ОЛҒАННАРНЫҢ ЧУРТАЗЫН, ХАЗИИН ХАЙРАЛЛИРҒА
19.05.2017
Хабарлар
УРАЛ ТАҒЛАРЫНЫҢ ІСКЕРКІ ЧАРДЫҒЫҢДАҒЫ РЕГИОННАР АРАЗЫНДА ИҢ ПАСТАҒЫЗЫН ХАКАСИЯДА ОЛҒАННАРНЫ ЧОЛЛАРДАҒЫ СААЙЛАРҒА КИРБЕС ПРОФИЛАКТИКА ТОҒЫЗЫН АПАРҶАҢ РЕГИОНДАҒЫ КІННІҢ ПРЕЗЕНТАЦИЯЗЫ ИРТКЕН. АҒБАНДА ПАСТАҒЫ МАЙ ПЛОЩАДЬЫНДА «ХОРҒЫС ЧОХ ЧӦРІС» ЛАБОРАТОРИЯЗЫН КӦЗІТКЕННЕР. ПУ ПРОЕКТ РОССИЯНЫҢ 30 СУБЪЕКТІНДЕ ЧУРТАСХА КИРІЛЧЕ. ЧОЛ ЧӦРІЗІН ХОРҒЫС ЧОХ ИДЕР ОЛҒАННАРНЫҢ ИННОВАЦИЯ КІННЕРІН ТӦСТИР ПАСТАҒЫ 10 РЕГИОН САНЫНА ХАКАСИЯ КІРЧЕ.
ПУ МЕРОПРИЯТИЕДЕ АРАЛАСХАННАР ХАКАСИЯНЫҢ ПАЗЫ ВИКТОР ЗИМИН, РОССИЯНЫҢ МВД ГИБДД-зының ӦӦН УПРАВЛЕНИЕ ПАСТЫҒЫНЫҢ ОРЫНҶЫЗЫ, ПОЛИЦИЯНЫҢ ГЕНЕРАЛ-МАЙОРЫ ВЛАДИМИР КУЗИН, «ХОРҒЫС ЧОХ ЧӦРІС» ЭКСПЕРТ КІНІНІҢ ӦӦН ДИРЕКТОРЫ ВАДИМ МЕЛЬНИКОВ, РОССИЯНЫҢ АВТОСТРАХОВЩИКТЕР ПІРІГІЗІНІҢ (РСА) СФО-дағы ПРЕДСТАВИТЕЛЬСТВОЗЫНЫҢ УСТАҒҶЫЗЫ СЕРГЕЙ МОРОЗ.
17 майда Пастағы май площадьында чон толдыра чыылыс парған, ӧӧнінде ӱгренҷілер полғаннар. Иртен, чахаан на чіли, айас, чылығ кӱн турыбысхан. Чыылысхан чонға, аалҷыларға национальнай кип-азахтығ ӱгренҷілер театрализованнай кӧзідіг иртіргеннер. Площадьсар нымахтағы алыптар, чыдалығ, охчаалығ, хылыстығ сығып, теелбектер кӧзіткеннер. Мероприятиеде Хакасияның чон артизі Герман Танбаев ведущий полған. Хакас кип-азахтығ хыстар аалҷыларға айран, талған читіргеннер.
Чыылған чонзар Виктор Зимин чоохнаң айланған:
- Мында ӱгретчілерні, ӱгренҷілерні, паба-іҷелерні паза пасха даа аалҷыларны кӧрерге ӧріністіг. Аалҷылар піске наа мобильнай автогородок, «Хорғыс чох чӧріс» лабораторияны ағыл пиргеннер. Республикада ам олғаннарны саайға кірбеске ӱгредер наа оңдайлар пар полар. Аннаң ыраххы ааллардағы даа палалар тузаланарлар. Олғаннарның чуртазы, хазии прай нимедең аарлығ. Оларның чуртазын хайраллир пістің наа оңдайлар пар полар. Мындағ проект чуртасха кирілчеткен пастағы 10 регион санына Хакасия кір парған. Аның ӱчӱн прайзына алғыс.
Республика пазының соонаң аалҷылар чоох тутханнар. Владимир Кузин прайзын танығлығ кӱннең алғыстаан. Пастағы теесте ол олғаннарзар айланған. Аның чооғынаң, амды олғаннар чолҷа чӧрҷең правилоларға ӱгренерлер, анда орта тудынарға кӧнігерлер. Республикада олған инспекторларының кӧп дружиналары тоғынчаттыр. Оларның делегациялары ам Россия синінде иртірілчеткен марығларда аралазып, пӧзік чидіглер кӧзідерлер. Палаларның чуртазын, хазиин хайраллиры хазнаның ӧӧн пӧгіні. Мындағ кіннер Тулада, Тамбовта, Воронежте, Орёлда азылғаннар, Хакасия - пастағылар санында. Пу кіннернің тоғызы чахсы салтарға хайди даа ағылар.
Вадим Мельников пу презентацияа мындағ кӧп кізі чыылғанына хайхаан. Аның чооғынаң, олғаннарны чоллардағы саайларға кирбес профилактика тоғызын апарарға Россияның президенті чахаан. Ӧӧн пӧгін - саайлар санын хызырары. Тӱрчедең олғаннар каникулға парарлар, паба-іҷелер - отпускка. Аннаңар олғаннарны хазыхтандырҷаң лагерьлерзер хорғыс чох апарарына паза аннаң айландырарына улуғ хайығ саларға кирек полар.
Сергей Мороз позының чооғында олғаннарны чоллардағы саайларға кірбеске, сизіктіг поларға, чолҷа чӧрҷең правилоларҷа тудынарға алғаан.
Виктор Зимин паза Вадим Мельников мобильнай лаборатория алнында тартылған хызыл чаламаны хыплааннар. Эксперт олғаннарға лабораториядағы тиріглерні кӧзіткен, оларнаң хайди тузаланардаңар чоохтаан.
Площадьта мероприятие тоозылғанда, Правительство туразында Виктор Зимин, Владимир Кузин, Вадим Мельников паза Сергей Мороз журналисттерге пресс-конференция иртіргеннер.
Хайди Хакасияның пазы таныхтаан, республика пір кізее нинҷе автомобиль килісчеткенінҷе иң кӧп автомашиналығ регионнар санына кірче. Пӱӱл тӧрт ай аразына тоғыс саайда сигіс пала палығлатхан, ікі пала ӱреен. Тӧрт саай олғаннар чолҷа чӧрҷең правилоларны сайбаан сылтаанда пол парған. Водительлерге паза чазағ чӧрчеткеннерге удур-тӧдір ынағлазарға кирек. Олғаннарны транспорт культуразына ӱгредерге.
Чолларда саайлар саны хызырылча. Олғаннар араласхан саайлар ікі хати хызырыл парған. Улуғлар, чолны чарадылбинчатхан орыннарда кизіп, палаларға хомай кӧзідім полчалар. Чиит паба-іҷелер сыбыра хайдар-да маңзырапчалар, палаларға оларны тохтадарға килісче. Олғанны кічігдең сығара чолҷа чӧрҷең правилоларға ӱгредерге кирек. Ыраххы кічіг ааллардаң городсар килген олғаннар правилоларны чахсы пілбинчелер. Оларға ам мобильнай автогородок полызар. Уралның іскеркі саринда Хакасия пастағы регион полча, хайда мындағ мобильнай автогородок пар полар. Олғаннар - пістің таңдағы чуртазыбыс. Ам республикада перинатальнай кін азылчатса, пу автогородокты анда аннаң хада азарға. Паба-іҷелер палаларны кічігдең сығара чолҷа чӧрҷең правилоларға ӱгретсіннер.
Пресс-конференцияда аалҷылар, ідӧк чоох тудып, журналисттернің сурығларына нандырғаннар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде