ӀҶЕ-ПАБАЛАРНЫ ІСКІДЕҢ ИМНИР ПРОГРАММА КИРЕК
19.05.2017
Хабарлар
Хакасияның пазы Виктор Зимин республикада чуртапчатхан кӧп палалығ сӧбірелернің ісчеткен іҷе-пабаларын иң улуғ хатығласха тартарға тимдезін искірген. 17 майда ол социальнай сфераны хайығда тутчатхан устағҷыларның тоғызын толдырчатхан Ирина Смолинанаң паза Наталья Карамашеванаң тоғасхан.
Виктор Зиминге Асхыс аймаандағы Палыхтығ суғ аалда пол парған чобағдаңар искір пиргеннер. Анда ікі квартиралығ турада ӧрт сых парған сылтаанда тӧрт кізі чуртазын чідір салған, ол санда кічіг частығ палалар. Читі частығ оолағас, тізең, ӧкіс хала парған. Сӧбіренің іҷе-пабазы ісчеткен кізілер полған тіп ілезіне сығысхан. Хакасия пазының сағыс-кӧрізі хатығ полған:
- Палаларның чуртазын хайраллап халар ӱчӱн, иң хатығ оңдайларға парарға кирек - іҷе-пабаның пала ӧскірер правозын чох идерге! Мындағ кӧзідім: пӱӱн опека органнарының специалисттері ісчеткен іҷе-пабаларнаң чоохтазығлар апарчалар, сизіндірчелер. Іҷе-пабалар, піди кӧрзе, прай нимені оңарчалар, че пазағы кӱнде - саай. Ағаа хоза пасха даа профилактика оңдайларын тоғындырарын кӧрерге кирек. Піс палаларыбысты чідірбеске кирекпіс!
Виктор Зимин республикада кӧп палалығ араға ісчеткен іҷелерге пос кӧңнінең іскідең имненер программаны тоғындырар оңдайны кӧрібізерге чахығ пирген. Хайди ол таныхтаан, республикада андағ сӧбірелер кӧп нимес, че пірее дее палаа хорғыс пар полза, иң хатығ оңдайларнаң тузаланарға кирек.
Ідӧк Хакасияның пазы ӧкіс халған читі частығ паланың мыннаң мындархы ӱлӱзін хайығда тударға чахып салған. Амғы туста ол паланы Асхыс аймаандағы Кызлас аалзар чазы читкелектерге социальнай реабилитация кінінзер апар салғаннар. Ағаа анда прай кирек полызығлар пирілген.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде