ӰГРЕНҶІЛЕРНӀҢ НАНДЫРЫҒЛЫҒ ТУС ПАСТАЛЫБЫСТЫ
31.05.2017
Статья
Россияда школа тоосчатхан ӱгренҷілер пірге хазна сыныхтағларын (ЕГЭ) тудып пастабыстылар.
Ирткен неделяда олғаннар географияҷа паза информатикаҷа экзамен тудыбысханнар, алнында, тізең, орыс тілі, математика паза пасха даа предметтерҷе экзаменнер. Хакасияда 11 классты пӱӱл 2 муң азыра ӱгренҷі тоосча. Республикада ЕГЭ сыныхтағларына тимненіс хайди парғаннаңар, ӱгренҷілернің кӧңнілері хайдағ полчатханнаңар паза пасха даа нимелердеңер Хакасияның ӱгредіг паза наука министрінің тоғызын толдырчатхан Гзлина Салатанаң чоохтазып алғабыс.
Хайди чоохтапча Галина Александровна, республиканың школалары пірге хазна сыныхтағларына тимненіс тоғызын азынадох апарғаннар. Ол тӱзімніг парғаннаңар, школалар экзамен иртірерге прай тимделер.
- Школаны ирткен чылда тоосхан хай пірее чииттер ЕГЭ-ны ӧӧн тустың алнында тудыбысханнар. Ол март-апрельде ирткен. Ортын профессиональней ӱгіредіг учреждениелерінің студенттері ЕГЭ-ны ӧӧн тустың соонаң тударлар, ол 20 июньнаң 1 июльға теере иртер, - чоохтапча Галина Салата.
Галина Александровнаның таниинаң, пӱӱл экзаменнер иртер орыннарның саны хызырылған. Ирткен чылда 18 орын полған полза, пӱӱл - 17 Ирткен паза пу чылда Алтай паза Ағбан пилтірі аймахтарында экзаменнер иртірілбес. Пу аймахтарда ӱгренчеткен олғаннар экзамены Ағбандағы школаларда тударлар.
- Таныхтирға кирек, ирткен чылда Ағбанда 20 № школада паза лицейде экзаменнерде пастағызын на наа технологияларнаң тузаланғабыс, - чооғын узаратхан ол. - Пу школаларда сыныхтағлығ тоғыстар компакт-дисктең компьютер пастыра принтерҷе сығарылғаннар. Анаң олғаннарға толдырарға пирілгеннер. Олар аны толдырыбысханда, ӱгретчілер, бланктарны чыып, сканировать полып, сыныхтирға ысханнар. Экзаменні мындағ оңдайнаң иртірген
Пылтыр Ағбаңдағы 20 № школада экзамен тузында наа технологияларнаң тузаланғаннар
сылтаанда, сайбағлар чох полған. Пӱӱл наа технологиялар пастыра сыныхтағны Ағбанның пис школазында тударлар.
Ідӧк 4-5 чыл изере экзаменнер иртчеткен ӱгредіг организацияларында видеокамералар турғызылчалар. Пастап городтағы ла школаларда іди полған, амды, тізең, экзамен иртчеткен прай школаларда. Таныхтирға кирек, Хакасияда экзамен тузында сайбағлар полғаннаңар танығ чоғыл. Ідӧк мында улуғ тоғыс тӧстегҷілер азынада апарчалар. Сыныхтағны иртірчеткен ӱгретчілер ӧнетін курстар иртчелер, ӱгренҷілернең паза іҷе-пабаларнаң азынада улуғ тоғыс апарылча. Аннаңар ӱгренҷілер пілчелер, сыныхтаға аудиториязар ручка, паспорттығ ла кірерге чарир.
- Мин Хакасияның ӱгренҷілерінзер айланчам. Олғаннар, телефоннарыңны паза пасха даа наа технологияларны аудиториязар кирерге кӱстенмеңер. Экзамен тузында андағниме сығыс парза, сірернің тоғыстарың санға алылбас, сірерні экзаменнең сығарыбызарлар. Анаң сыныхтағны килчеткен чылда ла тударға чарадылар. Кізі аттестат таа чох халарға айабас. Аннаңар, ӱгренҷілер, пос кӱзіне ле ізеніңер, - теен ол.
Я, чуртаста хайдағ ла нимелер пол парбинча. Пірееде экзамен парчатхан кӱнде ӱгренҷі тың ағырыбысча алай піреезінің туған-чағыны ӱреп парча. Андада олған экзаменге кил полбинча. Андағ олғаннарға имнег туразынаң алай пасха даа пічік ағыл пирерге кирек полча. Ідӧк пірееде олған, чӱрексіп, экзамен тузында изі чохтаныбысча. Мында ағаа экзамен тузында тоғынчатхан имҷі полыс пирер паза ӱгренҷее сынында изі чохтанғаннаңар пічік тимнеп пирер. Аннаңар экзаменні ӧӧн чардыхта тут полбаан олғаннар аны хоза пирілчеткен туста тударлар.
Пӱӱл орыс тілі паза математика экзаменнерінде алызығлар чоғыл, физика, химия паза биология предметтерде улуғ нимес алызығлар кирілгеннер. Хайди чоохтапча Галина Салата, пу чылда экзаменнерде тест чардығы чох иділген.
- Мыннаң мындар орыс тілінҷе паза математикаҷа ідӧк тест чардығы чох иділері кӧрілче. Олғаннар пирілген тоғысха толдыразынаң нандырығ пирерге киректер, - чооғын тоосча Галина Салата.
СӦС COO: Пірге хазна экзамен сурығларынаң Хакасияның ӱгредіг паза наука министерствозынзар айланарға чарир пу телефоннарҷа: 8(3902)295-237 паза 295-239. 9 класс тоосчатханнарға 8(3902)295-207 телефонҷа.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы