КИБЕЛiСТЕР
09.06.2017
Статья
Иб-чуртыңда мӧңіс ээленмезін,
Хыйалның холы сағаа теңмезін.
Пілчем, чуртас аймах-пасха ӧңніг,
Чайаан пайын сағаа харанмазын.
Чахсы кӧрдек минзер, арғызым,
Сарғал партыр ба чуртас ағазым?
Иң пӧзік чидиим - ікі хызым,
Чирде, чонда чилегелен пардым.
Ап-арығ Оот сууҷах полғам хаҷан-да,
Табырах Тӧӧ суғ полғам чиит тузымда.
Амды амыр ағыннығ Ағбан суғбын,
Че порас арах, палғас таа пар анда.
Хомзыныс хум чазыны мин ирткем,
Ӧрініс кӧк чазыда ойын салғам.
Пӱӱн пір дее ниме наа нимес мағаа,
Че чуртас-киндем халын, тоозылбас сағам.
Тӧлібіс кибірні, тілні тастабазын,
Постың сын чолынаң хыйа сыхпазын.
Хакас чон ікі муң азыра частығ,
Пу чирде аның кӱні хонмас ползын.
Орыс тізем, мин осхас хакас сырай,
Хакас кізі тізем, орыс тілліг саңай.
Аарла постин, пасха чонға сабыхпин,
Андада полызар піске Тенгри худай.
РУБАИЛЕР
Читпес чирге чит турыңар,
Албас чирдең ал турыңар.
Пирчеткен Худай пир турзын,
Хазых-амыр, пай чуртаңар.
Хомзыныс-мӧңіснең нанҷыласпа,
Ачығ тілліглерге кӧңнің тӱзірбе.
Ааллап килербін, ӱлӱкӱн идербін,
Чалахай чӱрееңнің ізиин чаппа.
Кӧйген одың успас ползын,
Аххан сууң табырах ползын.
Чобағ-сыытты пілбин чурта,
Иб-хонииң хозыл ла турзын.
Кӧріс ползын ырах,
Чазың ползын узах.
Ис-пай тоозылбазын,
Сағызың ах ползын.
ІКІЛІКТЕР
Амзабин хыйалның ачиин,
Пілбессің ырыстың тадиин.
Кӱстенгенің тикке парбас,
Чидіг позы чиде салбас.
Чахсы чабалнаң даа айланча,
Чабал чахсынаң айланминча.
Таныбас кізі сағаа хомай итпес,
Чидіг, ӧріністеріңні ол пілбес.
Сағыс-кӧрістерні ӱзӱрчелер илбектер,
Кізіні ӱзӱрчелер сағысха кинектер.
Ӧскен ағас игірі чох полбинча,
Алҷаастар итпин, кізі чуртабинча.
Пірде айас, пірде пулуттығ кӱн чіли,
Чуртаста чахсы, хомай хаҷан даа хости.
Чидіглерің пар полза, махтанма,
Айас ла кӱннер полар сағынма.
Хайда сӱрнӱккенің хынығ нимес піске,
Хайди азахха турғаның туза кізее.
Геннадий КИЧЕЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы