ХАКАСИЯНЫҢ ПАЗА ТОМСК ОБЛАЗЫНЫҢ ПИК ПАЛҒАЛЫЗЫ
07.06.2017
Хабарлар
Июньның пастағы кӱннерінде Хакасияда тоғыс чорығынаң Томск облазының культура паза туризм департаментінің пастығы Павел Волк полған. Пу чорыхтың ӧӧн пӧгіні - республиканың культура министерствозы паза Томск облазының культура паза туризм департаменті аразында 2011 чылда иділген чӧптезігні узарадары.
Хакасияның культура министрінің тоғызын толдырчатхан Светлана Окольникованаң хада аалҷы Катанов, Заря, Маткичіг ааллардағы Культура тураларын кӧріп алған. Ідӧк Павел Волк Салбых кӱргенде, республиканың музей-культура кінінде, «Хуртуйах тас» музейде паза Н.Г.Доможаковтың адынаң национальнай библиотекада пол килген. Павел Волктың таниинаң, Хакас чирінде пос культуразына хынчатхан чон чуртапча. Аның ӱлгӱлері культураны городтарда ла нимес, ідӧк аалларда тилідерге кӱстенчелер.
Томск облазының культура паза туризм департаментінің пастығы чоохтапча: «2 июньда Заря аалда полғам. Пу аалда кізілер пір ле орамада чуртапчаттырлар, іди дее полза, мында наа Культура туразын пӱдір саларға чарадығ алылған. Амды наа культура кінінде аалның чуртазы «хайнапча». Республика ӱлгӱлері кічіг аалларға хайығ салчатханы хайхатча». Павел Волктың кӧңніне Катанов паза Маткичіг ааллар кіргеннер. Аның чооғынаң, Хакасияда чапсых орыннар кӧп, аннаңар регионда туризмні хайди даа тилідерге кирек.
Светлана Окольникованаң Павел Волк ікі регион аразында пик культура палғалызын тударға пӧгінчелер.
3 июньда Хакас филармониязында Томсктағы симфоническай оркестрнің концерті ирткен. Олох кӱн С.П.Кадышевтің адынаң культура кінінде ікі кӧзідіг азылған. Анда Томск облазы устарының чайаачызынаң танызып аларға чарир.
Павел Волк Хакасияның устарын «Севернің этюдтары» паза «Палтының ӱлӱкӱні» фестивальларға хығырған. Ідӧк пастыхтар Хакас драма театры гастрольларнаң томск облазынзар парардаңар чоохтас салғаннар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде