ХАКАСИЯ РОССИЯ КӰНІН АЛҒЫМ ТАНЫХТИР
07.06.2017
Хабарлар
Андағ искіріг иділген ӱлӱкӱнге тимненіс хайди парчатханына чарыдылған пресс-конференцияда. Хабарҷыларнаң тоғазығда республиканың культура министрінің тоғызын толдырчатхан Светлана Окольникова, национальнай паза территориальнай политика министрінің тоғызын толдырчатхан Дмитрий Тодышев, спорт министрінің тоғызын толдырчатхан Виктор Струков паза чииттер политиказы департаменті устағҷызының орынҷызы Елена Злобина араласханнар.
Пӱӱл 12 июньда Хакасияда пастағызын на «Чоннар ынархазы парады» чӧрім иртер. Республикада чуртапчатхан аймах нациялығ кізілер, постың кибірліг кип-азаан кизіп, пайрамнығ колоннанаң Ағбандағы «Орленок» парктаң Пастағы май площадьынзар парарлар.
- Мындағ акция пастағызын на 2014 чылда Киров городта ирткен. Анаң аны иртіреріне Россияның Халыхтар палатазы хозылған. «Чоннар ынархазы парады» чӧрімнің ӧӧн кӧстее - кӧзіт пирері: піс аймах-пасхабыс, че піс пірге полчабыс, - чарытхан Дмитрий Тодышев.
Пӱӱл «Чоннар ынархазы парады» Россиядағы 30 городта, ол санда Хакасияның ӧӧн городында, иртер. Ағбанда парадта 500-ке чағын кізі аралазар тіп сағыпчалар. Дмитрий Тодышевтің чооғынаң, амғы тусха республиканың 20 артиинаң национальнай пірігізі аралазарға тимдезінеңер искіртір. Чӧрімнің араласчыларының кӧбізі национальнай кип-азахтығ полар.
Митинг соонаң Пастағы май площадьында пайрамнығ концерт иртер. Светлана Окольникованың искіриинең, концертте Хакас филармониязының, С.П.Кадышевтің адынаң культура кіні артисттерінең хада «От ыры» фестивальның аралысчылары кӧглирлер.
- 9 июньда пасталчатхан «От ыры» фестиваль ідӧк Россия кӱніне чарыдылча нооза. Пӱӱл тиксі Россиядағы этническай эстрада фестиваль-мариинда тоғыс регион аралазар. Ол Алтай, Тыва, Бурятия, Крым республикалар паза пасхазы, - таныхтаан культура министрінің тоғызын толдырчатхан Светлана Окольникова.
Ідӧк пӱӱл Хакасияда Россия кӱніне чарыдылған кӧп спорт мероприятиелері иртер, 8 июньнаң 18 июньға теере.
- Тиксі пістің республикада Россия кӱніне чарыдылған 20 спорт мероприятиезі иртер, - искірген Виктор Струков. - Олар прай даа аймахтарда паза городтарда иртірілер.
Кӧзідімге, Асхыс аймаанда кинек палалар аразында фестиваль иртер, Харатаста - «Президент марығлары» спорт-хазых фестивальы, Орджоникидзе аймаанда - «Казыр-2017» суғдағы спорт кӧрімнерінің фестивальы. Ідӧк 12 июньда Пастағы май площадьында ГТО нормативтерін хайди толдырарын кӧзітчеткен площадка тоғынар.
Елена Злобина чиит улус ӱлӱкӱнде ӧткін аралазар тіп чоохтаан. Волонтер полчатхан чииттер узуны 27 метр триколор чаламаны город істінҷе апарарлар, ідӧк тигірзер Россия флагын таныхтапчатхан ӱс ӧңніг шарларны позыдарлар. 12 июньда республиканың музей-культура кінінде Хакасияның пазы Виктор Зимин чиит улусха паспорттар читірер.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде