ПОСЁЛОК ЧАХСЫ САРИНЗАР АЛЫСЧА
14.06.2017
Хабарлар
Орджоникидзе аймаандағы Приисковай аалда халғанҷы чарым чылда чахсы саринзар илееде алызығ пол парған. Хакасияның пазы Виктор Зимин, аалзар пылтыр ноябрьда киліп, чахығлар пирген соонда, оларны толдырып, анда мындағ салтарға килгеннер. Регионның устағҷызы ыраххы аалны тилідер алынҷа программа тимнеп саларға нандырығлығ министерстволарға чахығ пирген.
Амды мындағ тоғыстар толдырыл парған: тиксі тыхтағ соонда аалда полицияның участковай пункты тоғын сыххан. Ағаа наа УАЗ автомобиль ал пиргеннер. Ідӧк аалда ам имнег полызиин табырах пирҷең автомобильліг амбулатория пар. Имнег бригадазы аалда тоғынарын чуртағҷылар ӱр сағааннар. Чағынғы имнег туразы чӱс километр ырахта, аймах кіні Копьёвта, орныхча нооза. Мының алнында кізілерге полызығны аннаң сағирға килісчең. Амды Приисковайдағы имҷілернің ағырыбысхан кізілерге полызығ пирҷең прай нимелері пар.
Ікі чыл аразына аалдағы школаны тыхтап саларға, ідӧк анда улуғ нимес стадион пӱдір саларға план тудылча. Посёлокта ӧрт ӱзірҷең часть полар, ирткен чӱс чылның 30-40 чылларында пӱдірілген, амды чуртирға чарабинчатхан тоғыс барак чох иділер.
Хайди таныхтаан Орджоникидзе аймааның устағҷызы Дмитрий Попков, ам «чол картазы» тимнелче, чолларҷа, чарытхыҷа, энергетикаҷа, суғ пирер системаҷа инфраструктура сурығлары пӧгілче.
Халғанҷы туста Приисковайзар спортсменнер паза туристтер тынанарға кил сыхханнар: посёлокта читі наа гостиница пӱдіріл парған. Аннаңар регионның устағҷызы Виктор Зимин орындағы чуртағҷыларға паза туристтерге истіг оңдайлар пирерге сотовай палғалысты чахсыландырар паза интернетке сыбыра кірер сурығларға алынҷа хайығ айландырған.
Кічіг паза ыраххы аалларны тилідер программа хоостыра апарылчатхан тоғыстар республикадағы аалларның чуртазын чахсы саринзар алыстырарға тың хабасчалар. Аның сылтаанда аалларзар чиит улус айланча, таңдағы кӱнзер олар киртініснең кӧрчелер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде