ХАБАРҶЫЛАРҒА - СЫЙЫХТАР, РЕДАКЦИЯА - МАШИНА
06.06.2017
Хабарлар
ХАКАСИЯНЫҢ ПАЗЫ ВИКТОР ЗИМИН ПІСТІ, «ХАБАР» ГАЗЕТАНЫҢ ТОҒЫНҶЫЛАРЫН, ПРАВИТЕЛЬСТВО ТУРАЗЫНДАҒЫ ЧЫЫЛЫҒЛАР ИРТІРҶЕҢ ЗАЛЫНДА АЧЫХ-ЧАРЫХ КӦҢНІЛІГ УДУРЛААН, ТАНЫҒЛЫҒ ПАЙРАМНАҢ ЧЫЛЫҒ АЛҒЫСТААН. ПОЗЫНЫҢ ЧООҒЫНДА ВИКТОР МИХАЙЛОВИЧ ХАКАС ТІЛІНЕҢ СЫХЧАТХАН ГАЗЕТА РЕСПУБЛИКА ЧУРТАҒҶЫЛАРЫ АРАЗЫНДА ХАЙДАҒ ААРЛАСНАҢ ТУЗАЛАНЧАТХАНЫН, АНЫ ТӦРЕЕН ЧИРІБІСТІҢ ИҢ ЫРАХХЫ ААЛЛАРЫНЫҢ ЧУРТАҒҶЫЛАРЫ ЧИДІКПИН САҒЫПЧАТХАНЫН ТАНЫХТААН.
- ПІСТІҢ РЕСПУБЛИКАНЫҢ АЛНЫНДА ХАЙДАҒ НАНДЫРЫҒЛЫҒ ПӦГІННЕР ТУРЧАТХАННАҢАР, ОЛАР ХАЙДИ ТОЛДЫРЫЛЧАТХАННАҢАР, КІЧІГ ПАЗА ЫРАХХЫ ААЛЛАРНЫ ХАЙРАЛЛАП ХАЛАРЫНА, ТИЛІДЕРІНЕ ХАЙЫҒ САЛЫЛЧАТХАННАҢАР СЫБЫРА АЛҒЫМ ЧАРЫТЧАЗАР, - МАХТААН ГАЗЕТА ТОҒЫНҶЫЛАРЫН ХАКАСИЯНЫҢ ПАЗЫ.
ПАЗА ИҢ ӦӦН ПӦГІННЕРНІҢ ПІРСІ - ІҶЕ СӰДІНЕҢ ПИРІЛГЕН ТІЛІБІСТІ ТИЛІДЕРІ, АНЫҢ ПАЙЫН ХАЙРАЛЛАП ХАЛАРЫ. АНЗЫНА ХАЙДАҒ УЛУҒ ХАЙЫҒ САЛЫЛЧАТХАНЫН ВИКТОР МИХАЙЛОВИЧ АЛЫНҶА ТАНЫХТААН. ӰЛГӰ САРИНАҢ ГАЗЕТАА ПОЛЫЗЫҒ ПИРІЛ ТУРАР ТІП ІЗЕНДІРГЕН. АНАҢ «ХАБАР» ГАЗЕТАНЫҢ ЧАХСЫ ТОҒЫНЧАТХАННАРЫНА АЙМАХ СЫЙЫХТАР ЧИТІРІП ПАСТААН, ПОЛҒАНЫБЫСХА ЛА ЧЫЛЫҒ СӦСТЕР ТААП ТУРҒАН.
Че ӧӧн ӧрініс пісті тоғазығ соонда сағыпчатхан. Ол сағыбаан сыйыхтаңар сала соонаң. Амды пайрамнығ тоғазығ хайди ирткеннеңер, кемнер аарласха турысханнаңар чоллап искір пирер сағыс пар. Хығырығҷыларыбысха анзын піліп аларға чапсых полар.
- Хакасия правительствозының алтын чазынаң таныхталча «Хабар» газетаның ӧӧн редакторы Радион Дмитриевич Сунчугашев, - чарлалған тоғазығ тузында.
Пастығыбыс андағ аарлығ сыйыхха турыстығ кізі. Газетаның ӧӧн редакторына ол 3 чыл мының алнында турғызылған. Пу син асхынах тустың аразына аның ӧткін хайынғаны харахха кӧріндіре. Редакцияда чахсы саринзар алызығлар полғлапча, тоғысты пӧзік синге кӧдіреріне сыбыра хайығ айландырылча, газетаның сайты азылған. Че иң не ӧӧні - газетабыстың тиражы 2 муңнаң ас парыбысты. Пу кӧзідімде тохтирға сағынминчабыс, хығырығҷыларнаң тоғазығлар иртірчебіс, чарыдығлығ тоғыс апарчабыс. Радион Дмитриевич пірее наа оңдайлар таап ла алча. Аннаңар мындағ аарлығ сыйых пастығыбысха орта пирілген тіп санапчабыс, аның ӱчӱн ӧрінчебіс.
Анаң редакцияда ӱр чыллар тоғын салған, газетаны чахсыландырарына, хығырығҷыларыбыстың хайиин тартар хынығ, чапсых материаллар сығарарға харасчатханнар хазна сыйыхтарынаң таныхталғаннар. «Хакасияның істеніс сабланызы» медальға турысханнар нандырығлығ хачы Алефтина Ананьевна Субракова, пӧлік редакторлары Илья Прокопьевич Топоев, Анатолий Егорович Султреков. Пу ӱзӧлеңнің хайзы даа редакцияда 20 - 30 чылдаң артых тоғын салған, Хакасия культуразының саблығ тоғынҷылары полчалар.
Хакасия правительствозының Аарластығ пічіктерінең таныхталғаннар ідӧк редакцияда ӱр чыллар тоғын салған пӧлік редакторлары Елена Михайловна Чезыбаева, Николай Михайлович Султреков паза нандырығлығ хачының орынҷызы Инора Матвеевна Боргоякова.
Республика правительствозының алғыстас пічіктерінең таныхталғаннар Розалия Ильинична Алагашева, улуғ корректор; Августа Казановна Боргоякова, референт-хачы; Мария Мозетовна Майнагашева, компьютер пӧлиинің операторы; Наталья Чорыевна Субракова, пӧлік редакторы; Клавдия Михайловна Челтыгмашева, компьютер пӧлиинің операторы.
Хакасия правительствозының сыйыхтарына турысханнар Виктор Михайловича постарының алғыстарын читір турғаннар. Газетаның ӧӧн редакторы Радион Дмитриевич Хакасияның пазы Виктор Зиминге улуғ нимес сыйых читірген, редакцияның ирткен чолынаңар, наа пӧгіннерінеңер чоохтап пирген.
Анаң губернатор, кӱлімзіребізіп, пайрамнығ тоғазығ мыннаң тоозылбинча теен. Прайзы Хакасияның пазы Виктор Зиминнең хада правительство туразынаң сыххабыс. Анда пісті читі орыннығ «Лада-Ларгус» наа машина сағыпчатхан. Сынап таа, сағыбаан сыйых. Редакцияа ікінҷі машина хаҷанох киректелчеткен. Аннаңар, Виктор Михайлович Радион Дмитриевичке наа машинаның клӱзін читіргенде, айаларыбысха айабин, матап хол сапхабыс. Амды чол чӧрер, тӧреен чирібістің иң ыраххы аалларына чит турар, хығырығҷыларнаң удаа тоғазар чахсы оңдай полар.
Виктор Михайлович, піснең анымҷохтасчатханда, прайзына пик хазых, чайаачы тоғыста наа чидіглер, хығырығҷыларны ӧріндірчеткен чапсых, хынығ материаллар пас турарға алғаан. Тоғазығ тузында ол чоохтаан нооза Хакасияның алнында хайдағ нандырығлығ, че толдыр полар пӧгіннер турчатханнаңар. Оларны хығырығҷыларға чарыт пирері - ол пістің ӧӧн пӧгінібіс. Россияда пістің республика табырах тиліпчеткен регионнар аразында читінҷі орында саналчатханына хайди поғдархабас.
Че газетабыстың пайрамы правительство туразындағы тоғазығнаң, аймах сыйыхтарнаң тоозылбаан. Кибір хоостыра чазағлығ стол кистінде чылығ сӧстер кӧп чоохталған, редакцияның аалҷылары постарының кӧңнілерін асханнар, пістің газетаның пайрамынаң прайзыбысты чылығ алғыстааннар паза хуруғ холлығ килбееннерін сыйыхтарнаң киречілеп турғаннар. Мында прайзын адап таа полбассың, че газетабыс кӧп тарапчатхан Асхыс паза Таштып аймахтарынаң килген аалҷыларны, «Хакасия» газетаның паза РТС-тың устағҷыларын, «Хакасия» типографияның директорын, Россия почтазының республикадағы пӧлиинің устағҷызын хайди таныхтабас. Алынҷа адирға чарир Хакасияның Улуғлар чӧбін, хакас ипчілернің «Алтынай» халыхтар пірігізін. Хакас телевидениезінең паза радиозынаң пір тоғыс толдырчабыс, оларның устағҷылары алғыстирға хайди килбестер.
Таныхтирға кирек, сыйыхтар редакцияа ла пирілбеен. Ідӧк алынҷа хабарҷылар хайығ чох халбааннар. Хакасияның Улуғлар чӧбінің «Род поғдархазы» ордені мағаа пирілген. Аны республиканың Улуғлар чӧбінің президиум члені Виктор Яковлевич Чепчигашев кӧксіме хазаан. Тоғызымны іди пӧзік паалапчатхан ӱчӱн Хакасияның Улуғлар чӧбіне алғызым читірчем. Ідӧк улуғ алғызым читірерге сағынчам Россияның Журналисттер пірігізінің Хакасиядағы пӧлиинің кнезі Ольга Валерьяновна Ширковецке. Аның кӱстенізінең мағаа Россияның Журналисттер пірігізінің иң аарлығ сыйии читірілген. Ол «За заслуги перед профессиональным сообществом». Ольга Валерьяновна піди хаңалҷостанған: «Мындағ сыйых Хакасияда уғаа асхынах. Хакасияның пазы Виктор Михайловичте паза саннығ ла кізіде».
Пістің редакцияда тоғынчатхан Николай Султрековха, Илья Топоевке, Наталья Субраковаа, Елена Чезыбаеваа, Инора Боргояковаа Россияның Журналисттер пірігізінің алғыстас пічіктері
читірілген. Ӧӧн редакторның орынҷызы Альберт Толмашов Хакасияның Ӧӧркі Чӧбінің Аарластығ пічиинең таныхталған. Хабарҷы Майя Кильчичаковаа республиканың культура министерствозының Аарластығ пічии пирілген.
Улуғ ӧріністе ирт парыбысты газетабыстың танығлығ пайрамы - 90 чылы. Пістің, редакция тоғынҷыларының, алнында уламох нандырығлығ пӧгіннер турчалар - пӱӱл чайғызын Хакасияда иртер чоннар аразындағы Сибер Ил форумны, нымах-кӧклӧ театрларының чоннар аразындағы «Чир-чайаан» фестивальын турыстығ чарыдыбызары.
Тоғыс тохтабинча. Іди газетабыстың 100 чылы пілдіртпин чидібӧк килер.
Автор :
Анатолий СУЛТРЕКОВ Сомнар Максим АХПАШЕВТИ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде