ФРОНТОВИК ПОС ЧИРІНЗЕР АЙЛАНДЫ
07.06.2017
Хабарлар
ИЛБЕК АДА ЧАА ТУЗЫНДА ЛЕНИНГРАД ОБЛАЗЫНДА ЧАТ ХАЛҒАН ХЫЗЫЛ АРМЕЕЦ АНТОН ГИРОНЫҢ СӦӦГІ ТАБЫЛҒАННАҢАР ПАЗА ХАКАСИЯНЫҢ ПАЗЫ ВИКТОР ЗИМИН АНЫ, АҒЫЛЫП, АҒБАНДАҒЫ СЫЫРАТТА ЧЫЫП САЛАРҒА ЧАХЫҒ ПИРГЕННЕҢЕР ПІС ИСКІРГЕН ПОЛҒАБЫС. АМДЫ ФРОНТОВИКТІҢ СӦӦГІН САМОЛЁТНАҢ АҒБАНҒА ЧИТІРГЕННЕР. ЧИҢІС ПАРКЫНДАҒЫ УСПАС ОТ ХЫРИНДА УЛУҒ ТРАУР МИТИНГІ ИРТКЕН, ЧААҶЫНЫ АҒБАНДАҒЫ СЫЫРАТТЫҢ ЧААҶЫЛАР САБЛАНЫЗЫ ПӦЛИИНДЕ ЧЫЫП САЛҒАННАР.
ПЫЛТЫР ЛЕНИНГРАД ОБЛАЗЫНДАҒЫ ГАТЧИНА ГОРОДТЫҢ ТІЛЕГҶІЛЕР ОТРЯДЫ САНКТ-ПЕТЕРБУРГ ХЫРИНДАҒЫ СИНЯВИНСКАЙ САСТАРДА ЧААЛАСХАН ӰС ХЫЗЫЛ АРМЕЕЦТІҢ СӦӦГІН ТАПХАН.
ОЛАРНЫҢ ПІРСІНІҢ АДЫ-СОЛАЗЫН ПІЛІП АЛАРҒА МЕДАЛЬОН ПОЛЫС ПИРГЕН. ОЛ ТУВА ЧОН РЕСПУБЛИКАЗЫНАҢ ЧААҒА ПАРҒАН, 1897 ЧЫЛДА ТӦРЕЕН АНТОН КОНСТАНТИНОВИЧ ГИРО ПОЛТЫР. АНЫҢ 8 ПАРХАЗЫ ПАЗА 11 КӦРГЕНЕГІ AM ХАКАСИЯДА ЧУРТАПЧАЛАР.
ПӰӰЛ МАЙДА АНТОН ГИРОНЫҢ ПАРХАЗЫ НАДЕЖДА УЛЬЯНОВА, АҒАЗЫНЫҢ СӦӦГІН АҒБАНЗАР АҒЫЛАРҒА, МЫНДАҒЫ СЫЫРАТТА ЧЫЫП САЛАРҒА ПОЛЫЗЫҒ СУРЫП, ХАКАСИЯНЫҢ ПАЗЫ ВИКТОР ЗИМИНЗЕР АЙЛАНҒАН. ВИКТОР МИХАЙЛОВИЧ САХ АҢДОХ, ФРОНТОВИКТІҢ СӦӦГІН АҒЫЛЫП, ЧЫЫП САЛАР ТОҒЫСТАР ТОЛДЫРАРҒА ЧАХЫҒЛАР ПИРІБІСКЕН.
Хакасия пазының орынҷызы Владимир Крафт тимнег тоғыстарын апарарға кирек устағҷыларнаң чыылығ иртірген. Чааҷының сӧӧгін ағыларға Санкт-Петербургсар Хакасияның чааҷылар комиссарының полысчызы Олег Пагельс ызылған. Ағбанда аны удурлирға паза траур мероприятиезін иртірерге тимненгеннер.
2 июньда Гатчинада хызыл армеец Антон Гироның сӧӧгін Хакасияның кізілеріне читіргеннер. «Чааҷылар сабланызының городы» стела хыринда пайрамнығ траур митингі ирткен. Анда Ветераннар чӧбінің, тілег отрядтарының кізілері, чииттер ӧргезінің волонтёрлары, Гатчина аймааның администрация тоғынҷылары чыылысханнар. Аарлас караулы турғызылған.
Гатчина аймааның администрация пазының орынҷызы, митинг азып, чоох тутхан:
- Пу чааҷы Ленинград облазын, Гатчина чирін арачылаан, аннаңар піс аның туғаннары алнында пазыбыс тӧбін тӱзірчебіс, андағ кізі полған ӱчӱн улуғ алғызыбыс читірчебіс. Пӱӱн піс чааҷы Антон Гироның сӧӧгін Хакасияа пирчебіс, анзы пістің Чир-суубысты прай хазнаның кізілері арачылаанын киречілепче. Аның ады хаҷан даа ундудылбазын!
Кибірге кір парған оңдайнаң, мындағ мероприятиелерде Гатчинадағы чииттер ӧргезінің волонтёрлары табылбаан чааҷыдаңар чӱрекке теепчеткен кибелістер хығырғаннар. Антон Гироның сӧӧгін «Чат халған чааҷылар хумартхызы» тілег отряды тапхан. Хайди чоохтаан ол отрядтың командирінің орынҷызы Владимир Рудь, Антон Константинович Гироға ам чаа тоозыл парды тиирге чарир. Аның отрядына сӧӧкті пирібізер аарластығ ӱлӱс тӱскен. Гиро чат халған орында отряд хумартхы тас турғыс салар.
Хакасиядаң чааҷының сӧӧгін Олег Пагельс алған. Ағаа ідӧк чааҷының сӧӧгінең хада табылған ниме-нооларны пиргеннер. Хакасия пазының чахиинҷа Олег Пагельс чааҷының сӧӧгін табарында араласхан кізілерге Аарластығ паза алғыстас пічіктерін читірген.
Санкт-Петербургта Хакасиядаң парған кізілер Пискарёвскай сыыраттағы пістің чир-суғҷыларыбысха турғызылған мемориалзар чахайахтар салғаннар.
4 июньда Ағбандағы аэропортта Москвадаң учухчатхан «Аэрофлот» авиакомпанияның самолёдын Хакасия правительствозының тоғынҷылары, Антон Гироның туғаннары паза журналисттер удурлааннар. Самолёт сала орайладып учух килген. Прай пассажирлер тӱзібіскен соонда, чааҷының сӧӧгін Россияның хазна флагынаң чабылған улуғ нимес харачахта Познанскай тимір чол бригадазының ікі офицері паза оларның алнында Антон Гироның сомын тутчатхан Олег Пагельс строевой хаалағнаң аэропорттың вип-залы хыринда турчатхан автомобильзер читіргеннер. Анда оларны фронтовиктің туғаннары сағааннар. Автомобиль хыринда Олег Пагельс туғаннарына хайди чӧр килгеннеңер, Антон Гироның сӧӧгі хайди табылғаннаңар, Гатчинадағы мероприятиелердеңер искірген, туғаннарының сурығларына нандырған. Фронтовиктің сӧӧгін чаа-мемориал компаниязынзар апарғаннар.
5 июньда Ағбанда Чиңіс паркында Успас от хыринда пайрамнығ улуғ траур митингі ирткен. Анда кӧп чон чыылыс парған. Успас от ибіре чаа тузындағы кип-азахтығ, каскалығ, автоматтығ тӧрт чааҷы турған. Чааҷылар сабланызы мемориал алнында Ленинградскай фронттың штандартын кӧдір салған офицер турған. Чыылысхан чонның аразында министерство-ведомстволарның кізілері, студенттер, ӱгренҷілер, юнармеецтер полғаннар.
Митинг азылғанда, Хакасияның пазы Виктор Зиминге сӧс пирілген.
- Аарлығ чир-суғҷылар, табылбаан чааҷыларның списогы пазох пір чааҷаа хызырыл парды, - айланған ол чонзар,
- Антон Константинович Гиро Сибирьдең, пістің чир-суғҷыбыс. Ол Тувадаң чааға парған. Хакасияда ам аның 8 пархазы паза 11 кӧргенегі чуртапчалар. Аннаңар матырның сӧӧгін Хакасияда чеестеп чыып саларына пір дее ікінҷілес чох полған. Сала соонаң піс ағаа турыстыра хумартхы тас турғыс саларбыс. Ада чир-суубысты арачылап, чаадаң айланмааннарға піс ам пір ле оңдайнаң алымыбысты пир поларбыс - оларның махачызын хаҷан даа ундутпасха, Илбек Чиңісті, андағы чідіріглерні хаҷан даа сағыста тударға!
Чыл сай чаа парған орыннарда тілег отрядтары он муңа чағын чааҷының сӧӧгін таапчалар. Кӧбізінің ады-солазы ілезіне сығарылбин халча. Мында илбек полководец Александр Суворовтың сӧстері сағысха кірче: «Чаа андада тоозылча, хаҷан халғанҷы чааҷыны чыып саларлар». Пӱӱн уғаа кирек тоғыснаң айғасчатхан тілег отрядтарына алғызым читірерге сағынчам. Оларның тоғызы сылтаанда Хакасиязар нинҷе-де чааҷының сӧӧгін ағылғаннар.
Хакасияның пазы Антон Гироның туғаннарына паза тӧліне ағазының хумартхызына турыстыра поларға алғаан.
Антон Гироның пархазы Надежда Ульянова ағазының сӧӧгін, таап, ағылған кізілерге, Хакасияның пазына прай туғаннарының адынаң алғызын читірген.
Фронтовиктің сӧӧгін Ағбандағы сыыратта, чеестеп, чыып салғаннар.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде