ОЛАР ПІСКЕ АМЫР ЧУРТАС СЫЙЛАП ПИРГЕННЕР
12.05.2017
Хабарлар
ИЛБЕК АДА ЧААДАҒЫ ЧИҢІСТІҢ 72-ҷі ЧЫЛЫ ПІСТІҢ ХАЗНАДА ПАЙРАМНИ ТАНЫХТАЛДЫ. ЫРАХХЫ ВОСТОКТАҒЫ ГОРОДТАРДА ПАСТАЛҒАН ПАЙРАМНЫҒ МЕРОПРИЯТИЕЛЕР ХАКАСИЯА ЧИТКЕННЕР. ХАЗНАНЫҢ ИҢ ААРЛЫҒ, ИҢ УЛУҒ ӰЛӰКӰНІНЕ ПРАЙ ЧОН АЗЫНАДА ТИМНЕНГЕН. ИЛБЕК АДА ЧААНЫҢ ВЕТЕРАННАРЫ, ТЫЛ ІСТЕНҶІЛЕРІ ПУ КӰНДЕ, КӦКСІЛЕРІНЕ ОРДЕН-МЕДАЛЬЛАРЫН ХАЗАНЫП, ЧИҢІС КӰНІН ТАНЫХТАПЧАТХАН ОРЫННАРЗАР ПАРЧАЛАР,
ОРЫННАРДАҒЫ ӰЛГӰЛЕР ОЛАРҒА ХАБАЗАР ПРАЙ ОҢДАЙЛАР ПИРЧЕЛЕР. ХОМЗЫНЫСХА, ЧЫЛДАҢ ЧЫЛҒА ЧАА АРАЛАСЧЫЛАРЫНЫҢ, ЧАЛЫННЫҒ ЧААНЫҢ ХЫЙАЛЫН, ЧОБААН КӦРГЕННЕРНІҢ САНЫ ХЫЗЫРЫЛЫП ЛА ОДЫРЧА. ОЛАРНЫҢ МАХАЧЫ ЧААЛАСХАНЫН, ТЫЛДА ІСТЕНІП, ЧИҢІСТІ ЧАҒДАТХАННАРНЫ ПІС ХАҶАН ДАА УНДУТПАСХА КИРЕКПІС. ОЛ ХАН ТӦГІСТІГ ЧААНЫҢ ТАРХЫНЫН АЛЫСТЫРАРҒА КӰСТЕНЧЕТКЕННЕРДЕҢ ТОҒЫР ХАТЫҒ КӰРЕЗІГ АПАРАРҒА КИРЕК...
ПІР ДЕЕ КӀЗӀ УНДУЛБАЗЫН
Чиңіс паркында Хакасияның ӱлгӱзіндегілері, кӱс структуралары паза организацияларның тоғынҷылары хумартхы тас алнынзар чахайахтар паза веноктар салғаннар.
9.00 часха Успас от алнында чон чыылыс парған. Ағбандағы тимірчолҷылар бригадазының тӧрт чааҷызы Успас оттың пулуңнарында турыбысхан. Оларның хыринда юнармеецтер турғаннар.
Ведущай Россияның саблығ артизі Руфина Потапова митингті азыбысханда, Познанскай бригаданың знамялығ ӧмезі мемориал комплексінзер кірген. Аннаң майор Денис Нефедов устаан. Убӱрҷең оркестр «Встречный марш» толдырған.
Илбек Ада чаа тоозылғаннаң кӧп чыллар ирт парған даа полза, пістің чон Илбек Чиңісті хаҷан даа таныхтир. Піс чаа араласчыларының махачызын хаҷан даа ундутпасха кирекпіс. Ол чобағлығ киректерні прай тӧллер пілзіннер. Хан тӧгістіг чаа полған на сӧбірее теелген.
Чааҷылар сабланызы мемориалзар веноктар саларын Хакасия пазы Виктор Зимин пастаан. Ол туста ведущай чаадаңар кибелістер хығырған. Анаң веноктарны салғаннар Ӧӧркі Чӧп кнезі Владимир Штыгашев,
Федерация чӧбінің кізізі Евгений Серебренников паза Илбек Ада чаа ветераннары. Ідӧк хумартхылас мероприятиезінде Ағбан город пазы Николай Булакин, Ағбандағы епархияның кізілері, Хакасиядағы ӧӧн федеральнай инспектор Виктор Чернышев, Ағбандағы чааҷылар гарнизонының пастығы полковник Сергей Буланов паза Хакасияның кӱс структураларының устағҷылары араласханнар. Халғанҷызынзар чааҷылар, салют толдырып, автоматтардаң киизер атханнар, Россияның паза Хакасияның гимннері толдырылған. Хумартхылас мероприятиезі соонаң паркта «Чиңіс кӱні» кӧг чайылған.
Улӱкӱнде Чиңіс паркында ікі сценада концерттер ирткен. Мында чаа тузындағы сарыннарны истіп аларға чарир полған. Хакасияның артисттері Константин Симоновтың кибелізінең салылған «Сахта мині» сарынны толдырғаннар. Ағбанның чуртағҷылары «На безымянной высоте» сарынны ырҷыларнаң хада сарнааннар. Концертте чаа тузындағы пасха даа сарыннар толдырылған.
Чиңіс кӱнінде аймах-пасха площадкалар тоғынғаннар. Ветераннар «Фронттағы тынағ» площадкада чоох-чаахнаң алызып тынанғаннар. «Корпункт» площадкада чаа тузындағы газеталарны хығырып аларға чарир полған. Олғаннар чаа техниказынаң хынып танысханнар паза блиндажта полып алғаннар.
Кӧрігҷілернің хайиин «Чиңіс» ойын тартхан. Анда совет чааҷылары Рейхстагты хайди алғаннарын кӧзіткеннер. Рейхстаг ӱчӱн чаалазығлар тӧрт кӱн паза хараа, 28 апрельдең 1 майға теере, парған. Аны холға кирердеңер чахығ атығҷыларның 79-ҷы корпузына пирілген. Корпус командирі, генерал-майор Семён Переверткин полған. Чааҷыларға Шпрее суғны кизерге киректелген. Суғны Мольтке тахтаҷа кис парыбызарға ыырҷының пулеметтары паза артиллериязы пирбееннер. Че совет войсколары артиллерия атызынаң пулеметтар атчатхан орыннарны чох идібіскеннер. 29 апрельде капитан С.А.Неустроевтің паза улуғ лейтенант К.Я.Самсоновтың батальоннары, Шпрее суғны кис парыбызып, алнындағы квартал ӱчӱн чаалазып пастааннар. Іди совет войсколары Рейхстагсар читкеннер. Че аны холға киріп аларға оой полбаан. 30 апрельде таң чарир алнында 756-ҷы и 674-ҷі полктарның подразделениелері фашисттернің ӧӧн туразын холға киріп аларға кӱстенгеннер. Че оларны ыырҷы тохтадып алған. Иирде капитан С.А. Неустроевтің, капитан В.И.Давыдовтың паза улуғ лейтенант К.Я.Самсоновтың батальоннары Рейхстагтың ӧӧн чардығын холға киріп алғаннар. Пазағы кӱнде, 1 майда, А.П.Берест, М.А.Егоров паза М.В.Кантария Рейхстаг ӱстӱнде 150-ҷі дивизияның знамязын кӧдіргеннер.
Кӧзідіг тузында ол чаалазығлардаңар мындағ искіріглер толдыразынаң пирілгеннер. Кӧрігҷілер ойынны хынып кӧргеннер. Халғанҷызынзар чиңістеңер чоохталғанда, олар матап айа сапханнар.
ПАСТАҒЫ МАЙ ПЛОЩАДЬЫ
Пу кӱннерде республикада чилліг кӱннер турған, наңмыр даа чаап парыбысчатхан. Аннаңар 9 Майны чуртағҷылар сала чочынып сағааннар. Улӱкӱнге тимненіс тоғыстарын апарған оргкомитеттің устаа, наңмыр чағза, Пастағы май площадьында чыылған суғны хыйа идерге азынада цистерналығ техника тимнеп салған. Хараазын Ағбанда наңмыр чаап парыбысхан. Че, иртен пулуттығ даа полза, кӱн кӧріне тӱсчеткен, соох чил ӱбӱрчеткен.
Иртеннең город чуртағҷылары пайрам иртірілер орыннарзар тартыл сыхханнар. Пастап андағ мероприятие Чиңіс паркында иртірілче, чон андар парча. «Ӧлімі чох полк» чӧрімде аралазарға сағынчатханнар «Ағбан» спорткомплекс хыринда чыылысчалар. Пастағы май площадьында правительство туразының ікі саринда чаа техниказы турча. Олған-узахха ниме кирек - ол техниканы кӧріп, тутхлап аларға. Андар кізілер иртеннең сӧбірелерінең парчалар, палаларын чидініп, кічіглерін пабалары иңнілеріне одыртып алчалар.
Чаа техниказынаңар чоохтаза, анда «Тигр» бронемашина, бронетранспортёр, танктардаң тоғыр кӱресчең ракеталығ комплекс «Конкурс», залпнаң реактивнай ракеталарнаң атчаң «Град» паза «Ураган» системалар, зенитно-ракетнай «С-300» комплекс турчалар. Олғаннар, техника ибіре чыыл парып, андар морсынып кӧрчелер, піреезі техника ӱстӱне сығып аларға кӱстенче, че чааҷылар оларны техника істінзер позытпинчалар.
Правительство туразының кірлезі алнында улуғ трибуна турғызылых, аның ікі саринда ветераннарға одырчыхтар тимнел парған. Лениннің хумартхы тазы алнында кӧрігҷілерге трибуна турча. Азынада килген кізілер анда орын таапчалар. Че чонның кӧбізі аның хыринда решёткалығ сиден кистінде чыылча.
Чиңіс паркында Чааҷылар сабланызы мемориал хыринда хумартхылас мероприятиелері иртірілген соонда, Пастағы май площадьында митинг паза парад пасталча.
ПАЙРАМНЫҒ МИТИНГ
Площадьта чаа тузындағы кӧглер толдырылча. Ведущайларның искіриинең, площадьча пастағызын на Кии-хан тигір кӱстерінің 24-ҷі зенитно-ракетнай бригадазының чааҷылары, Саяногорсктағы кадеттер паза «Юнармия» чииттернің патриот чӧрімінің араласчылары иртерлер.
Пу чӧрімні Россияның арачыланыс министрі Сергей Шойгу тӧстеен, андар чииттернің хазнадағы аймах пірігістері кіргеннер. Чӧрім чииттерні патриотизмге, интернационализмге, ынархасха тартар пӧгіннең тӧстелген. Ағаа хоза, Хакасияның пазы Виктор Зимин 2017 чылны Чииттер чылы тіп чарлабысхан.
Устағчылар одырчатхан трибунада Виктор Зимин, Хакасияның Ӧӧркі Чӧп кнезі Владимир Штыгашев, республиканың Ветераннар чӧбінің кнезі Галина Трошкина паза Россияның Федерация Чӧбінің кізізі, генерал-полковник Евгений Серебренников (ол чаачы кип-азаан кис салтыр. - Авт.) полғаннар.
Чыылған чонзар Хакасияның пазы Виктор Зимин айланған:
- Аарлығ фронтовиктер, тыл істенҷілері, чир-суғҷылар паза Хакасияның аалҷылары! Прайзын Илбек Чиңіс кӱнінең алғыстапчам. Пу ӱлӱкӱн прай чоннарның иң чарых кӱні полча, аны ӧріністіг харах чазынаң удурлапчабыс. Тӱрчедең Чиңістің 75-ҷі чылын, рейхстаг ӱстӱнде Чиңіс Знамязы кӧдірілген кӱнін таныхтирбыс. Тархынны хати пазарға кӱстенчеткеннердең тоғыр хатығ кӱрезіг апарарбыс, олғаннарға сын тархынны читірербіс. Піс Ветераннар чӧбінең хада республика чуртағңылары полған 52 Совет Союзының Матырын паза «Слава» орденнің толдыра кавалерін хаңан даа ундутпас мероприятие иртірерге чарадығ алғабыс. Оларның махачызы хаңан даа ундудылбас. Пістің муңарлап чир-суғңыбыс чаада чат халған.
Ікі кӱн иртіп парды, хаҷан піс Орджоникидзе аймаандағы Хоҷых аалда 48 чааҷаа паза Совет Союзының Матыры Григорий Елисеевке хумартхы тас асхабыс. Полған на ӱгренҷі тархыныбысты чахсы пілзін. Пӱӱн чааҷыларнаң хада парадта ХТИ-ның чаа кафедразының студенттері, Олимп резерві училищенің ӧрт ӱзірҷең кафедразының ӱгренҷілері, кадеттер, юнармеецтер, ЦСКА школазының ӱгренҷілері парарлар...
Илбек Ада чаа араласчыларына, тыл істенҷілеріне сабланыс хаҷанға даа! Сірер пістің амғы чуртазыбысты ал халғазар. Пик хазых, амыр чуртас прайзына! Ӱлӱкӱннең, Илбек Чиңіс кӱнінең!
Ӧӧркі Чӧп кнезі Владимир Штыгашев чооғын сала пасха оңдайнаң пастаан:
- Аарлығ нанҷылар, харындастар, пиҷе-туңмалар! 3 июльда 1941 чылда хазнаның Ӧӧркі ӧӧн командующайы чонзар «Ах чарых Русь хачан даа полар!» хыйғынаң айланғанда, ол хыйғы чонға наа кӱс пирген. Тилекейдегі чоннар хан тӧгістіг чаада 52 миллион кізізін чідіргеннер, оларның 26 миллионы - СССР-ның кізілері. Піс пасха чоннарны фашизмнең арачылаабыс. Хакасияда ол туста 300 муң кізі чуртаан, чааға 69 муң кізі парыбысхан, 30 муң азыра кізі аннаң айланмаан. Кӧзідімге, чаа парған чирде орныхчатхан Белоруссия 25 муң кізізін чідірген. Республикада 20 - 30 частығ 30 муң азыра ипчі, 40 муң пала ӧкіс халған. Піс ам даа хыйалға кірчеткеннернің, пастырчатханнарның алнын алчабыс. Пісті Балканнарда, Европада, Индияда, Хыдатта, Чағынғы Востокта, Африкада ундутпинчалар. Піс пӱӱн прайзына кӧзідім полчабыс. Чаа ветераннары алнында піс улуғ алымнығбыс. Мағаа 1945 чылда чаадаң айланчатхан матырларны удурлирға ӱлӱс тӱскен. Піс оларға турыстыра поларға кирекпіс. Ӱлӱкӱннең!
Аның соонда пір минута сым турары чарлалған.
ПАЙРАМНЫҒ МАРШ
Митинг соонда Пастағы май площадьында чааҷыларның паза чаа техниказының пайрамнығ маршы ирткен. Ағбандағы чаачылар гарнизонының пастығы Сергей Буланов, площадьта стройнаң турчатхан чааҷыларны ӱлӱкӱннең алғыстаан соонда, Хакасияның пазы Виктор Зиминге гарнизон маршха тимдезінеңер искірген. Пайрамнығ маршнаң роталарнаң парарға команда пирілген.
Иң алнында хазнаның флагын паза Чиңіс Знамязының хобырғанын чаачылар апарғаннар. Аның соонча 1-ғы, 2-чі, 3-чі Белорусскай, 1-ғы, 2-чі, 3-чі, 4-чі Украинскай, Ленинградскай, 1-ғы Прибалтийскай, Карельскай фронттарның штандарттары апарылғаннар.
Площадьча маршнаң стройнаң изере роталарнаң парғаннар: 5-чі Познанскай тимір чол бригадазы; 24-чі зенитно-ракетнай бригада; Саяногорсктағы 3-чі школаның кадеттері; юнармеецтер; МЧС-тың Хакасияҷа Ӧӧн управлениезінің ӧрт ӱзірчеңнері; Хакасияча УФСИН-ның тоғынҷылары; СФУ-ның ХТИ-дағы чаа кафедразының студенттері.
Анаң чаа техниказы ирткен: «Тигр» бронемашиналар, танктардаң тоғыр кӱресчең ракеталығ «Конкурс» комплекстер, бронетранспортёрлар, «Град» паза «Ураган» залпнаң атчаң реактивнай ракеталығ системалар, 152 миллиметр калибрліг гаубицаларны «Урал» автомобильлер сӧӧртееннер.
Хакасияның пазы Виктор Зимин, полған на ротаның командиріне хол пиріп, ӱлӱкӱннең оларны алғыстаан.
КӦЗӀДӀГ ПРОГРАММАЗЫ
Пастағы май площадьында постарының кӧзідіг программаларынаң сыхханнар С.П.Кадышевтің адынаң культура кінінің чайаачы ӧмелері, А.М.Топановтың адынаң Хакас драма театры, М.Ю.Лермонтовтың адынаң Орыс драма театры, «Читіген» Хакас драма театры, «Нымах» кӧклӧлер театры, республиканың филармониязы, «Кӧк пладыҷах. Чон караокезі» марығның чиңісчілері.
Иирде, прай кӧзідіглер тоозылғанда, пайрамнығ салют ӱлӱкӱнні тоосхан.
«ӦЛӀМӀ ЧОХ ПОЛК» ЧӦРӀМ
11.00 часта «Ағбан» спорткомплекстің ачығында Илбек Ада чаада араласхан чаачыларның туған-чағыннары чыылысханнар. Санға алылған соонаң, стройға турып, олар ағаларының, пабаларының паза харындастарының сомнарын «Ӧлімі чох полк» чӧрімде апарғаннар. Ағбандағы Ленин орамазынча Чиңіс паркыіндағы Успас отха теере 11 муң азыра кізі парған.
«Ӧлімі чох полк» чӧрім республикада пизінчі хати иртті. Чылдаң чылға араласчыларның саны хозылча. Пис чыл мының алнында пу чӧрімде пис муңча кізі араласхан полза, пӱӱнгі кӱнде пу сан ікі хати кӧп.
Сомнарның аразында мин мындағ матыр арачылағҷыларыбыстың аттарын кӧр тапхам: Егор Сафронович АЧИТАЕВ. Аның сомын хызы Евдокия Егоровна Топоева (Ачитаева) апарған. Ол пабазынаңар піди чоохтапча:
- Пабам 1913 чылда Пии аймаандағы Сос пилтірі аалда тӧреен. Чиит туста Таштыпта чуртаан. Чааға Таштыптағы военкоматтаң хығыртылған.
Чаадаңар кӧп ниме чоохтачаң. Анда уғаа сидік полған. Днепр суғны кискен. Украинада чааласхан, Германияа читпеен. 1944 чылда мартта, палығлат салып, ибінзер айланған.
Пір хати немецтернің чирінде палығлат салтыр. Палиинаң хан ахча. Анаң пабам немецтернің санитарнай батальонынзар партыр. Холында граната тудынып, хысхыртыр: «Мині сағамох имнеңер! Іди полбаза, пу гранатаны тастабызарбын, андада прайзы ӧл халар!» Немец имҷілер палиин сала маңзыри палғап пиртірлер. Аннаң сығып, ол чіде халған.
Пабам чаадаң прай сорыптығ айланған. Ол финнердең тоғыр чааласханох, анаң Илбек Ада чаада Чир-суун арачылаан. 1998 чылда 85 частығда ӱреен. «Ӧлімі чох полк» чӧрімде пастағызын на араласчам.
Терентий Николаевич БОРГОЯКОВ. Аның сомын пархазы Дмитрий Викторович Боргояков апарған.
- Ағам Терентий Николаевич 1919 чылда Асхыс аймаандағы Полтах аалда тӧреен. 1939 чылда армияа парған. Пастап финнердең тоғыр чааласхан, анаң Илбек Ада чаада араласхан. Японнардаң тоғыр чааласханох. 1946 чылда госпитальзар кір парған. 1947 чылда ибзер айланған.
Разведчик полған. Службазын кавалерия дивизиязында апарған. Берлинге читкен. Чаа соонаң «Пастағы май» колхозта кнес полған, анаң андох бухгалтер полып істенген, соонаң чылғыҷы полған. Ағам алты пала ӧскір салған. Аның 30 азыра парха. Мин иң улуғ пархазы полчам. Чаадаңар кӧп ниме чоохтачаң. Пірсінде ӱс чааҷы, немецтерге ибірт салып, ыырҷының чирінең сых полбин, тӧрт кӱн ирееленген. Атырт салбас ӱчӱн, ачых чазыда постарын чирнең кӧм салып, суғ паза чиис чох чуртааннар. Ағам, разведкаа парып, андағ кирекке кір парған. Соонаң пістіңнер, киліп, немецтерні сӱрібіскеннер. Аның орден-медальлар толдыра полған.
Николай Ильич САРАЖАКОВТЫҢ сомын хызы Евдокия Николаевна Саражакова апарған.
- «Ӧлімі чох полк» чӧрімде аралазарға пабамның сомын тимнеп алғаныма ӧрінчем. Пабам Николай Ильич Ағбан пилтірі аймаандағы Сапогов аалда 1906 чылда тӧреен. «Хызыл аал» газетада тоғынған. Анаң ол репрессияа тартылған. Ікі чылча ызығда полған. Сапоговсар айланғанда, колхоз кнезі полып тоғынған.
Илбек Ада чаа пасталыбысханда, пабам чааға парарға тың кӱстенген. 1942 чылда Хакасияда тӧстелген Пирятин дивизиязынзар кір парған. Фронтта саперлар батальонының политругы полған. Чаадаң 1946 чылда айланған.
Пабам чаадаңар чоохтирға хынмачаң. Ол хормачы кізі полған. Ӱгренчілернең тоғазығларда, от хыринда одырып, чаадаңар олғаннарға хынығ чоохтачаң. Днепр суғны кисчеткенде, суғ алтынзар кірібізіп, анда одырғабыс тічең. Сынында чаа уғаа хорғыстығ полған нооза.
Чаа соонаң, колхоз кнезі полып, Алтай аймаандағы Хубачарда, анаң Аршаннар аалда тоғынған. 1962 чылға теере Аршаннар аалда парторг полып істенген. Ағырыбысханда, ічемнең хада Сапогов аалзар айланған. 1966 чылда пабам ӱреен. Мин Ағбандағы чир-суғ ӱгренчең музейзер пабамның офицерлер артын чӧрчең сумказын, орден-медальларын паза пічіктерін пирібіскем.
Ефим Фёдорович Угдыжековтың сомы хызы Галина Ефимовна Ксенофонтованың холында полған.
- Пабам Асхыс аймаандағы Чоғархы Асхыс аалда 1925 чылда тӧреен. Чааға 1943 чылда парған. Новосибирске ӱгредіглер ирткен соонаң, Прибалтийскай фронтта чааласхан, анаң - Ыраххы Востоктағы фронтта. Чаадаңар кӧп ниме чоохтабачаң. Сӧбірезі улуғ полған. Пабамның пис харындазы прайзы чаада халған. Аннаңар пабам 9 Майда хачан даа ылғачаң, харындастарынаңар сағынчаң полар. Ол 2014 чылда ах чарыхтаң парыбысхан.
Константин Георгиевич СПИРИННІҢ сомын пархазы Владимир Иванович Аёшин апарған.
- Ағам 1922 чылда Шира аймаандағы Азах Сӧӧт аалда тӧреен. 1942 чылда Харатастағы военкоматтаң чааға хабылған. Ӱс хати палығлатхан. 1943 чылда Михаил САГАЛАКОВ (оң саринда) паза ТЮКПИЕКОВТАР сӧбірезі матыр туған-чағыннарының сомнарын апарчалар ізі чох чіт парған. Че ол чаадаң айланған. Ол пазынаң аар палығладыбысхан, пір хараа кӧрбинібіскен. 1943 чыл тоозылчатханда, тӧреен чир-суунзар айланған. Ағам 1996 чылға теере чуртаан. Чаадаңар чоохтабаҷаң.
Ананий Егорович КУЛЕМЕЕВТІҢ сомын пархазы Павел Сергеевич Кулемеев апарған.
- Минің тай ағам Асхыста тӧреен. Чуртаан Таштыпта. Чаадаң айланған. Че мин аны хазыхха кӧрерге маңнанмаам. Ағам 1984 чылда хысхызын ӱреен, мин олох чылда кӱскӱзін тӧреем. Аннаңар тай ағамнаңар чахсы пілбинчем.
Михаил Павлович ТОПОЕВТІҢ сомын пархазы Михаил Владимирович Топоев апарған.
- Ағам Асхыс аймаандағы Полтах аалдаң полған. Ағбандағы ӱгретчілер училищезін тоосхан. Чаа пасталғандох, армияа хабылған. 1946 чылда лейтенант званиеліг чир-суунзар айланған.
Ағам чаада разведчик полған, разведчиктер батальонынаң устаан. Анаң «Смерш» контр-разведкада служба апарған, шпионнарны тутхан. Украинскай фронтта араласхан. Берлинге читкен. Рейхстагтың стенезінде «Топоев» тіп хол салған.
Чаа соонаң Казановтағы школада директор полып істенген. Пис пала ӧскір салған. Мин ағамнаң поғдархапчам. Мині аның адынаң адап салғаннар.
Пётр Константинович КИРБИЖЕКОВТЫҢ сомын оолғы Сергей Петрович Кирбижеков апарған.
- Пабам 1924 чылда Ағбан пилтірі аймаандағы Пӱӱр пилтірі аалда тӧреен. 1942 чылда, 18 чазын толдыр салғанда, чааға хабылған. Миномет расчёдының командирі полған. Чир-суунзар 1945 чылда айланған. Берлинге читкен.
Николай Федотович ЧИЧИНИН. Аның сомын кӧргенегі, Ағбандағы 25 № школаның 6-ӌы класс ӱгренӌізі Миша Чичинин апарған. Николай Федотович 1913 чылда Пии аймаандағы Хойбал аалда тӧреен. Чаадаң айланмаан. Аның ӱс хыс паза пір оол халған.
Автор :
Антон ЧЕРТЫКОВ, Николай СУЛТРЕКОВ, Татьяна ТЮТЮБЕЕВА Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде