ӦКІСТЕРНІ АРАЧЫЛИРҒА КИРЕК
19.05.2017
Хабарлар
Хакасияның Оӧркі Чӧп президиумы 17 майда, теестегі чыылиин иртіріп, онға чағын сурығ кӧрібіскен. Ӱзӱрілген сурығларның чардығы пасха регионнарның Россия правительствозынзар паза Хазна Думазынзар федеральнай законнарзар алызығлар кирердеңер айланыстарына хабазарын палғалыстығ полған.
Чыылығ алғыстастарнаң пасталған. Владимир Штыгашев Ӧӧркі Чӧпке пӱӱл 25 чыл толчатханы хоостыра республика парламентінің аймах хығыртығларында тоғынған депутаттарға Алғыстас пічіктерін читірген.
Президиумның ӱзӱриине сығарылған сурығларның аразында Россия правительствозынзар паза Хазна Думазынзар ызылчатхан айланыстарға хабазығ пирҷең сурығлар полған. Ол айланыстарны пасха регионнарның депутаттары федеральнай законнарзар алызығлар кирер пӧгіннең тимнееннер. Іди Орлов облазының Чон депутаттары чӧбі федеральнай законодательствозар В паза С гепатит ағырығлар тарапчатханын азынада тохтадарына кӧстегліг алызьіғлар кирер сурыныснаң айланғаннар. Ӧӧркі Чӧптің хазых хайраллирынҷа паза социальнай политикаҷа комитедінің кнезі Николай Михеевтің искіриинең, Россияда 2012 чылға теере социальнай ағырығларнаң кӱресчең паза оларны азынада тохтатчаң федеральнай программа тоғынған полған. Андар ідӧк «Вирустығ гепатиттер» подпрограмма кірҷең. Амғы туста Россияда В паза С гепатит ағырығларнаң ағырчатханнарны имнеҷең хазна программазы чоғыл тіп таныхтаан ол. Вирустығ гепатитнең ағырыбысханнарны имнирі уғаа аарлығ осхас, пір айның имнег курсы 112 муң салковайға чит парчаттыр. Ӧӧркі чӧптегілер диспансеризация тузында В паза С гепатиттерні ілезіне сығарҷаң істезіглер иртірердеңер паза вирустығ гепатитнең ағырчатханнарны имнеҷең хазна программазын тимнеп тоғындырардаңар айланысха хабазарға чаратханнар.
Ікінҷі айланызы очно ӱгренчеткен ӧкіс студенттерге социальнай пособиені тӧлирін 24 часха читіре узарадарынаң палғалыстығ полған. Андағ айланыснаң Адыгея Республиканың Хасэ-Хазна чӧбі сыххан. Амғы туста ол пособие 18 часха теере ле тӧлелче.
- Ӧкіс студентке ӱгренерге паза чуртирға хайдаң ахча аларға? Аннаңар ӧкістерні арачылирға кирек, олар социальнай пенсияны ӱгреністерін тоосханҷа ал турар ӱчӱн, - таныхтаан Ӧӧркі Чӧп кнезі Владимир Штыгашев.
Президиум, анзынаң чаразып, Адыгеяның депутаттарының айланызына ідӧк хабазығ пирерге чаратхан.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде