тоғыс апарылған, пасха даа тимненіс мероприятиелері ам даа иртірілче.
Владимир Александрович, чооғын тоозып, тимненіс тоғыстарында араласчатхан прай муниципальнай пӱдістердегі организацияларға, халых пірігістеріне, чиит улусха, ветераннар чӧптеріне алғызын читірген.
Чыылығда полған на министерство-ведомствоның устағҷызы, муниципальнай пӱдістернің пастары хайдағ тимненіс тоғыстарын толдыр салғаннаңар сан пиріс тутханнар.
Хакасияның Ветераннар чӧбінің кнезі Галина Трошкина Илбек Чиңістің 75-ҷі чылына амох тимненерге кирек теен. Ол Совет Союзының Матырларына, «Слава» орденнің толдыра кавалерлеріне бюсттар турғызар чӧпнең сыххан. Хакасияның пазы ол сурығны хайди даа кӧрерге молҷаан.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде