ХАКАСИЯНЫҢ ПАЗЫ ПАСПОРТТАР ЧИТІРГЕН
16.06.2017
Хабарлар
Россия кӱнінде Хакасияның пазы Виктор Зимин иң чахсы ӱгренчеткен ӱгренңілерге Россия Федерациязының гражданині полчатханын таныхтапчатхан паспорттар читірген. Паспорт аларға хығыртылған 25 олғанның аразында ӱгредіг отличниктері, олимпиадаларның, аймах чайаачы марығларның, спорт марығларының чиңісчілері, школалардағы халых пірігістерінің ӧткін араласчылары полғаннар.
Пайрамнығ мероприятие республиканың музей-культура кінінде ирткен. Ол «Піс - Россияның кізілерібіс!» тиксі Россияда иртірілчеткен патриот акциязы хоостыра иртірілген, ідӧк мероприятием хазнаның ӧӧн ӱлӱкӱніне чарыдып иртіргеннер. Республиканың устағӌызы Виктор Зимин, ӱгренӌілерзер алғыстас сӧстерінең айланып, чоохтаан:
- Хазнаның ӧӧн ӱлӱкӱнінде пістің республиканың чиит чуртағңылары ӧӧн документті - Россия гражданинінің паспортын - алчатханнары уғаа танығлығ кирек полча. Сірерге ам 14 ле час. Че паспорттарыңның істенізіңернең, иң артых поларға кӱстенізіңернең сірер чуртазыңарда пастағы иң улуғ чиңіске читкезер. Аннаң сірерге поғдархирға чарир. Сірерні махтирға ла халча! Мыннаң мындархы чуртазыңарда: ӱгредігде, профессияда, хынчатхан киректеріңде, сӧбіреде постарыңның чидіглерін улам хозып ла одырарға прай чӱреемнең алғапчам. Сірер пӧзік чидіглер кӧзітчезер, андада пістің Хакасиябыс таа, Россия даа пӧзік чидігліг поларлар. Школаңарны, городыңарны паза аймааңарны, республиканы паза прай хазнабысты сабландырыңар. Iдӧк сыбыра піліңер - Россия гражданинінің паспортын алғаны сірерні постарыңның прай киректерің ӱчӱн нандырығлығ поларға кӧстепче.
Хакасияның пазы алынӌа алғыс сӧстерін паспорт алған олғаннарның паба-іӌелеріне, ідӧк Россияның турыстыра кізілерін ӧскірчеткен, ӱгретчеткен ӱчӱн оларның ӱгретчілеріне читірген. Виктор Зиминнің холынаң паспорт алған ӱгренӌілернің аразында ӱгредігде пӧзік чидіглер кӧзітчеткен, аймах предметтерӌе олимпиадаларда аралазып, сыйыхтығ орыннарға сыхчатхан, школаларда халых тоғызынаң ӧткін айғасчатхан Рома Коков, Тоня Чистобаева, Данил Спирин, Аня Алахтаева паза даа пасхазы полғаннар.
Паспорттар читірер пайрамнығ мероприятие тоозылған соонда республика устағӌызы, олғаннарнаң чоохтазып, оларның аймах сурығларына нандырған. Пу тоғазығ уғаа чылығ ирткен, ӱгренӌілернің кӧңнілері дее тың кӧдіріл парған.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде