ХООСТАР МАРИИНЫҢ ЧИҢІСЧІЛЕРІН ЧЕЕСТЕЕННЕР
09.06.2017
Хабарлар
Хкасияның Ӧӧркі Чӧп президиумы 7 июньда теестегі чыылиинда 9 сурығ кӧрібіскен. Сурығларның чардығы республиканың законнарынзар алызығлар кирерінең палғалыстығ полған, пасха чардығы - федеральнай закон проекттеріне ӱндезерінең.
Ідӧк Ӧӧркі Чӧп президиумы «Минің Чир-суум» хоостар паза плакаттар марииның чиңісчілерін чеестеен. Марығ Хакасияның Ӧӧркі Чӧбіне 25 чыл толчатханына чарыдылған.
Жюриге 14 - 18 частығ хоосчылар чайаан 100 артиинаң тоғыстаң иң артыхтарын таллирға килістір. «Хоос» номинацияда пастағы орынға Ағбандағы лицейнің ӱгренӌізі Дарья Макина турысхан. Чиңісчілер санында паза пір хакас хыс - Ағбандағы 22 № школаның ӱгренӌізі Ксения Сазанакова. Ол «Плакат» номинацияда 3-яі орынға сыххан. Ӧӧркі Чӧп кнезі Владимир Штыгашев чиңісчілерні, сыйыхтап, ӱгредігде паза чайаачы тоғыста наа чидіглерге чит турарға алғаан : «Ӧӧркі Чӧптің пу алғыстас пічии - хазна органынаң алчатхан пастағы сыйииңар. Пу сыйых сірерні наа чиңістер тударға кӧӧктір турзын».
Чиит хоосчыларға сыйыхтар читірілген соонаң чыылығның тоғызы пасталған. Хакасияның прокуроры Денис Попов «Хакас Республика Правительствозынаңар» законзар алызығлар кирчеткен закон проектінең таныстырған. Республика законынзар алызығлар кирерін федеральнай законодательство алыс парғаны кирексіпчеттір. Ӧӧн алызығларның пірсі республика правительствозының кізілеріне ахчаларын паза пасха даа аарлығ ниме-нооларын пасха хан чиріндегі банктарда хайраллирға чарадылбинчатханынаң палғалыстығ тіп чарытхан республиканың прокуроры. Ӧӧркі Чӧп президиумы пу сурығны чағынғы сессияда ӱзӱріге сығарарға чарат салған.
Ӧӧркі Чӧп президиумы ідӧк федеральнай закон проекттеріне ӱндезер сурығларны кӧрібіскен. Ол закон проекттернің пірсі табырах имнег полызии машиналарына чол пирбинчеткен водительлердең тоғыр хатығласты тыыдар кӧстегліг полча. Халғанӌы туста «скорайларны» иртірбин турғаны удаа учурапча. Аннаңар Хазна Думазының депутаттар ӧмезі хатығласты тыыдар пастағнаң сыххан. Амғы туста пу сайбағ ӱчӱн 500 салковай штраф алай водитель правазын пір айдаң ӱс айға теере пылап алары кӧрілче. Кирілчеткен алызығларӌа 30 муң салковай штраф салары паза ағаа хоза праваны пір чарым чылдаң ікі чылға теере пылап турары кӧрілче. Ӧӧркі чӧптегілер, андағ водительлернең кӱрезерге кирек полчатханынаң чаразып, федеральнай закон проектіне хабазарға чарат салғаннар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде